Romans 11

1Ka kumeno awacu kumae, Mungu coro dhanu pare ceni? Awene. Kum an bende an a Jaisraeli, mi kodhi Ibrahim, mi suru pa Benyamin. 2Mungu coro dhanu pare m’elar eng’eyogi cen ungo. Kadi wung’eyo ngo gin ma lembagora pa Mungu wacu pir Elia? maram ekwayu ko Mungu kum Israel kumae: 3Rwoth, ginego jubila peri, gimugo pemblam peri; man adong’ akenda, man giyenyo ka kwona. 4Ento lembadwoka pa Mungu wacu ire nik ang’o? Dhanu m’udong’ ira gira gi rubanga abiro, ma fodi gikurumo conggi ngo ni Bal. 5Cil kumeno i nindo ma kawono nini bende donge m’udong’ calku goyo nying’ mi bero nuti. 6Ento tek en e ni kum bero, nwang’u en e ni kum tic kendo ngo: kum tek en e kumeni ngo nwang’u bero en e bero kendo ngo. 7Ka ke ang’o? Maeno ma Israel ubeyenyo, maeno enwang’u ngo; ento ju ma jugoyo nying’gi ginwang’e man donge m’udong’ judwoko cwinygi nwang’: 8calu egore kumae, Mungu mio igi tipo mi rip rip, wang’ kara ku ginen, man ith kara ku giwinji, cil i ceng’ maeni nini. 9Man Daudi wacu kumae, Dong’ mesa migi dok ni uwic, man ngbak, Ku gin ma redhojo, ku cul de igi: 10Dong’ wang’gi yuthi, kara ku ginen, Man igung’ ng’eigi piny thiri thiri. 11Ka kumeno awacu kumae, Gikier kara gipodhi? Awene: ento ni kum podho migi both uwok ni Thekdhanumange, kara enyai ngiri i igi. 12Nie tek podho migi en e lonyo mi ng’om, man ruvwa migi de lonyo ni Thekdhanumange; pong’ migi sagu dit ungo? 13Ento ayero iwu wu ju ma wu Thekdhanumange. Kum kumeno kum an a jakwenda mi Thekdhanumange, ayungo tic para; 14tek ku yo moko acopo ketho ngiri neg ju ma wa kum acel wakugi, man kara abodh jumoko m’i kindgi. 15Kum tek cor ma jucoro kogi cen en e pot ma jupoto ko ng’om, jol ma jujolo kogi ke bibedo girang’o, ndhu kwo ngo m’uai ba ju m’utho? 16Man tek cam ma kwong’a bedo leng’, cam dho bende bedo kumeno. 17Ento tek jange moko juturo woko, man in, ma in ulemo m’i thim, juroi i kindgi, man macen wudoko jurib wukugi mir ulag mi mio mir ulemo; 18kud iluli kum jange: ento tek iluli, en e in ungo m’uyeyo ulage ento ulage re m’uyeyo in. 19Ka kumeno ibiwacu kumae, Jange juturo woko, kara juroya i ie. 20Ber; juturogi woko ni kum yioyic migi m’umbe, man ni kum yioyic peri icungo. Kud ibed ku pidoic mi tingri, endre ilwor: 21kum tek Mungu weko jange ma dhe ngo, e ebiweko in de ngo. 22Ka kumeno wunen bero ku kwaya pa Mungu: yo ba ju m’upodho, kwaya; endre yor i beng’i, bero pa Mungu, tek ibedo asu i bero pare: tek kumeno ngo e in bende jubitong’i. 23Man joca bende, tek gibedo asu ngo i yioyic migi m’umbe, jubiroyogi i ie: kum Mungu copo royogi i ie kendo. 24Kum tek jutong’i woko kud i maeno ma en e ulemo m’i thim ma ma dhe, man juroi tung’ ku ma dhe i ulemo ma ber; maeni ma gi jange ma dhe, jubiroyogi i ulemo nngi gigi ma sagu dit ungo? 25Kum ayenyo ngo, umego, ya wubed cobo ni giramung’a maeni, kara kud wubed riek i weng’wu giwu, nia ng’et nwang’cwiny upodho wi Israel, cil ma pong’ mi Thekdhanumange wok ko; 26man kumeno Israel ceke biboth: cil calu egore kumae, Jagony bibino m’ebiai i Sayuni; Ebikabu gin ma ayi Mungu mbe i kume kum Yakobo: 27Man maeni en e lembariba para igi, Kinde m’abikabu dubo migi woko. 28Man pi lembanyong’a ma juboth ko, gi judegi piwu: endre pi goyo nying’, gi jumer pi kwaru. 29Kum giramia ku lwong’o pa Mungu lokri mbe kude. 30Kum calu wun yang’ wu juco ni Mungu, ento kawono wudaru nwang’u kisa ni kum camuco migi, 31cil kumeni joni bende kawono gi juco, kara ni kum kisa m’unyuthre iwu gin bende kawono ginwang’ kisa. 32Kum Mungu ciko ceke karacelo ni camuco, kara kisa nege kum ceke. 33Ei karamb thuth mi lonyo mi rieko ku ng’eyong’ec pa Mungu mire ma! karamb pokolembe pare ma yenjre ngo, man yo pare de ma lure ngo! 34Kum ng’a m’ung’eyo pidoic pa Rwothi? kadi ng’a ma japorlembe pare? 35kadi ng’a ma lar mio ire, man ebicnie ire kendo? 36Kum gin ceke ai i bang’e, man ni kume, man ire. Dwong’ ma rondo ku rondo ubed ire. Amen.

will be added

X\