Romans 1

1Paolo, jamiru pa Yesu Kristu, ma julwong’e ebed jakwenda, ma jukoye pi lembanyong’a ma juboth ko pa Mungu, 2m’elar eng’olo ni kum jubila pare i lembagora ma leng’ pa Mungu, 3pi Wode, ma junyolo mi kodhi Daudi calku kum, 4m’enyuthre ku tego ya en e Wod Mungu, calku tipo mi leng’cwiny, ni kum cer ma kind ju m’utho; ndhu Yesu Kristu Rwoth mwa, 5ma ni kume wanwang’u bero man kwenda, ni woro mi yioyic i kind thek ceke, pi nyinge; 6i kind joni wun bende, julwong’owu ya wubed pa Yesu Kristu: 7ni dhanu ceke ma gini i Rumi, ma jumer pa Mungu, ma julwong’ogi gibed jumaleng’: Bero iwu man kwiocwiny m’uai ba Mungu Wegwa man Rwoth Yesu Kristu. 8Ku kwong’a, afoyo Mungu para ni kum Yesu Kristu piwu ceke, kum yioyic mu yik i ng’om ngung’. 9Kum Mungu m’atimo ire yor i cwinya i lembanyong’a ma juboth ko pa Wode, en e jamulembe para, maram aweko lwong’o ko nyingwu ki ngo i rwo para thiri thiri 10m’akwayu ko kwac, nia tek ebedo miero ira kawono ku yo moko ma naka k’emiero ngo ku yeny ma Mungu yenyo ya abin i beng’wu. 11Kum ava nenowu benega dit, kara ami iwu giramia moko mi tipo, kara lembe cung i iwu; 12lembene eni, kara an ku wun de wajukra i kumwu, ng’atuman kum yioyic pa wadi man kum pa wadi, mu ku para de. 13Man ayenyo ngo nik wubed cobo, umego, nia wang’ udul akeco ya abin i beng’wu (man cil ku kawono de ecere ira), kara abed ku nying’ moko m’acego i kindwu bende, cil calu ma i dong Thekdhanumange. 14An a jarabanja mi Juyunani ku mi ju ma sai, mi jurieko ku mi jukusegu bende. 15Kumeno, ku tego m’i ia ceke, abedo ayika ni yero lembanyong’a ma juboth ko iwu bende ma wuni i Rumi. 16Kum lewic unega ngo kum lembanyong’a ma juboth ko: kum en e tego pa Mungu mi both ni dhanu ceke kubang’gi kubang’gi m’uyio; ku kwong’a ni Jayahudi, man ni Jayunani bende. 17Kum bedopwe pa Mungu nyuthre i ie uai ba yioyic utundo kum yioyic; calu egore kumae, Ento weg bedopwe bikwo ni kum yioyic. 18Kum kwinyo pa Mungu ai kud i polo unyuthre kum gin ceke ma ayi Mungu mbe i kume man gondri ceke de mi dhanu, m’ucero lemandha i gondri; 19kum gin pa Mungu ma jung’eyo enyuthre i igi; kum Mungu nyuthe igi. 20Kum gin pare ma nen ungo ugambre i kacwic mi ng’om dong’ nen terere, m’eng’eire ni kum gin m’ucwire, cil tego pare mi nja man rucwic; kara kalokolembe m’i wigi bed umbe igi: 21kum, gin ma ging’eyo Mungu, giyunge ngo calu en e Mungu, kadok afoya de gifoye ngo; ento gidoko jukuhaya i lembapora migi, man adundegi ma kite mbe yutho. 22I tuco ma gituco ko gigi ya gi riek, gidoko jukusegu, 23man giweko dwong’ pa Mungu ma nyothie ngo pi giracwia mir ayi dhanu ma nyothre, ku mi winyo, ku mi yedi ma tiendgi ang’wen ang’wen, ku mi gin ma lak i ng’om de. 24Kum kumeno Mungu wekogi i awanya ma rac mir adundegi ni sasa, kara gibed umbe yung mi kumgi i kindgi gigi: 25kum giloko lemandha pa Mungu ku ndra, man girwo ni giracwia pa Mungu gitimo ire de kaka Jacwic, ma Jamugisa mi nja. Amen. 26Kum lembe nini Mungu wekogi ni awanyakum mi sasa: kum mon migi bende giloko tic mi kurajo ni ma mi kurajo ngo: 27man co bende kumeno, ma giweko tic mi mon ma kurajo, gicwaku mac ther awanya ma rac migi ng’atuman ku wadi man ku wadi, ma co ku co wadi gitimo ko gin m’umaku piny ungo, man ginwang’u cul mi kier migi m’uromogi i igi gigi. 28Man cil calu gikwero bedo ku Mu.. ngu i ng’eyong’ec migi, Mungu kunogi ni pidoic ma rac, ma gitimo ko gin ma maku ku jutim; 29ma gipong’ ku gondri ceke, ku dubo, ku ketho cwiny hai kum piny, kud akece; gipong’ ku kumira, ku nego nek, ku dhau, kud awondi, kud adegi; juyer nying’ ma kwe kwe, 30juyer nying’ ma rac, weg adegi ni Mungu, jucac, ju ma tingri, ku jukulula, ku jutheb dubo, ku ju ma juco ni junyodo migi, 31ma ng’eyong’ec umbe kugi, ku jung’eny lembariba, ma mer mi wat umbe kugi, ma kisa mbe kugi: 32gin, ma ging’eyo lembapoka pa Mungu, ya ju m’ucikutimo wagi gin ma kumeni giromo ku tho, gikutimo wagi gin maeni atima kende ngo, ento giyio karacelo ku ju m’ucikutimogi bende.

will be added

X\