Revelation 9

1Man malaika mir abije kudho agwara, e aneno cero m’uai i polo podho i ng’om: man jumio ire kifungula mi vur mi longro ma there mbe. 2Man eyabu dhu vur mi longro ma there mbe; e yiro thwogre kud i vur woko, calu yiro mir uka ma dit; man ceng’ ku lietho de uyutho ni kum yiro mi vur. 3Man bonyo core i ng’om ku kind yiro; man jumio igi tego, calu ith m’i ng’om ubedo ku tego. 4Man juwacu igi ya ku gitim lum m’i ng’om rac, kadok gin moko ma numu, kadok yen moko, ndhu wagi dhanu ma ayi Mungu mbe ternyimgi kendgi. 5Man jung’olo igi ya ku gineggi, ento nia gimi ndiba igi dwi abic: man ndiba migi e calu ndiba pa ith, kan etong’o dhanu. 6Man i ceng’ maeno dhanu biyenyo katho, ere gibinwang’e ki ngo; ava tho de binegogi, man tho biringogi. 7Man ayi bonyone va ayi riuni m’ubedo ayika mir ali; jamkermiwic ma calu mola ma kwar ni i wigi, wang’gi de calu wang’ dhanu. 8Man yukwigi calu yuk wi mon, lakgi ke pa lak umvor. 9Man gibedo kud asikor, ma calu asikor mi nyunyu; man badwand bombgi calu badwand magali, mi riuni dupa m’uberingo dhu lwiny. 10Man yibgi de nuti calu mi ith, ku kwirne de; man tego migi ni i yibgi ma gitimo ko dhanu rac dwi abic. 11Ubimo m’i wigi de nuti ma en e malaika mi longro ma there mbe: nyinge ma ku dhu Juebrania en e Nyoth, man ku dhu Juyunani ke nyingene Janyoth. 12Can ma kwong’ane daru kadhu: nen, Can ario mange bibino macen. 13Man malaika mir abusiende kudho agwara, e awinjo badwal acel m’uai i tung pemblam mi mola ma kwar ma ni i wang’ Mungu, 14acel uwacu ni malaika mir abusiende ma won agwara kumae, Gony malaika ang’wen m’ubedo atwia dhu kulo ma dit ma Eufrati. 15Man jugonyo malaika ang’wen, m’ubedo ayika mi saa ku ceng’ ku dwi man rundi, kara gineg theng dhanu mir adege. 16Man wel mi njuru weg riuni en e rubanga apar bang’ rubanga apar wang’ ario: awinjo welgi. 17Man aneno riuni kumeno ku ginmawokiwang’, ku ju m’ubedo i wigi, ma gi weg asikor ma calu mi mac ku mi kidi ma col ku mi muganga: man wi riuni de calu wi umvor; man mac ku yiro ku muganga ubethwogre woko kud i dhoggi. 18Man ku masendi adek maeni junego theng dhanu mir adege, ku mac ku yiro man muganga, m’uthwogre woko kud i dhoggi. 19Kum tego mi riuni ni i dhoggi, man i yibgi: kum yibgine gi calu thwol, man wigi nuti; man gitong’o ku maeno. 20Man dong’ dhanu m’udong’, ma junego ngo ku masendi maeni, giloko cwinygi ngo kum tic mi cing’gi, ya ku girwo ba pajogi, kud ayi gin m’acwia mi mola ma kwar, ku mi mola ma tar, ku mi mola, ku mi kidi, ku mi yen: ma kucop neno piny ungo, kadok awinja de giwinjo ngo, kadok awotha de giwotho ngo: 21man giloko cwinygi de ngokum nek migi kadok kum ajoga migi, kadok kum tarwang’ migi, kadok kum kwalukwo migi.

will be added

X\