Revelation 8

1Man kan ealu ayi mir abirone, piny uling’ ti i polo i kinde mi ng’et saa acel. 2Man aneno malaika abiro m’ucungo wang’ Mungu; man jumio igi agwara abiro. 3Man malaika mange bino cungo nyim pemblam, m’ebedo ku tabu mi mola ma kwar mir udok ma ng’wice ng’ar; man jumio ire udok ma ng’wice ng’ar dupa, kara emede ku rwo mi jumaleng’ ceke wi pemblam mi mola ma kwar, ma ni i nyim komker. 4Man yiro mir udok ma ng’wice ng’arne, karacelo ku rwo mi jumaleng’, uidho malu i wang’ Mungu kud i cing’ malaika. 5Man malaika ting’o tabu mir udok ma ng’wice ng’ar; man epong’e ku mac mi pemblam, man ebole wi ng’om: e m’ulubo maeno morpolo, ku dwal, man lukoth, ku digidi de. 6Man malaika abiro ma weg agwara giyikri gigi mi kudho agwara. 7Man malaika ma kwong’ane kudho agwara, m’ulubo maeno pei ku mac, m’ujebre ku rimo, man jubologi wi ng’om: man theng ng’om mir adege wang’ pet, man mir adege mi yedhi de wang’ pet, man lum ceke ma numu wang’ pet. 8Man malaika mir arionde kudho agwara, e calu got ma dit ma mac ubewang’u jubolo i nam: man theng nam mir adege doko ni rimo; 9man theng yedi mir adege m’i nam utho, cil gin ma gi weg kwo; man theng combo mir adege nyothre. 10Man malaika mir adege kudho agwara, e cero ma dit uai kud i polo podho, m’ubewang’ va ridhro, man epodho wi theng kulo mir adege, man wi pi ma dhenyni; 11man nying’ cerone julwong’o Yendadra: man theng pi mir adege doko ni yendadra; man dhanu dupa tho ku pige, kum judwokogi kec. 12Man malaika mir ang’wende kudho agwara, e jugoyo theng ceng’ mir adege, ku theng dwi mir adege, man theng cero mir adege; kara theng piny mir adege yuthi, man rupiny kud ubed nuti ni theng piny mir adege, man diewor de kumeca. 13E aneno, man awinjo acur acel, m’eberingo i kor polo, m’ebewacu ku dwal ma dit kumae, Can, can, can, ni ju m’ubedo wi ng’om, kum dwal mange mir agwara mi malaika adek, ma gibikudho agwara macen.

will be added

X\