Revelation 4

1Yo ng’ei gin maeni aneno, man nen, dhugola yabre i polo, e dwal ma kwong’a m’awinjo, dwalne calu mir agwara m’ubeweco kuda, acel m’ubewacu kumae, Idh malu kue, man abinyutho iri gin ma bikotimbre be macen. 2E ndhu ndhu nica ani i Tipo. man nen, komker ukethie i polo, man ng’atu acel ujany wi komker; 3man ng’atu m’ujany enen va kidi ma tar m’urieny ku kidi ma kwar ngbo, danyu de nuti m’udhoko komker gbur, enen va kidi ma kite va lum. 4E komker pier ario wi ang’wen udhoko komkerne gbur; man aneno judongo pier ario wi ang’wen ujany wi komkerne, gironyo kendi ma tar; man jamkermiwic mi mola ma kwar ni i wigi. 5Man lukoth ku dwal ku morpolo giai ba komker. Man thala abiro mi mac ubeliel i wang’ komker, ma gi Tipo abiro pa Mungu; 6man gin moko ni i wang’ komker, ma calu nam mi kieu ma nen va kidi ma ie pelele; man i kind komkerne, kud i ng’et komkerne de, yedi ma kwo ang’wen ma wang’gi romo kumgi ceke yor i wang’gi ku yor i ng’eigi bende. 7Man yedi ma kwong’ane ayine pamir umvor, man yedi mir arionde ayine va nyathi dhiang’, man yedi mir adege wang’e pa wang’ dhanu, yedi mir ang’wende va acur m’uberingo. 8E yedi ang’wen ma kwone, ma bombgi abusiel abusiel kubang’gi nzu, wang’gi romo kumgi ceke ku yor i ie de: man kayom umbe igi dieceng’ ku diewor, ma giwacu ko kumae, Leng’, leng’, leng’, Rwoth Mungu, ma Jategokpo, ma yang’ enuti man enuti m’ebibino de. 9Man ka yedi ma kwo bimio dwong’ ku yung ku foyofoc ni ng’atu m’ujany wi komker, ni ng’atu m’ubedo kwo rondo ku rondo, 10judongo pier ario wi ang’wen bipodho piny i wang’ ng’atu m’ujany wi komker, man gibirwo ire m’ebedo kwo rondo ku rondo, man gibibolo jamkermiwic migi wang’ komker, ma giwacu ko kumae, 11Eromo kudi, Rwoth mwa man Mungu mwa, ya igam dwong’ man yung ku tego: kum icwio gin ceke, man gibedo nuti ni kum yeny m’iyenyo, gicwiri de.

will be added

X\