Revelation 3

1Ni malaika mi kanisa ma i Sardi kieu kumae: Ng’atu m’ubedo ku Tipo abiro pa Mungu, man cero de abiro, uwacu gin maeni: Ang’eyo tic peri, nia nyingi nuti ya ibedo kwo, enke in avu. 2Dong’ ibed ku weng’i, man iketh gin m’udong’ ucungi, ma gini ceng’ni tho: kum fokanwang’u tic peri moko ngo m’udoko ndhu cu i wang’ Mungu para. 3Ka kumeno dong’ ipoi maram yang’ ijolo man iwinjo de; man igwoke, ilok cwinyi de. Ka kumeno tek ikuro ngo, abibino calu jakwo, man saa m’abibino i ie i wi ibing’eyo ngo. 4Ento nyathi nyingi moko nuti i beng’i i Sardi m’ucido kendi migi ngo: man wabiwotho wakugi ku kendi ma tar; kum giromo. 5Ng’atu m’uloyo bironyo kendi ma tar kumeni; man abiruco nyinge woko kud i kitabu mi kwo ki ngo, man abituco nyinge i wang’ Vwa, kud i wang’ malaika pare. 6Ng’atu ma ithe nuti, dong’ ewinj gin ma Tipo wacu ni kanisa. 7Man ni malaika mi kanisa ma i Filadellia kieu kumae: Ng’atu m’e leng’, ng’atu ma en e andha, ng’atu ma kifungula pa Daudi ni i bang’e, ng’atu ma yabu man ng’atu moko mbe ma ciko, ma ciko de man ng’atu moko mbe ma yabu, uwacu gin maeni: 8Ang’eyo tic peri (nen, aketho dhugola m’ubedo ayaba i weng’i, ma ng’atu moko mbe ma copo ciko), ya nyathi tego moko ni i beng’i, man igwoko lembe para, man ikwero nyinga de ngo. 9Nen, amio ng’et cokri pa Jok, mi ju m’uwacu nia gi Juyahudi, enke gi kumeno ngo, ento gicwayu ndra; nen, abiketho gibino girwo de nyim tiendi, ging’ei de nia ameri. 10Kum igwoko lembe mi twiocwiny para, an bende abigwoki ni saa mir abidhe, saa maeno ma bibino wi ng’om ngung’, nimulo i ju m’ubedo wi ng’om. 11Abino pio: mak maeno m’ibedo ko ki, kara ng’atu moko kud umai jamkermiwic peri. 12Ng’atu m’uloyo, abikethe ni mbegi i hekalu pa Mungu para, man ebiwok woko ku keca kendo ngo: man abigoro nying’ Mungu para i wie, man nying adhura pa Mungu para, ma Yerusalem ma nyen, m’uai i polo ba Mungu para loro piny, ku nyinga ma nyen an gira. 13Ng’atu ma ithe nuti, dong’ ewinj gin ma Tipo wacu ni kanisa. 14Man ni malaika mi kanisa m’i Laodikia kieu kumae: Ng’atu ma Amen, m’e jamulembe mandha ma andha de, m’e thangambere mi giracwia pa Mungu, ewacu gin maeni: 15Ang’eyo tic peri, nia in i ng’ic kadok lieth de ngo: ayenyo ibed ng’ic kadi lieth. 16Kum kumeno kum i tang’, man i lieth kadi ng’ic de ngo, abing’uli woko kud i dhoga. 17Kum iwacu kumae, An a lony, man alimo lonyo, man can gin moko mbe m’unega; m’ing’eyo de ngo nia in i jacan m’umbe mutoro de man m’umbe piny man abinga, muneru de: 18amio iri rieko nia ing’ieu mola ma kwar i bang’a m’uwang’ i mac, kara idok m’i lony; ku kendi ma tar, kara ironjri, kara lewic mi muneru peri kud unen: man mo m’i wang’ de m’iwir ko weng’i, kara inen. 19Ku ba ju m’amaru ceke, ajukogi man aponjogi: ka kumeno bed k’amora, man ilok cwinyi. 20Nen, acungo dhugola man adwong’o: tek ng’atu moko winjo dwanda man eyabu dhugola, abimondo i bang’e, man wabicamu wakude, en de kuda. 21Ng’atu m’uloyo, abimie ejany kuda i komker para, calu an bende aloyo, man ajany waku Vwa i komker pare. 22Ng’atu ma ithe nuti, dong’ ewinj gin ma Tipo yero ni kanisa.

will be added

X\