Revelation 22

1Man enyutho ira kulo mi pi mi kwo, ma rieny calu kidi ma ie pelele, m’eai kud i komker pa Mungu man pa Nyathi Rombo, 2i die gengine. Man ng’et kulo kun ku kun yen mi kwo nuti, m’ecego nyinge ma tung’ tung’ apar wi ario, m’ecego ko nyinge ku ba dwi: man ith yende en e mi cangu thek. 3Man kwong’o kwong’ bidong’ bedo umbe kendo: man komker pa Mungu ku pa Nyathi Rombo bibedo i ie: jumiru pare de gibitimo ire; 4man gibineno wang’e; nyinge de bibedo ternyimgi. 5Man diewor bidong’ bedo umbe kendo; man can der mi thala, kadok mi ceng’ de binegogi ngo; kum Rwoth Mungu bimio igi der: man gibibimo bim rondo ku rondo. 6Man ewacu ira kuma, Lembe maeni gi mandha gin andha de: Rwoth, Mungu mi tipo mi jubila, eoro malaika pare unyuth ni jumiru pare gin ma fodi nyanok bikotimbre be. 7Man nen, abino pio. Mugisa ni ng’atu m’uworo lembe mi lembila mi kitabu maeni. 8An a Yohana a ng’atu m’uwinjo m’uneno de gin maeni. Man kan awinjo aneno de, apodho piny nirwo the tiend malaika m’unyutho gin maeni ira. 9Man ewacu ira kumae, Nen kud itim maeni: an de an a jatic wedu ku mi juwedu ma jubila, ku mi ju m’uworo lembe mi kitabu maeni: rwo ni Mungu. 10Man ewacu ira kumae, Kud imwon ayi kum lembe mi lembila mi kitabu maeni; kum nindo dhingo. 11Wek ng’atu m’ugondre, utim gin m’ugondre asu: ng’atu m’ucido de, wek juketh ecid asu: man ng’atu ma pwe, wek etim bedopwe asu: man ng’atu maleng’, wek juketh ebed leng’ asu. 12Nen, abino pio; man sukulia para ni i bang’a, m’amio ni dhanu ceke kubang’gi nzu ng’atuman calku tic pare. 13An a Alfa kud Omega, ma kwong’a man ma cen, thangambere man kajik. 14Mugisa ni ju m’ulwoko kendi migi, kara gibed ku ng’ol ma gibin ko ba yen mi kwo, ma gimond ko ku i dhugola i adhura. 15Yo woko gwogi, man weg jogi, ku weg tarwang’, ku juneg nek, ku ju ma lamu ayi gin m’acwia, ku kwai dhanu ceke m’umaru ndra m’utimo de. 16An a Yesu aoro malaika para nituco iwu gin maeni ni kanisa. An a ulag man nyakwar Daudi, cero ma rieny, mi rupiny. 17Man Tipo ku mugole giwacu, Bin. Man ng’atu m’uwinjo, dong’ ewac, Bin. Man ng’atu ma rieupi nege, dong’ ebin: man ng’atu m’uyenyo, dong’ egam pi mi kwo k’abamba. 18Atuco ni dhanu nzu m’uwinjo lembila mi kitabu maeni kumae, Tek ng’atu moko bimedo wi lembe maeni, Mungu bimedo ire masendi m’ugore i kitabu maeni: 19man tek ng’atu moko bikabu kum lembe mi kitabu mi lembila maeni, Mungu de bikabu maka pare kud i yen mi kwo, man kud i adhura ma leng’, ma pire gore i kitabu maeni. 20Ng’atu m’utuco gin maeni wacu kumae, Eyo, abino pio. Amen. Bin Rwoth Yesu. 21Bero pa Rwoth Yesu ubed ku jumaleng’. Amen.

will be added

X\