Revelation 21

1Man aneno polo ma nyen ku ng’om de ma nyen: kum polo ma kwong’a ku ng’om de ma kwong’a gikadhu woko; man nam umbe kendo. 2Man aneno adhura ma leng’, Yerusalem ma nyen, m’ebeloro m’eai kud i polo ba Mungu, ma juyike calu mugole m’urukre ni nico pare. 3Man awinjo dwal ma dit uai i komker uwacu kumae, Nen, hema pa Mungu ni karacelo ku dhanu, man ebibedo kugi, man gibibedo dhanu pare man Mungu ku kite bibedo karacelo kugi, ni Mungu migi: 4man ebiyweyo piwang’ pet kud i wang’gi; man tho bibedo nuti kendo ngo; kadok can, kadi ywak, kadok remokum de bibedo nuti kendo ngo: gin ma kwong’a daru kadhu. 5Man ng’atu m’ubedo wi komker uwacu kumae, Nen, adwoko gin ceke nyen. Man ewacu kumae, Kieu: kum lembe maeni gi mandha gin andha de. 6Man ewacu ira kumae, Gidaru timbri. An a Alfa kud Omega, ma thangambere ku kajik. Abimio kum pi ma dhenyni mi kwo k’abamba ni ng’atu ma rieupi nege. 7Ng’atu m’uloyo ebilagu gin maeni; man abibedo Mungu pare, man ebibedo woda. 8Ento ni julworo, ku ju ma gi juyic ungo, ku ju ma gi gin mir adegi, ku juneg nek, ku weg tarwang’, ku weg jogi, ku ju ma rwo ni ayi gin m’acwia, ku jundra ceke bende, maka migi bibedo i nam ma wang’ ku mac ku muganga bende; ma en e tho mir arionde. 9Man acel ma kind malaika abiro ma gi weg tabu abiro, ma ginur ku masendi abiro macen ubino; man eweco kuda, ewacu kumae, Bin kue, abinyutho iri mugole, ma dhaku pa Nyathi Rombo. 10Man eyeya i Tipo ba got ma dit ma wiu, man enyutho ira adhura ma leng’ Yerusalem, m’uaiki polo ba Mungu ubeloro piny, 11m’ebedo ku dwong’ pa Mungu: derne calu mi kidi ma pire tek hai, calu en e kidi ma jukite ma pil pil, ma leng’ calu kidi ma ie pelele: 12ma gang’ne nuti ma dit ma wiu; dhugolane apar wi ario, man malaika apar wi ario ni kum dhugolane; man nying’ ugore i wie, ma gi nying’ suru apar wi ario mi nyithindho pa Israel: 13yo nyangu dhugola adek; yor ariwa ma malu dhugola adek; man yor ariwa ma piny dhugola adek; man yo reto de dhugola adek. 14Man the gang’ mir adhurane apar wi ario, man i wigi nying’ apar wi ario mi jukwenda apar wi ario pa Nyathi Rombo. 15E ng’atu m’uweco kuda ebedo kud undodi mi mola ma kwar ni jampor m’eporo ko adhurane, ku dhugolane de, ku gang’ne de. 16Man gund adhurane ang’wen rom rom, kaborne rom ku kalacne: man eporo adhurane kud undodi, ungolo rubanga adek: kaborne ku kalacne ku kadongone de girom rom. 17Man eporo gang’ne, bol dak acel ku pier ang’wen wi ang’wen, calku jampor mi dhanu, thelembene, pa malaika. 18Jamgom mi gang’ne en e kidi ma jukite ma pilpil: man adhurane en e mola ma kwar ma leng’, calu kieu ma leng’. 19The gang’ mir adhurane bedo aruka ku kidi ma pire tek ma kwonde ceke tung’ tung’. There ma kwong’ane en e kidi ma jukite ma pil pil; mir arionde, kidi ma tek ma ie nen uluga: mir adege, kidi ma tar ma kume thumo; mir ang’wende, kidi ma calu lum; 20mir abije, kidi ma foo; mir abusiende, kidi ma kwar ngbo; mir abirone, kidi ma ie nen ma rieny calu mola ma kwar; mir aborane, kidi ma col calu nam; mir abung’wende, kidi ma ie nen ma calu lum; mir apaje, kidi m’uluga ma fraa; mir apar wi acende, kidi m’uluga ma furafura; mir apar wi arionde, kidi ma pilipili. 21Man dhugolane apar wi ario gi kidi apar wi ario ma i upal; dhugolane kubang’gi kubang’gi nzu en e mi kidi acel ma i upal: man gengi mir adhurane en e mola ma kwar ma leng’, calu kieu ma ie nen. 22Man aneno hekalu i ie ngo: kum Rwoth Mungu ma Jategokpo, ku Nyathi Rombo de, gi hekalune. 23Man adhurane can ceng’ umbe i kume, kadok mi dwi de, nia urieny i wie: kum dwong’ pa Mungu care, man thalane en e Nyathi Rombo. 24Man thek biwotho i derne: man ju m’ubimo m’i ng’om bikelo dwong’ migi i ie. 25Man dhugolane bibedo acika ki ngo ku dieceng’ (kum diewor bibedo umbe keca): 26man gibikelo dwong’ man yung mi thek i ie: 27man gin moko m’ucido, kadi ng’atu ma timo gin mir adegi ku ndra de, bimondo i ie ki ngo: ndhu ju ma jugorogi i kitabu mi kwo pa Nyathi Rombo kendgi.

will be added

X\