Revelation 20

1Man aneno malaika ai i polo loro piny, m’ebedo ku kifungula mi longro ma there mbe ku nyoro ma dit de i cinge. 2Man emaku ng’ec, ma thwol ma con, ma en e Wonabali ku Jok, man etwie mi rundi rubanga acel, 3gibole de i longro ma there mbe, e giciko dhoge, man gimwono ayi i wie, kara kud ebomb thek kendo, cil ma rundi rubanga thum ko: yo ng’ei maeni jubikogonye be mi nindo ma nyanok. 4Man aneno komker, ku ju m’ujany i wigi, man pokolembe mire igi: man aneno kwo mi ju ma juthumo wigi pi lembatuca pa Yesu, man pi lembe pa Mungu, man wagi ju ma girwo ngo ni yedi, kadok ni ayine, ma gijolo kiedo ngo ternyimgi kud i cing’gi de; man gibedo, gibimo de giku Kristugi rundi rubanga acel. 5Dong’ ju m’utho gikwo ngo cil ma rundi rubanga acel uthum ko. Maeni en e cer ma kwong’ane. 6Ng’atu m’ubedo ku maka pare i cer ma kwong’ane mugisa kwanye e leng’ de: tho mir arionde mbe ku tego wi ju maeni; endre gibibedo julam pa Mungu ku pa Kristu, man gibibimo gikugi rundi rubanga acel. 7Man ka rundi rubanga acel uthum, jubigonyo Jok kud i kol pare, 8man ebiwok woko nibombo thek ma gini i gund ng’om ang’wen, Gog ku Magog, nicokogi karacelo mi lwiny: welgi va kwio ma dhu nam. 9Man giidho malu gicori wi kalac mi ng’om, man gitieko kagonjo mi jumaleng’, kud adhura ma jumaru de: e mac uai i polo loro piny, man ecamugi. 10Man wonabali m’ubombogi jubole i nammac ku muganga bende, ka ma yedi ku jabila mi ndra bende gini ie; man jubimio igi ndiba dieceng’ ku diewor rondo ku rondo. 11Man aneno komker ma tar m’ulwar, ku ng’atu m’ujany i wie de, man ng’om ku polo de giringo wang’e; man kakagi nwangre ngo igi. 12Man aneno ju m’utho, ju ma dongo ku ju ma thindho, ma gicungo wang’ komker; e juyabu kitabu: man juyabu kitabu mange de, ma en e kitabu mi kwo: man jupoko lembe mi ju m’utho ku gin m’ugore i kitabune, calku tic migi. 13Man nam uwodho ju m’utho ma ni i ie: man tho ku Hadeya de giwodho ju m’utho ma ni i igi: man jupoko lembe migi kubang’gi kubang’gi ng’atuman calku tic pare. 14Man tho ku Hadeya de jubayugi i nammac. Maeni en e tho mir arionde, ma en e nammac. 15Man tek ng’atu moko junwang’u nyinge kugore i kitabu mi kwo ngo, jubaye i nammac.

will be added

X\