Revelation 19

1Yo ng’ei gin maeni awinjo dwal calu en e dwal ma dit mir udul dhanu ma dit i polo, m’uwacu kumae, Haleluya; Both, man dwong’, ku tego, gi pa Mungu mwa: 2kum pokolembe pare gin andha man pwe; kum epoko lembe pa dhaku ma won asara ma dit, en m’enyotho ng’om ku tarwang’ pare, man eculo wang’ rimb jumiru pare i cinge. 3Man wang’ arionde giwacu kumae, Haleluya. Man yiro pare idho malu rondo ku rondo. 4Man judongo pier ario wi ang’wen ku yedi ma kwo ang’wen girum man girwo ni Mungu m’ubedo wi komker, giwacu kumae, Amen; Haleluya. 5Man dwal uai i komker, uwacu kumae, Wupak Mungu mwa, wu jumiru pare ceke, wu ju m’ulwore, ma thindho ku ma dongo. 6Man awinjo calu en e dwal mir udul dhanu ma dit, man calu dwand pi dupa, man calu dwand morpolo ma tek m’uwacu kumae, Haleluya: kum Rwoth Mungu mwa, ma Jategokpo ubimo bim. 7Dong’ anyong’a negwa wabed ku mutoro ma dit de, man dong’ wamiu dwong’ ire: kum ambadha pa Nyathi Rombo wok, man dhaku pare daru yikre gire. 8Man emire ire nia eronjre gire ku bongu ma nwang’ ma nwe nwe, ma riang’ni, ma leng’ de: kum bongu ma nwang’ ma nwe nwe en e tic mi bedopwe mi jumaleng’. 9Man ewacu ira kumae, Kieu kumae, Mugisa ni ju ma julwong’ogi ni cemo mir uthieno mir ambadha pa Nyathi Rombo. Man ewacu ira kumae, Maeni lemandha pa Mungu. 10Man apodho piny the tiende nirwo ire. Man ewacu ira kumae, Kud itim kumeno: an a jatic wedu wakudi ku juwedu de ma gibedo ku lembatuca pa Yesu: rwo ni Mungu: kum lembatuca pa Yesu en e tipo mi lembila. 11Man aneno polo yabre; man nen, riuni ma tar, ku ng’atu m’ubedo i wie ma julwong’e Mandha man Andha; man i bedopwe epoko lembe man etimo lwiny. 12Man wang’e calu lebmac, man jamkermiwic dupa ni i wie; man ebedo ku nyinge m’ugore ma ng’atu moko mbe m’ung’eyo ndhu en gire. 13Man eronjre ku kendi ma juvong’o rimo i kume; ma nyinge julwong’o Lembe pa Mungu. 14Man njuru asikari m’i polo gilubo ng’eye ku wi riuni ma tar, ma gironjri ku bongu ma nwang’ ma nwe nwe, ma tar ma leng’ de. 15Man palamularu ma bith uwok kud i dhoge, kara egoi kudo thek: man ebibimogi kud uluth mi nyunyu: man ebinyono pany mi lak kwinyo pa Mungu, ma Jategokpo. 16Man ebedo ku nyinge m’ugore wi kendi pare man wi bambe kumae, UBIMO MIR UBIMO, MAN RWOTH MI RWODHI. 17Man aneno malaika acel m’ucungo i ceng’; man ekok ku dwande ma dit, m’ewacu ni winyo ceke m’uringo kor polo kumae, Wubin wucokru karacelo ni cemo ma dwong’ mir uthieno pa Mungu; 18kara wucam ring ju ma gin ubimo, man ring ju ma gi jego, man ring dhanu ma dongo, man ring riuni ku mi ju m’ubedo i wigi, ku ring dhanu ceke, paker ku jumiru bende, ju ma thindho ku ju ma dongo de. 19Man aneno yedi, ku ju ma gin ubimo m’i ng’om de, ku njuru asikari migi, ma gicokri karacelo nitimo lwiny kum ng’atu m’ubedo wi riuni, man kum njuru asikari pare bende. 20E jumaku yedine, ku jabila mi ndra bende karacelo kude m’etimo giranyutha i wang’e, m’ebombo kudo ju m’ujolo kiedo pa yedi man ju m’urwo ni ayine de: gin ario jubologi ma kwo i nammac ma wang’ ku muganga: 21donge m’udong’ de junego ku palamularu pa ng’atu m’ubedo wi riuni, en e palamularu m’uwok kud i dhoge: man winyo ceke giyeng’ ku ringgi.

will be added

X\