Revelation 18

1Yo ng’ei gin maeni malaika mange ai i polo loro piny, m’e won ng’ol ma dit; man ng’om ucare ku der mi dwong’ pare. 2Man ekok ku dwande ma tek, ewacu kumae, Babeli ma dit, upodho, upodho, man edoko ni kabedo mi pajogi, man kol mi tipo m’ucido kubang’gi nzu, man kol mi winyo m’ucido ma judagu kubang’gi nzu. 3Kum ni kum pigulok mi kwinyo mi tarwang’ pare thek ceke gipodho; man ju m’ubimo m’i ng’om gitimo tarwang’ kude, man jukuloka m’i ng’om gidoko julonyo ni kum tego mi jambayunga pare. 4Man awinjo dwal mange ai i polo, wacu kumae, Wuwoki, dhanu para, wuwok kud i ie, kara kud wuribru ki ku dubo pare, man kara kud wujol kum masendi pare: 5kum dubo pare tundo cil i polo, man Mungu poi pi camuco pare. 6Wumi ire cil calu emio, man wumi ire wang’ ario calku tic pare: i kikombe m’ejebo i ie, jeb ire wang’ ario. 7Wumi ire ndiba ku can kumeni ma rom ku yung m’eyungre ko, man dhetho mi yeny ma ie yenyo: kum ewacu yo i adundene kumae, Abedo ubimo ma dhaku, man an a dhaku ma cwara tho ngo, man abineno can ki ngo. 8Ka kumeno i ceng’ acel masendi pare biwok, tho, ku can, man ndru; man ebiwang’ kot ku mac; kum Rwoth Mungu m’upoko lembe pare e tek. 9Man ju m’ubimo m’i ng’om, m’utimo tarwang’ kude m’ubedo i ayunga ceke de gikugi, gibiywak ku goyo nduru i wie, ka gineno yiro mi wang’ m’ewang’ ko,’ 10ma gicungo ko ku bor ni lworo mi ndiba pare, ma giwacu ko kumae, Can, can, adhura ma dwong’, Babeli, adhura ma tek! kum i saa acel pokolembe peri wok. 11Man jukuloka m’i ng’om giywak man can unegogi i kume, kum ng’atu moko mbe m’ung’iewo jambkuloka migi kendo; 12jambkuloka mi mola ma kwar, ku mi mola ma tar, man kidi ma pire tek, man kidi ma i upal, ku bongu ma nwang’ ma nwe nwe, man uluga, man bongu mir ukoko, man kwar ngbo; ku yen ceke ma ng’wice ng’ar, man agulu ceke kubang’gi mi lakliec, man agulu ceke kubang’gi ma jutimo ku yen ma pire tek, man mi mola, ku nyunyu man kidi ma tar de; 13kud apoka yen ma lim lim, ku gin ma jwa jwa, kud udok ma ng’wice ng’ar ma juwang’u, ku mo mir awira, ku mo ma ng’wice ng’ar, ku pigulok, man mo ma acama, ku mogo ma yom, ku nganu, ku dhiang’, man rombe; man ku kuloka mi riuni ku magali ma tiende ario ku dhanu ma ang’ iewa; ku kwo mi dhanu. 14Man nying’ ma pidoic peri yenyo dit gipiei iri, man gin ceke ma naka gi jambruko ku jambayunga de girwinyo iri, e jubinwang’ugi kendo ki ngo. 15Jukuloka mi ginduni, ma gilony ni kume, gibicungo ku bor ni lworo mi ndiba pare, ma giywak can de negogi; 16ma giwacu ko kumae, Can, can, adhura ma dwong’, en m’eronjre ku bongu ma nwang’ ma nwe nwe kud uluga man kwar ngbo, man m’erukre ku mola ma kwar ku kidi ma pire tek ku kidi ma i upal! 17kum i saa acel thwo lonyo ma rokeni ngi juketho edong’ lwe. Man weg combo ceke kubang’gi, ku dhanu ceke kubang’gi m’uwotho ka moko ku wi pi, ku jutic mi combo, ku dhanu ceke ma ginwang’u kuloka migi ni kum nam, gicungo ku bor, 18man gikok ka gineno yiro mi wang’ m’ewang’ ko, giwacu kumae, Adhura ma nedi ma calu thwon adhura maeni? 19Man giketho utur i wigi, gikok kumae, ku ywak man can, giwacu, Can, can, adhura ma dit, ma i ie dhanu ceke ma gibedo ku combo migi i pi juketho gilony ni kum lonyo pare! kum i saa acel juketho edong’ lwe. 20Anyong’a negwu i kume, in i polo, ku wun wu jumaleng’, man wu jukwenda, ku wu jubila; kum Mungu poko lembe mu i wie. 21Man malaika ma tek uting’o kidi calu en e pom ma dit man ebole i nam, ewacu kumae, Babeli, adhura ma dit bipodho ku podho ma mbwom kumeni, jubiredhe piny, man ebinwangre kendo ki ngo. 22Man dwand jubodlio mir adungu ku jubodho mi wer man jubodho mir ungbalu man jubodho mir agwara gibiwinjri kendo ki ngo ii; man jabodho, mi tic ceke ma tek nuti, gibinwangri ii ki ngo; man ba dwand pom biwinjre kendo ii ki ngo; 23man der mi thala birieny kendo ki ngo ii; man ba dwand won ambadha ku pa mugole de biwinjre kendo ki ngo ii; kum jukuloka peri naka gi juker m’i ng’om; kum thek ceke bombre ni kum ajoga peri. 24Man i ie junwang’u rimo mi jubila man mi jumaleng’, man mi ceke ma junego wi ng’om.

will be added

X\