Revelation 17

1Man acel m’i kind malaika abiro ma weg tabu abiro ubino, uweco kuda, ewacu kumae, Bin kue, abinyutho iri pokolembe pa dhaku ma won asara ma dit m’ubedo wi pi dupa; 2m’ubimo m’i ng’om gitimo kugi tarwang’, man ju m’ubedo wi ng’om jumerogi ku pigulok mi tarwang’ pare. 3Man etera cen i Tipo cil i yamba: man aneno dhaku m’ubedo wi yedi ma kwar ngbo, m’epong’ ku nying’ mir acidi, ma wie abiro tunge ke apar. 4Man dhakune ronjre uluga man kwar ngbo, m’erukre de ku mola ma kwar ku kidi ma pire tek man kidi ma i upal, m’emaku kikombe mi mola ma kwar i cinge ma gin mir adegi pong’ i ie, cil gin m’ucido mi tarwang’ pare, 5man nying’ ugore ternyime kumae, GIRAMUNG’A BABELI MA DIT, MEG WEG ASARA MAN MI GIN MIR ADEGI M’I NG’OM. 6Man aneno dhakune mer ku rimb jumaleng’, ku rimb ju m’utho pi Yesu. Man kan anene, ia wang’ lii ku wang’nic ma dit. 7Man malaika wacu ira kumae, Ii wang’ lii nedi? Abiyero iri pi giramung’a pa dhakune, man pi yedi m’uyeye, ma wie abiro tunge ke apar. 8Yedi m’ineno yang’ enuti, man embe: man edhingo ai i longro ma there mbe, m’ecidho ko i kanyothri. E ju m’ubedo wi ng’om igi biwang’ lii, gi ju ma nying’gi kugore ngo i kitabu mi kwo ugambre i thek ma ng’om uthekre ko, ka gineno yedi, maram yang’ enuti, man embe, man ebibino. 9Maeni pidoic ma won rieko. Wic abiro gi gudi abiro, ma dhakune bedo i wie: 10man gin ubimo abiro; abic upodho, acel nuti, mange ke fodi uwok ungo; man kan ewok, ebikobedo nyanindo moko be. 11Man yedi ma naka nuti, ma dong’ embe e, en nini bende en e mir aborane, man en e kind abiro man ecidho i kanyothri. 12Man tung apar m’ineno gin ubimo apar ma fodi gikujolo ker ungo; endre gijolo ng’ol calu ubimo, karacelo ku yedi, kind saa acel. 13Joni gibedo ku pidoic acel, man gimio tego migi ku ng’ol migi de ni yedi. 14Joni gibitimo lwiny kum Nyathi Rombo, Nyathi Rombo de biloyogi, kum en e Rwoth mi rwodhi, man Ubimo mir ubimo; man ju ma gibedo gikugi de gibiloyo gikugi, ma gi ju ma julwong’ogi jugoyo wigi de gi mandha de. 15Man ewacu ira kumae, Pi m’ineno, ka ma dhaku ma won asara bedo ca, en e kodhidhanu, man udul dhanu, man thek, man dhok. 16Man tung apar m’ineno, ku yedi, maeni bidagu dhaku ma won asara, man gibiweke lwe man muneru, man gibicamu ring’kume, man gibiwang’e pet ku mac. 17Kum Mungu ketho i adundegi nia gitim pidoie, man gidok ma pidoigi acel, man gimi ker migi ni yedi, cii ma lembe pa Mungu timbre ko kakare. 18Man dhakune m’ineno en e adhura ma dit, m’ebimo wi ubimo m’i ng’om.

will be added

X\