Revelation 16

1Man awinjo dwal ma dit uai kud i hekalu, uweco ni malaika abiro kumae, Wucidhi, wukonj tabu abiro mi kwinyo pa Mungu i ng’om. 2Man ma kwong’ane cidho, man ekonjo tabu pare i ng’om; man edoko ni vur ma rac ma remo dit wi dhanu ma weg kiedo pa yedi ma girwo ni ayine de. 3Man mir arionde konjo tabu pare i nam; e edoko ni rimo calu mir avu dhanu; man ku ba ng’eyong’ec ceke mi kwo githo, cil gin ma ni i nam. 4Man mir adege konjo tabu pare i kulo man wi pi ma dhenyni; man edoko ni rimo. 5Man awinjo malaika mi pi wacu kumae, In i pwe, in m’i nuti man yang’ de inuti, in m’i Ng’atu Maleng’, kum ipoko lembe kumeno: 6kum githwogo rimb jumaleng’ ku mi jubila de, imio igi rimo gimadhi: eromo kugi de. 7Man awinjo pemblam uwacu kumae, Eyo, E Rwoth Mungu, ma Jategokpo, lembapoka peri en e andha pwe de. 8Man mir ang’wende konjo tabu pare wi ceng’; man jumio ire ewang’ ko dhanu ku mac. 9E dhanu wang’ ku lietho ma dit: man gicido nying’ Mungu m’e won tego wi masendi maeni; man giloko cwinygi ngo nimie dwong’. 10Man mir ahije konjo tabu pare wi komker pa yedi; e ker pare cido bii; man gikayu lebgi kum remokum, 11man gicido Mungu m’i polo kum remokum migi ku vur migi; man giloko cwinygi de ngo kum tic migi. 12Man mir abusiende konjo tabu pare wi kulo ma dit, en e kulo Eufrate; e pige dwono kau, kara yo yikre ni ubimo m’uai yo nyangu. 13Man aneno tipo m’ucido adek ma calu ungwal uai kud i dhu ng’ec, man i dhu yedi, man i dhu jabila mi ndra: 14kum gi tipo pajogi, ma gibetimo giranyutha; ma gicidho woko bang’ ubimo m’i ng’om ngung’, nicokogi karacelo ni lwiny mi ceng’ ma dwong’ pa Mungu, ma Jategokpo. 15(Nen, abino va jakwo. Mugisa ni ng’atu m’ukio, m’ugwoko kendi pare de, kara kud ewoth muneru, man ginen lewic pare.) 16Man gicokogi karacelo i ka ma julwong’o ku dhu Juebrania Armagedon. 17Man mir abirone konjo tabu pare i lietho; e dwal ma dit uai i hekalu, kud i komker, uwacu kumae, Etimbre: 18e lukoth, ku dwal, ku morpolo ginuti; man digidi ma dit de yengre, yau digidi ma dit ma kumeno fodi uwok ungo i ng’om por ma dhanu gamu bedo ko i ng’om ngi, digidi ma tek kumeni ngi. 19Man adhura ma dwong’ upokre ni ng’ete adek, man adhura mi thek upodho; man Babeli ma dit jupoi pire i wang’ Mungu, ya jumi ire kikombe mi pigulok mi kwinyo mi kwiny pare. 20Man ku ba cula ceke giringo woko, man gudi de nwangre kendo ngo. 21Man pei ma dit, ku ba pei ceke pekne va lelo, uai i polo loro piny wi dhanu: man dhanu gicido Mungu kum masendi mi pei; kum masendine e dit apila.

will be added

X\