Revelation 14

1E aneno, man nen, Nyathi Rombo cungo wi got Sayuni, ku dhanu rubanga dak acel ku pier ang’wen wi ang’wen, ma nyinge, ku nying Won de, ugore ternyimgi. 2Man awinjo dwal m’uai i polo, pami dwand pi dupa, man calu dwand morpolo ma dit: man dwalne m’awinjo ubedo calu jubodho m’ubegoyo adungu migi: 3man giwero calu en e wer ma nyen i wang’ komker, man i wang’ yedi ang’wen ma kwo ku judongo: man ng’atu moko mbe ma copo ng’eyo weje ndhu dhanu rubanga dak acel ku pier ang’wen wi ang’wen, ma gi ju ma jung’iewogi kud i ng’om. 4Joni gi ju ma gicido ngo ku mon; kum gi ju ma sumba. Joni gi ju ma gilubo Nyathi Rombo ku ba ka m’ecidho i ie ceke. Joni jung’iewogi kud i kind dhanu, ya gibed ni landu mwoka ni Mungu man ni Nyathi Rombo. 5Man junwang’u ndra ngo i dhoggi: lembe de mbe i wigi. 6Man aneno malaika mange m’uberingo i kor polo, m’e won lembanyong’a ma nja m’eyero ni ju m’ubedo wi ng’om, man ni thek ceke ku suru ku dhok man dhanu; 7man ewacu ku dwal ma dit, Wulwor Mungu, man wumie dwong’: kum saa mi pokolembe pare wok: man wurwo ni ng’atu m’ucwio polo ku ng’om ku nam ku kulo ma dhenyni bende. 8Man mange, malaika mir arionde, m’ulubo ng’eye, ewacu kumae, Babeli ma dit, upodho, upodho m’eketho thek ceke gimadhu pigulok mi kwinyo mi tarwang’ pare. 9Man malaika mange, mir adege, ulubo ng’eigi, m’ewacu ku dwal ma dit kumae, Tek ng’atu moko rwo ni yedi kud ayine de, man ejolo kiedo ternyime kadi i cinge, 10en bende ebimadhu kum pigulok mi kwinyo pa Mungu, m’ubedo ayika m’ajeba ngo i kikombe mi ng’ecwiny pare; man jubimie ndiba ma ku mac man muganga i wang’ malaika maleng’, man i wang’ Nyathi Rombo: 11man yiro mi ndiba migi idho malu rondo ku rondo; man yom umbe igi dieceng’ ku diewor, gi ju m’urwo ni yedi kud ayine de, ku ju m’ujolo kiedo mi nyinge. 12Keni en e twiocwiny mi jumaleng’, gi ju ma giworo lembang’ola pa Mungu, ku yioyic pa Yesu. 13Man awinjo dwal m’uai i polo wacu kumae, Kieu kumae, Mugisa ni ju m’utho m’utho i Rwoth ugambre kawono: eyo, Tipo wacu, kara giyom ni tic migi ma gimuli kudo; kum tic migi lubogi. 14E aneno, man nen, afuru ma tar; man aneno ng’atu m’ubedo wi afurune calu wod dhanu, ma jamkermiwic mi mola ma kwar ni i wie, man uligu ma bith ni i cinge. 15Man malaika mange ai i hekalu, ekok ku dwande ma dit ni ng’atu m’ubedo wi afuru kumae, Or uligu peri, man inyar: kum saa mi nyar uwok; kum mwoka mi ng’om ucek hai. 16Man ng’atu m’ubedo wi afuru bolo uligu pare i ng’om; man ng’om unyare. 17Man malaika mange ai i hekalu m’i polo, en bende e won uligu ma bith. 18Malaika mange ai kud i pemblam, en e ng’atu ma won tego kum mac; man elwong’o ku dwal ma dit ni ng’atu ma won uligu ma bith, ewacu kumae, Or uligu peri ma bith, man icok njuru nying ulok m’i ng’om; kum nyinge poicek. 19Man malaika bolo uligu pare i ng’om, man ecoko nying ulok m’i ng’om, man ebole i pany pigulok, pany ma dit mi pigulok, mi kwinyo pa Mungu. 20Man pany pigulok juyoke woko ng’ei adhura, man rimo ai kud i pany pigulok, cil ni utwindi mi riuni, cil ungolo dak ang’wen.

will be added

X\