Revelation 11

1Man jumio ira undodi ma va uluth: man acel uwacu kumae, Ai, ipor hekalu pa Mungu, ku pemblam, ku ju m’urwo i ie. 2Man ponde ma yo woko kum hekalu weke woko, kud ipore; kum jumie ni thek: man gibinyono adhura ma leng’ dwi pier ang’wen wi ario. 3Man abimio ni jumulembe para ario, man gibiewo ceng’ rubanga acel ku dak ario ku pier abusiel, ma gikendo gonia. 4Maeni gi yen mir ulemo ario ku thethala ario, m’ucungo wang’ Rwoth mi ng’om. 5Man tek ng’atu moko yenyo etimgi rac, mac ai kud i dhoggi man ecamu jukwojgi; man tek ng’atu moko biyenyo etimgi rac, ebikonegre kumeno be. 6Joni gi weg tego ma giciko ko polo, kara koth kud ucwi cil i ceng’ mi lembila migi: man gi weg tego wi pi ma giloko kogi ni rimo, ma gigoyo ko ng’om de ku masendi kubang’gi nzu, ku ba nindo ceke ma giyenyo. 7Man ka gibidaru lembatuca migi, yedi m’uai i longro ma there mbe ebitimo lwiny kugi, ebiloyogi de, man ebinegogi. 8Man avujgi vuto i gengi mir adhura ma dit, ma julwong’o Sodom ma ku tipo, man Misiri, ka ma juguro ie Rwoth migi bende. 9Man dhanu m’uai i kind kodhidhanu kud i suru ku dhok man thek gineno avujgi ceng’ adek ku ng’ete, man giyio ngo nia juyik avujgi i odliel. 10Man ju m’ubedo wi ng’om anyong’a negogi i kumgi, man giketho mutoro; man gibioro giramia man ni wadi man ni wadi; kum jubila ario maeni gimio ndiba ni ju m’ubedo wi ng’om. 11Man yo ng’ei ceng’ adek ku ng’ete e lietho mi kwo m’uai ba Mungu mondo i igi, man gicungo wi tiendgi; e lworo ma dit upodho wi ju m’unenogi. 12Man giwinjo dwal ma dit m’uai i polo m’uwacu igi kumae, Wnidh kue. Man giidho i polo ku i afuru; man jukwojgi ginenogi. 13Man i saa maeno digidi ma dit uyengre, man theng adhura mir apaje podho; man dhanu rubanga abiro tho ku digidine: e dong’ dhanu m’udong’ lworo makugi, man gimio dwong’ ni Mungu mi polo. 14Can mir arionde kadhu: nen, can mir adege bino pio. 15Man malaika mir abirone kudho agwara; m’ulubo maeno dwal ma dit i polo, man giwacu kumae, Ker m’i ng’om udoko ker pa Rwoth mwa, man pa Kristu pare: man ebibimo bim rondo ku rondo. 16Man judongo pier ario wi ang’wen, m’ubedo wang’ Mungu wi komker migi, gipodho arieba wang’gi man girwo ni Mungu, 17giwacu kumae, Wafoi, E Rwoth Mungu, ma Jategokpo, m’inuti man yang’ inuti; kum igamu tego peri ma dit, man ibimo bim. 18Man kwinyo nego thek man kwinyo peri wok, ku nindo ma jupoko ie lembe mi ju m’utho, man nindo ma jumio ie sukulia ni jumiru peri ma jubila, man ni jumaleng’, man ni ju m’ulworo nyingi, ju ma thindho ku ju ma dongo; man ninyotho ju m’unyotho ng’om. 19Man juyabu hekalu pa Mungu ma ni i polo; man juneno sanduk mi lembariba pare i hekalu pare; man m’ulubo maeno lukoth, man dwal, ku morpolo, man digidi, ku pei ma dit.

will be added

X\