Revelation 10

1Man aneno malaika mange ma tek uloro kud i polo, m’eronjre kud afuru; man dhanyu ni i wie, wang’e de calu ceng’, man tiende va mbegi mi mac; 2man emaku nyathi kitabu m’ubedo ayaba i cinge: man eketho tiende ma yor acwic wi nam, ma yor acam ke wi ng’om; 3man ekok ku dwal ma dit, calu umvor m’ubeywak: man kan ekok, e morpolo abiro weco ku dwandgi. 4Man ka morpolo abiro weco ku dwandgi, ayenyo nik agor: man awinjo dwal uai i polo wacu kumae, Mwon ayi kum lembe ma morpolo abiro wacu, kud igorgi agora. 5Man malaika m’aneno cungo wi nam ku wi ng’om de ting’o cinge ma yor acwic malu yor i polo, 6man ekwong’o kwong’ ku ng’atu ma bedo rondo ku rondo, m’ecwio polo ku giki m’i ie, ku ng’om man giki m’i ie, ku nam de man giki m’i ie, ya galu bidong’ bedo nuti kendo ngo: 7ento i ceng’ mi dwand malaika mir abirone, kinde m’eyenyo ekudh agwara, e giramung’a pa Mungu lund uthum, calku lembanyong’a m’eyero ni jumiru pare ma jubila. 8Man dwal m’awinjo ai i polo, awinje kendo m’ebeweco kuda, man ewacu kumae, Cidhi, ting’ kitabu m’ubedo ayaba i cing’ malaika m’ucungo wi nam ku wi ng’om de. 9Man acidho ba malaika, awacu ire nia emi ira nyathi kitabu. Man ewacu ira kumae, Ting’e, came; man ebidwoko ii kec, mana i dhogi re ebibedo lim lim va kic. 10Man agamu nyathi kitabu kud i cing’ malaika, man acame; man ebedo lim lim i dhoga va kic: e kan adaru came ci, ia doko kec. 11Man giwacu ira kumae, Ibikoewo kendo be wi kodhidhanu dupa ku thek man dhok man ju m’ubimo.

will be added

X\