Revelation 1

1Lembanyutha pa Yesu Kristu, ma Mungu mio ire enyuth ni jumiru pare, cil gin ma fodi nyanok bikotimbre be: man eoro enyuthe ku malaika pare ni jatic pare Yohana; 2m’enyutho pi lembe pa Mungu, man pi lembatuca pa Yesu Kristu, cil gin ceke m’eneno. 3Mugisa ni ng’atu m’usomo, man ni ju m’uwinjo lembila maeni man ni ju m’uworo gin m’ugore i ie de: kum nindone dhingo ceng’ni. 4Yohana ni kanisa abiro ma tie i Asia: Bero iwu man kwiocwiny, m’uai ba ng’atu ma tie ma yang’ de etie m’ebibino de: m’uai de ba Tipo abiro ma gini nyim komker pare; 5m’uai de ba Yesu Kristu, ma en e jamulembe mandha, m’e kayu mi ju m’utho, man jabim mir ubimo m’i ng’om. Ire m’emaruwa, m’egonyowa kud i dubo mwa ku rimbe; 6man eketho wabed ni ker, julam ni Mungu pare man Won; dwong’ ku kero bed ire rondo ku rondo. Amen. 7Nen, ebino kud afuru; man ku ba wang’ ceke binene, ku ju m’ucobe de; man thek ceke m’i ng’om biywak ire. Cil kumeno. Amen. 8An a Alfa kud Omega, Rwoth Mungu wacu, ng’atu ma tie ma yang’ de etie m’ebibino bende, m’e Jategokpo. 9An a Yohana, m’umegwu man jarib wakudu i masendi ku ker ku twiocwiny ma gini i Yesu, nwang’u ani i cula ma julwong’o Patmo, kum lembe pa Mungu man kum lembatuca pa Yesu. 10Nwang’u ani i Tipo i ceng’ pa Rwoth, e awinjo dwal ma dit yor i ng’eya, calu mir agwara, 11m’uwacu kumae, Gin m’ineno, gor i kitabu man iore ba kanisa abiro: bang’ Efeso, ba Smurna de, ba Pergamo de, ba Thuatera de, ba Sardi de, ba Filadehia de, man ba Laodikia bende. 12Man alokra nineno dwal m’uweco kuda. E kan alokra aneno thethala mi mola ma kwar abiro; 13man i kind thethala ng’atu acel ma calu wod dhanu, m’eronyo bongu lot wi tiende, ma kore de bedo atwia ku foto mola ma kwar. 14Man wie ku yukwie de gi tar pu tar pami yuk rombo, tar calu pei; nying wang’e de va lebmac; 15tiende de calu mola m’urieny, calu ma tek juwang’u i uka; dwande de calu ba pi dupa. 16Man cero abiro ni i cinge ma yor acwic: man palamularu ma lake bith kun ku kun uwok kud i dhoge: wang’e de va ceng’ m’urieny i tego pare. 17E kan anene, apodho the tiende pami ng’atu m’utho. Man eketho cinge ma yor acwic i kuma, ewacu kumae, Lworo kud unegi; an a ma kwong’a ku ma cen de, 18man ng’atu ma Kwo; an ma nwang’u atho, man nen, abedo kwo mi rondo ku rondo, man abedo ku kifungula mi tho man mi Hadeya. 19Ka kumeno kieu gin m’ineno man gin ma tie, ku gin ma bitimbre macen; 20giramung’a mi cero abiro m’ineno i cinga ma yor acwic, man mi thethala abiro mi mola ma kwar. Cero abirone gi malaika mi kanisa abiro: man thethala abirone gi kanisa abiro.

will be added

X\