Philippians 3

1Aha a, umego, anyong’a negwu i Rwoth. Goro iwu ma calku ma kwong’a, eola ngo, ento e ber iwu. 2Wubed ku weng’wu kum gwogi, wubed ku weng’wu kum jutic ma rac, wubed ku weng’wu kum ju ma thumo kum: 3kum wan wa weg yaa, ma warwo ku Tipo pa Mungu, e walula i Kristu Yesu, man wageno mwa kum ungo: 4nwang’u an nini e m’acopo geno cli i kum: tek ng’atu mange ie wacu ya egen kum, nwang’u an e m’asagu: 5jutimo yaa i kuma i ceng’ mir aborane, ma a nyakwar Israel, mi suru pa Benyamin, Jaebrania mi Juebrania; pi lembe mi cik, a Jafarisayo; 6pir ava tic ke, anyayu ragedo kum kanisa; pi bedopwe ma ni i cik ke, junwang’a ma lembe mbe i wia. 7Ento giki ma naka gi kuloka ira, maeni akwanugi ni gin m’uoi mananu kum Kristu. 8Eyo andha, man akwanu gin ceke ni gin m’uoi mananu kum bero mi ng’eyong’ec pa Kristu Yesu ma Rwoth para: gin ceke oi mananu ira pire, man akwanugi ni usabu kende, kara anwang’ Kristu, 9man junwang’a i ie, m’abedo ku bedopwe para an ungo, cil maeno ma mi cik, ento maeno ma en e mi yioyic pa Kristu re, bedopwe m’uai ba Mungu ni kum yioyic: 10kara ang’eye, ku tego mi cer m’ecer ko, ku ripocwiny mi sendri pare, m’abedo ko ni ayi tho pare; 11tek acopo tundo kum cer ma kind ju m’utho ku yo moko. 12Calu m’adaru nwang’u ngo, kadi judaru dwoka ndhu cu de ngo: ento abecikucwala, tek kuno nyo acopo maku maeca ma Kristu Yesu bende maka ni kume. 13Umego, fodi akwandra gira ngo ya amaku: endre gin acel abetimo, ma wia wil kum gin ma ni i ng’eya, m’abecwala rut kum gin ma ni i wang’a de, 14abecwala kara atund kakara kum sukulia mi lwong’o ma malu pa Mungu ni kum Kristu Yesu. 15Ka kumeno, dong’ wan ma wang’wa teng’ni kum lembe, wabed ku pidoic ma kumeno: man ke tek wubedo ku pidoic ma tung’ i gin moko, e Mungu binyutho maeni bende iwu: 16mae kende, i maeni ma wadaru wok i ie, dong’ wawothu ku lembe ma calacel. 17Umego, wukwany bang’a karacelo, man wunen ju ma giwotho kumeni cil calu wan ma wa jupor i weng’wu. 18Kum dupa giwotho, m’adaru yero pigi iwu wang’ udul, kawono de ayero iwu cil ku ywak, nia gi judegi mi yen m’athara pa Kristu: 19ma kajik migi en e nyoth, usauigi e ma mungu migi, man kulula migi ni i lewic migi, ma giketho migi pidoigi kum gin m’i ng’om. 20Kum thuwa ni i polo; wabekuro Jalar bende m’ebiai kuca, en e Rwoth Yesu Kristu: 21m’ebiloko kumwa mi lewic udok nyen, kara edok pami kume mi dwong’ pare, calku tego m’ecopo bimo ko wi gin ceke i bang’e gire.

will be added

X\