Philippians 1

1Paolo ku Timoteo, jumiru pa Kristu Yesu, ni jumaleng’ ceke i Kristu Yesu ma gini i Filipi, ku julieu man jukony: 2Bero iwu ku kwiocwiny m’uai ba Mungu ma Wegwa man Rwoth Yesu Kristu. 3Afoyo Mungu para ku ba poi ceke m’apoi ko piwu, 4thiri thiri ku ba kwac para ceke m’akwayu piwu kpo akwayu ku mutoro, 5kum ribri mwa ma wakudu i rweyo lembanyong’a ma juboth ko ugambre i ceng’ ma kwong’a cil ku kawono de; 6m’ageno ko gin maeni nini, nia ng’atu m’utheko tic ma ber i iwu ebidare cu cil i ceng’ pa Yesu Kristu: 7cil calu ebedo cu ira ya ia pid piwu kewu ceke kumeno, kum wuni i adundena, kum, i kol para man i cungo kum lembanyong’a ma juboth ko ku ketho ebed ko tek de, wun ceke waribra wakudu i gamu bero. 8Kum Mungu en e jamulembe para, maram ava wu ceke betima dit i kisa ma ng’ic pa Kristu Yesu. 9Man aberwo, nia mer mu ucikusagu asaga i ng’eyong’ec ku riu ceke; 10kara wung’i gin ma ber ku gin ma rac de; kara wubed ma awondi mbe kudu ma kier de mbe kudu cil i ceng’ pa Kristu; 11ma nying’ bedopwe, ma ni kum Yesu Kristu, e m’uyeng’wu, ni dwong’ pa Mungu ku pak ma jupake ko. 12Nie ayenyo wung’ei, umego, nia giki m’uwok i kuma e etimbre nia lembanyong’a ma juboth ko urweire m’usagu ni kume; 13uketho kol para ma ni kum Kristu unyuthre cil i kind jukur ceke p’ubimo, man ni ju m’udong’ ceke bende; 14man nia umego kucel ma dit ma gini i Rwoth, ma ginwang’u tego ni kum kol para, gisagu ku tegocwinygi ku yero lembe pa Mungu ma lworo mbe i kumgi. 15Andha jumoko giyero pi Kristu cil ku kumira ku por bende; jumoko ke ku berocwinygi bende: 16ju maeni betime ni kum mer, ma ging’eyo ko nia juketha kara acung kum lembanyong’a ma juboth ko: 17ento ju maeno giyero pi Kristu mir athube, ku cwinygi m’umbe abombi ngo, ma igi pido ya ginyai can i kuma i kol para. 18Ka ke ang’o? mae kende nia i yo ceke, kadok kud abombi kadi ku lemandha, juyero pi Kristu; e i lembe nini anyong’a nega, eyo, man anyong’a binega. 19Kum ang’eyo nia maeni bilokre ni both para, ni kum kwac ma wukwayu man ke ku kony pa Tipo Yesu Kristu, 20calku kur para ma ku cwinya ceke ku genogen para, kara lewic kud unega ni kum gin moko, ento nia ku tegocwiny ceke, calu ma thiri thiri, e kawono bende Kristu bidoko dwong’ ni kuma, kadok ku kwo, kadi ku tho. 21Kum ira bedo kwo en e Kristu, tho ke en e kuloka. 22Ento tek bedo kwo i kum, tek maeni en e nying’ tic para, ka kumeno makani m’afoyo ang’eyo ngo. 23Ento lembe bewira i kindgi gin ario, ma ava ai benega kara wabed waku Kristu; kum eni e ber ma sagu dit: 24ento bedo i kum piwu cande negowu ma sagu. 25E ku genogen maeni, ang’eyo nia abidong’, eyo, man wabibedo karacelo wakudu ceke, kara wucikusagu asaga wubed ku mutoro de i yioyic; 26kara kulula mu usagre i Kristu Yesu ni kuma kum bedo para m’i kindwu kendo. 27Mae kende wuwek bedo mu urom lembanyong’a ma juboth ko pa Kristu: kara, kadok abino man anenowu kadi ambe de, awinj piwu, ya wucungo ki ku cwinywu acel, ku pidoic de acel ma wubeii ko aiia kum yioyic mi lembanyong’a ma juboth ko; 28ma ndiri ng’oi i iwu ngo kum weg amone kum gin moko: maeni giranyutha ma ngbeng’ igi mi nyoth ma junyothri ko, ento mi both mu, m’uai ba Mungu; 29kum emire iwu ni kum Kristu, ya wuyie ayia kende ngo, endre ya wusendru pire bende: 30ma wubeii aiia calu ma wuneno i ia, man kawono bende wuwinjo nia eni i ia.

will be added

X\