Matthew 7

1Kud wupok lembe, kara ku jupok lembe mu. 2Kum ku lembapoka ma wupoko, jubipoko ko lembe mu: man ku mukero ma wuporo ko, jubiporo ko iwu bende. 3Man ineno nyathi ng’ili m’i wang’ umeru nedi, endre ii pido pi riu ma ni i weng’i giri ngo? 4Kadi ibiwacu nenedi ni umeru kumae, Wek akab ng’ili woko kud i weng’i; man nen, riu ni i weng’i ini? 5In i won ambili, ilar ikab riu kud i weng’i in; e ibilund neno cu nikabu ng’iline kud i wang’ umeru. 6Gin ma leng’ kud wumi ni gwogi, kadok tigo mu de kud wubai wang’ kul, gimaru nyonogi the tiendgi, man gilokri giyecowu. 7Wukwai, man ebimire iwu; wuyeny, e wubinwang’u; wudwong’, e ebiyabre iwu: 8kum ku ba dhanu ma kwayu enwang’u; man ng’atu ma yenyo enyudo; ng’atu ma dwong’o de ebiyabre ire. 9Kadi ng’atu ma kani m’i kindwu, ma, tek wode bikwaye ku lungu kwen, ebimio ire kidi: 10kadi tek ekwaye ku rec, ebimio ire thwoli? 11Ka kumeno tek wun, ma wu rac, wung’eyo mio giramia ma ber ni nyithindho mu, Wegwu ma ni i polo bimio gin ma ber ma sagu ngo ni ju m’ukwaye? 12Ka kumeno gin ceke ma tek wuyenyo ya dhanu gitim iwu, e wun wutim igi kumeca: kum maeni en e cik ku jabila. 13Wumond ku dhugang’ ma diny: kum dhugang’ ubedo lac, yo de bedo her, ma tundo kanyoth, gi dupa de ma gimondo i ie kud i yoje. 14Kum dhugang’ ubedo diny, yo de bedo likili, ma tundo i kwo, ju ma lam de e ma ginwang’e. 15Wukuru ni jubila mi ndra, m’ubino i beng’wu ku kendi mi rombe, ento ku yor i igi gin urndi m’uwor. 16Wubing’eyogi ku nying’gi. Dhanu gipono nying ulok ku kum ukudho, kadi nying ulam de kum ucoki? 17Kumeno ku ba yen ceke ma ber ecego nyinge ma ber; ento yen ma rac ecego nyinge ma rac. 18Yen ma ber copo cego nyinge ma rac ungo, kadok yen ma rac de copo cego nyinge ma ber ungo. 19Ku ba yen ceke ma cego nyinge ma ber ungo jung’ole piny, jubole de i mac. 20Ka kumeno wubing’eyogi ni nying’gi. 21Ku ba dhanu nzu ma giwacu ira kumae, Rwoth, Rwoth, gibimondo i ker m’i polo ngo; ento ng’atu m’utimo yeny ma Vwa ma i polo yenyo re. 22Dupa biwacu ira i ceng’ maeca kumae, Rwoth, Rwoth, waewo ku nyingi ngo, wawodho pajogi de ngo ku nyingi, man ke tic ma tek de dupa watimo ku nyingi ngo? 23E abilund tuco igi kumae, Fodi ang’eyowu ki ngo: wuai kud i vuta, wu ju m’utimo camuco. 24Ka kumeno ku ba dhanu ceke m’uwinjo lem para maeni, etimogi de, jubipore ku jarieko, m’ugomo ot pare wi cana: 25koth de cwi, pi ma dit de coro ng’om, yamu de koto, e gidhongo ot maeno; ento epodho ngo: kum jugome wi cana. 26Man ku ba dhanu ceke m’uwinjo lem para maeni, etimogi de ngo, jubipore ku jakasegu, m’ugomo ot pare wi kwio: 27koth de cwi, pi de coro ng’om, yamu de koto, man gidhongo ot maeno; e erungre: rungrene de e dit. 28Man etimbre ka Yesu daru lembe maeni, i udul dhanu wang’ lii kum ponji pare: 29kum eponjogi calu ng’atu m’ubedo ku ng’ol, calu jugorcik migi de ngo.

will be added

X\