Matthew 6

1Wukuru ya kud wutim bedopwe mu i wang’ dhanu, kara ginengi: tek kumeno sukulia mu mbe ba Wegwu ma ni i polo. 2Ka kumeno kinde m’imio giramia kud ikudh agwara i weng’i, calu weg ambili timo i kacokri kud i gengi de, kara ginwang’ dwong’ ba dhanu. Awacu iwu andha kumae, Gidaru maku sukulia migi. 3Ento kan imio giramia, kud iwek cingi ma yor acam ung’ei gin ma cingi ma yor acwic ubetimo: 4kara mic m’imio bed nyaling’: man Wuru m’uneno ku ka ma nyaling’ ebimio sukulia iri. 5Man ka wurwo kud wubed calu weg ambili: kum gimaru rwo ma gicungo ko i kacokri ku i akarayo de, kara dhanu nengi. Awacu iwu andha kumae, Gidaru maku sukulia migi. 6Ento in, kan irwo, mond i kusika peri, e kan iciko dhugola i wii, irwo ni Wuru ma eni i ka ma nyalwe, Wuru de m’uneno ku ka ma nyalwe ebimio sukulia iri. 7Kan iberwo de kud iyer lembe acel wang’ udul kpa mananu, calu Thekdhanumange timo: kum giwacu nyo dwandgi biwinjre kum wec migi ma dit. 8Ka kumeno kud wubed calu jono: kum Wegwu ng’eyo gin ma cande benegowu, ma fodi wukupenje ngo. 9Ka kumeno wurwo kumae, Wegwa ma ni i polo, Nyingi bed leng’. 10Ker peri bin, Yeny m’iyenyo utimbre i ng’om calu etimbre i polo. 11Mi iwa tin kwen mwa ma ku ba rupiny. 12Wek iwa banja mwa, calu wan bende waweko mi jubanja mwa. 13Kud iterwa i abidhe ento ilarwa ni ng’atu ma rac. 14Kum tek wuweko kier mi dhanu, Wegwu ma ni i polo biweko mu bende. 15Ento tek wuweko kier mi dhanu ngo, kadok Wegwu de biweko kier mu ngo. 16Mange ke ka wuweko cam, kud wubed, calu dhanu ma weg ambili, ku weng’wu mi can: kum giranju wang’gi, kara dhanu ginen nia giweko cam. Andha awacu iwu kumae, Gidaru maku sukulia migi. 17Ento in, kan iweko cam, wir wi, man ilog weng’i; 18kara wekocam peri kud unen ni dhanu, ento ni Wuru ma ni i ka ma nyalwe: e Wuru, m’uneno ku ka ma nyalwe, ebimio sukulia iri. 19Kud wukan piny m’akana mu i ng’om, ka m’ukoko ku munyali de gicamu i ie, ka ma jukwo gituro i ie gikwalu ko: 20ento wukan piny m’akana mu i polo ka m’ukoko kadi munyali de gicamu i ie ngo, ka ma jukwo de gituro i ie ngo kadi gikwalu de ngo: 21kum ka ma piny peri m’akana ni i ie, adundeni bende bibedo keca. 22Thala mi kum en e nyingwang’: ka kumeno tek nying weng’i cungo acel, kumi ceke bicare ku der. 23Ento tek nying weng’i bedo rac, kumi ceke bicido ku mudho. Ka kumeno tek der ma ni ii bedo mudho, meca mudho sagre dit apila! 24Ng’atu moko mbe ma copo timo ni judongo ario: kum ebidagu acel, ebidong’ maru mucelo; kadi ebimoko bang’ acel, man ebicayu mucelo. Wucopo timo ni Mungu ku ni lonyo de ngo. 25Ka kumeno awacu iwu kumae, Cwinywu kud uring pi kwo mu, nia girang’o ma wubicamu, kadi girang’o ma wubimadhu; kadok pi kumwu, nia girang’o ma wubikendo. Kwo sagu cam ungo, kum de sagu kendi ngo? 26Wunen winyo m’i lietho, ya gicoyo ngo, kadok akaya de gikayu ngo, gicoko i dero de ngo; e Wegwu ma ni i polo kakugi ku cam. Wun wusagugi hai ngo? 27Ng’a ma i kindwu de ma tek cwinye ringo copo medo bot acel ni kadongo pare? 28Cwinywu beringo nedi kum kendi? Dong’ iwu pid pi thiuboko m’i thim, maram gidongo ko; gitimo tic ungo, kadok acwia de gicwio ngo: 29ento awacu iwu, nia cil Suleman i dwong’ pare ceke eronjre calkud alcel mi maeni de ngo. 30Ento tek Mungu ronyo lum m’i thim kumeno, ma nuti tin, man urwo de jubaye i mac, e ebironyowu ma sagu dit ungo, E wun ma yioyic mu noki? 31Ka kumeno cwinywu kud uringi, ma nia wuwac kumae, Wabicamu ang’o? kadi, Wabimadhu ang’o? kadi, Jubironyowa kud ang’o? 32Kum gin maeni ceke Thekdhanumange giyenyo; kum Wegwu ma ni i polo ng’eyo nia can gin maeni ceke benegowu. 33Ento ma kwong’a wuyeny ker pare, ku bedopwe pare; man gin maeni ceke bimedre iwu. 34Ka kumeno cwinywu kud uring pir urwo: kum urwo biringo ku cwinye gire. Dubo ma tin uromo ku tin.

will be added

X\