Matthew 5

1E kan eneno udul dhanu, eidho malu wi got: kan ebedo piny de, julubne gibino i bang’e: 2ealu dhoge eponjogi de, ewacu kumae: 3Mugisa ni jucan mi tipo: kum ker m’i polo en e migi. 4Mugisa ni ju ma can unegogi: kum gibijukri. 5Mugisa ni ju m’ubedo mol: kum ng’om bidoko aba migi. 6Mugisa ni ju ma kec ku rieu de benegogi kum bedopwe: kum gibiyeng’. 7Mugisa ni ju ma kisa negogi: kum gibinwang’u kisa. 8Mugisa ni ju ma adundegi leng’: kum gibineno Mungu. 9Mugisa ni ju ma thego juwagi: kum jubilwong’ogi wot Mungu. 10Mugisa ni ju ma junyayu ragedo i kumgi kum bedopwe: kum ker m’i polo en e migi. 11Mugisa iwu ka dhanu bicayuwu, man gibinyayu ragedo i kumwu, man gibiyero gin ma rac ma kwonde tung’ tung’ i kumwu ma en e ndra, ni kuma. 12Anyong’a negwu, ku mutoro ma dit de: kum sukulia mu e dit i polo: kum ginyayu ragedo kum jubila m’ular uwok iwu bende. 13Wun wu kadu m’i ng’om: ento tek kadu midone rwinyo, jubidwoko midone kud ang’o? e ber ungo kendo pi gin moko, ento pir aoya re junyone de ku tielo. 14Wun wu der m’i ng’om. Adhura ma juketho wi ungulu got pandre ngo. 15Kadok thala jucwinyo ngo, ma nia jukethe the katoko, ento wi there re; erieny de ni dhanu ceke ma ni i ot. 16Cil kumeno wek der mu urieny i wang’ dhanu; kara ginen tic mu ma ber, giyung Wegwu de ma ni i polo. 17Kud wuwac nia nyo abino nyotho cik anyotha kadi jubila: abino nyotho anyotha ngo, endre niketho etimbre kakare. 18Kum awacu iwu andha kumae, Cil ma polo ku ng’om ukadhu woko, nyiguta acel kadi ng’et nyiguta acel de bikadhu woko ki ngo kud i cik, ma fodi gin ceke kutimbre kakare ngo. 19Ka kumeno ng’atu ma tek bikadhu ku wi cik acel ma nyathigi maeni, ebiponjo dhanu de kumeca, jubilwong’e nyathigi i ker m’i polo: ento ng’atu ma tek bitimo man ebiponjogi de, jubilwong’e dwong’ i ker m’i polo. 20Kum awacu iwu, nia tek bedopwe mu sagu mi jugorcik ku Jufarisayo de ngo, wubimondo i ker m’i polo tak de ngo. 21Wuwinjo nia ewacre ni ju ma con kumae, Kud ineg nek; man ng’atu ma tek binego nek ebibedo ceng’ni lembapoka: 22ento awacu iwu, nia ku ba dhanu nzu ng’atu ma tek ng’ecwiny binege kum umin ma there mbe ebibedo ceng’ni lembapoka; man ng’atu ma tek biwacu ni umin mire kumae, Raka, thelembene kumae, In ma kiti mbe e, ebibedo ceng’ni dilo; man ng’atu ma tek biwacu kumae, In i jakasegu, ebibedo ceng’ni gehena mi mac. 23Ka kumeno tek ibethiero giramia peri dhu pemblam, ipoi kakeca nia lembe moko ni i umeru i kumi, 24wek giramia peri keca wang’ pemblam, icidhi, wular wupot kindwu wukud umeru, e kan ilund ibin ithier giramia peri. 25Rip kindwu ku jamon peri tho, kinde ma wuni kude i gengi; kara jamon peri kud umii ni japoklembe, japoklembe de mii ni asikari, man juboli i odkol. 26Andha awacu iri kumae, Ibiai keca ki ngo, ma fodi k’iculo wang’ sente kubang’e pet ungo. 27Wuwinjo nia yang’ ewacre kumae, Kud igier gier: 28endre awacu iwu, nia ku ba dhanu nzu m’uneno dhaku kud awanya ma rac i kume nwang’u edaru giero gier kude ku yo i adunde. 29Man tek weng’i ma yor acwic uketho ikier, wodhe woko, baye cen kud i kumi: kum en e kuloka iri nia wathkumi acel urwiny, man kumi dho re ma ku jubol i gehena. 30Man tek cingi ma yor acwic uketho ikier, thume woko, baye cen de kud i kumi: kum en e kuloka iri nia wathkumi acel urwiny, kumi dho re ma ku jubol i gehena. 31E ewacre bende kumae, Ng’atu ma tek biriemo cege, wek emi ire waraga mi riem: 32ento awacu iwu, nia ku ba dhanu nzu m’uriemo cege, ma k’erieme kum tarwang’ ungo, nwang’u edwoke ni won gier: man ng’atu ma tek bidong’ gome ma jukojurieme woko ca nwang’u egiero gier. 33Kendo, wuwinjo nia yang’ ewacre ni dhanu ma con kumae, Kud ikwongri, ento itim kwong’ peri ni Rwoth: 34ento awacu iwu kumae, Kud ikwong’ kwong’ ki; kadi ku polo, kum en e komker pa Mungu; 35kadi ku ng’om, kum en e kom mi tiende; kadok Yerusalem, kum en e adhura p’Ubimo ma dwong’. 36Kadok ku wii de kud ikwong’ kwong’, kum icopo ketho yukwii acel udok tar kadi col de ngo. 37Ento wek wec mu bed kumae, Eyo, eyo; Ungo, ungo; man gin m’usagu maeni nwang’u en e pa ng’atu ma rac. 38Wuwinjo nia yang’ ewacre kumae, Wang’ ndhu ku wang’, lak ke ndhu ku lak; 39ento awacu iwu kumae, Kud wudhunj ni ng’atu ma rac: ento ng’atu ma tek upadu thengi ma yor acwic, lok ire ma yo kucel bende. 40Man tek ng’atu moko yenyo eredh titi i wii, man ewodh simisi peri, wek ire jabia peri bende. 41Man ng’atu ma tek bicweli ya wucidh wukude ungolo acel, dong’ wucidh wukude ungolo ario. 42Mi ni ng’atu m’ukwayu i beng’i, man, kud ilok ng’ei ni ng’atu m’uyenyo banja i beng’i. 43Wuwinjo nia yang’ ewacre kumae, Mar wedu, dag jadegini: 44endre awacu iwu kumae, Wumar judegiwu, wurwo de pi ju m’unyayu ragedo i kumwu; 45kara wubed wot Wegwu ma ni i polo: kum eketho ceng’ pare dongo wi judubo ku jubero bende, man ekonjo koth wi ju ma pwe ku wi ju ma pwe ngo bende. 46Kum tek wumaru ju m’umaruwu, sukulia mu ang’o? cil weg ajok gitimo kumeno ngo? 47Man tek wumotho juwedwu kendgi, nwang’u wutimo ang’o ma sagu jumange? cil Thekdhanumange gitimo kumeno ngo? 48Ka kumeno wubed ndhu cu, calu Wegwu ma ni i polo bedo ndhu cu.

will be added

X\