Matthew 4

1Tipo lund utelo wi Yesu malu i yamba kara wonabali mul ie. 2E kan eweko cam ceng’ pier ang’wen ku diewor de, yo ku ng’eye kec unege. 3Man jabidhe bino ewacu ire de kumae, Tek in i Wod Mungu, ng’ol nia kidi maeni dok ni kwen. 4Ento eloko lembe ewacu kumae, Egore kumae, Dhanu bibedo ni kum kwen kende ngo, ento ku lembe ceke m’uai dhu Mungu. 5Wonabali lund utere i adhura ma leng’; ekethe de wi usimbru hekalu, 6man ewacu ire kumae, Tek in i Wod Mungu, redhri piny: kum egore kumae, Ebing’olo ni malaika pare piri: man, Gibitheng’i malu i cing’gi, Kara tiendi kud ucwanjre kum kidi. 7Yesu wacu ire kumae, Egore kendo kumae, Kud imul i Rwoth Mungu peri. 8Kendo, wonabali tere malu wi got ma wiu hai, man enyutho ire ker ceke m’i ng’om, ku dwong’ne de; 9man ewacu ire kumae, Gin maeni ceke abimio iri, tek ibipodho piny irwo de i bang’a. 10Yesu lund uwacu ire kumae, Ai kakeni, Jok: kum egore kumae, Rwo ni Rwoth Mungu peri, man itim ire kende. 11Wonabali lund uweke; man nen, malaika gibino gitimo ire. 12Nwang’u kan ewinjo nia jumaku Yohana, eai ecidho Galilaya; 13e kan eai Nazareti, ebino ebedo de Kapernaum, ma ni dhu nam, i kieu Zabulon ku Naftalim: 14kara lembe ma yang’ Isaya ma jabila yero timbre kakare, m’ewacu kumae, 15Ng’om Zabulon ku ng’om Naftalim, Yo ba nam, loka Yordan, Galilaya mi Thekdhanumange. 16Dhanu m’ubedo i mudho Gineno der ma dit, Man ni ju m’ubedo i ng’om ku tipo mi tho, Der udhenjre igi. 17Ugambre i nindo maeno Yesu kwong’o yero, man ewacu kumae Wulok cwinywu; kum ker mi polo ni ceng’ni. 18E kan ebewotho dhu nam Galilaya, eneno utumego ario, Simon ma julwong’o Petro, kud Andrea m’umin mire, m’ubebolo voi i nam; kum gi junam. 19Man ewacu igi kumae, Wulub ng’eya, abidwokowu ni junam mi dhanu. 20E giweko voi ndhu ndhu nica, man gilube. 21E kan eai kakeca ecidho eneno utumego ario mange, Yakobo ma wod Zebedayo, ku Yohana m’umin mire, gini i yei ku Zebedayo ma weggi, gibeyiko voi migi; e elwong’ogi. 22E ndhu ndhu nica giweko yei ku weggi de, man gilubo ng’eye. 23E Yesu cidho i Galilaya ceke ndri ndri, ku ponjo i kacokri migi, ku yero lembanyong’a mi ker de, man ku keyo tho ceke m’unyang’ i kum ma kwonde tung’ tung’ ku tho mange ceke ma kwonde tung’ tung’ m’i kind dhanu. 24E pire yik cil i Cami ceke: man gikelo dhanu ma kumgi lith ceke i bang’e, m’ubedo ku tho m’unyang’ i kum ma kwonde tung’ tung’ ku gin ma sendojo, ku weg pajogi, ku weg thimbu de, ku ju m’ubedo ku tho ma nego kum nding’; man ekeyo kumgi. 25E udul dhanu ma dit gilubo ng’eye ma giai Galilaya man Dekapoli ku Yerusalem man Yahudi ku ma loka Yordan bende.

will be added

X\