Matthew 28

1Nwang’u ka ceng’ sabatu dhingo thum, ka piny umaku thumo i ceng’ ma kwong’a ma yenga, Mariamu Magdalene ku Mariamu mucelo de gibino neno liel m’aroka i cana. 2Man nen, digidi ma dit ubino; kum malaika pa Rwoth uai i polo loro piny, ebino eng’ielo kidi cen, ebedo de i wie. 3Malaikane ayine ve lukoth, kendi pare de bedo tar calu vuru: 4e kum jukur ubemiel ni lworone, man gidoko calu avu dhanu. 5Malaika loko lembe ewacu de ni mon kumae, Lworo kud unegwu: kum ang’eyo nia wuyenyo Yesu, ma jugure. 6Embe keni; kum ecer, cil calu ewacu. Wubin, wunen ka ma Rwoth ukouvuto i ie. 7E wuci tho tho, wuwac ni julubne kumae, Ecer ku kind ju m’utho; man nen, etelo yo i weng’wu i Galilaya; wubinene kuca: nen, awacu iwu. 8E giai tho ku kum liel m’aroka i cana ku lworo man mutoro ma dit, e giringo gitero lembe ni julubne. 9Man nen, girombo giku Yesugi, ewacu kumae, Moth iwu. E gibino gimaku tiende, girwo ire. 10Yesu lund uwacu igi kumae, Kud wulwor: wucidh wuyer ni utumira ya gicidh i Galilaya man gibicinena kuca. 11Nie kinde ma gibecidho, nen, kind jukur gibino i adhura, giyero gin ceke m’utimbre de ni julam ma dongo. 12Ka gicokri giku judongo, man giporo lembe, gimio sente dupa ni asikari, 13giwacu kumae, Wuwac kumae, Julubne gibino ku diewor, gikwale nwang’u wanindo. 14Man tek lembene tuc i ith jabim, wabiloko pidoie, kara iwu kud upidi. 15Ka kumeno gigamu sente, gitimo de calu juponjogi: man lembe maeni yik tir i kind Juyahudi, cil i ceng’ maeni. 16Ento julubne apar wi acel gicidho i Galilaya, ba got ka ma Yesu ng’olo igi. 17E ka ginene, girwo ire; ento jumoko cwinygi bedo jiji. 18Man Yesu bino i bang’gi eweco i bang’gi, ewacu kumae, Ng’ol ceke mire ira m’i polo ku m’i ng’om bende. 19Ka kumeno wucidhi, wuketh thek ceke dok julub, wumi igi baputisi ku nying Wego ku Wod man Tipo Maleng’: 20wuponjgi ya giwor gin ceke m’ang’olo iwu: man nen, wanuti wakudu thiri thiri, cil i kajik mi ng’om.

will be added

X\