Matthew 27

1Nie kinde ma piny uru, julam ma dongo ceke ku judongo mi dhanu de giporo lembe kum Yesu kara ginege: 2e gitwie, gicidho kude cen, man gimie ni Pilato ma jabim. 3Ka Yuda, m’ucibe, neno nia jupoko lembe rac i wie, elund elokre, man edwoko kum mola ma tar pier adek ba julam ma dongo ku judongo, 4ewacu kumae, Adubo kum acibo rimo m’umbe dubo. Ento giwacu kumae, En e ang’o iwa? cung i dhoge. 5Man ekonjo kum mola ma tar i hekalu, eaine woko; ecidh edeire. 6Man julam ma dongo gigamu kum mola ma tarne, giwacu kumae, Cik uyio ngo ya jukethgi i kakanpiny, kum en e wel piny mi rimo. 7E giporo lembe, gidong’ ging’iewo kude podho mi yaca, ma juyiko ie welo. 8Kum kumeno podho maeno julwong’o kumae, Podho mi rimo, cil i ceng’ maeni. 9Lembe ma Yeremia ma jabila yero lund utimbre kakare, m’ewacu kumae, Gigamu sente mi mola ma tar pier adek, wel piny pa ng’atu ma juturo wel piny i kume, ma jumoko ma kind nyithi Israel gituro wel piny i kume; 10man gimie ni podho yaca, calu Rwoth ung’olo ira. 11Nie Yesu cungo wang’ jabim: jabim de penje, ewacu kumae, In i Ubimo mi Juyahudi? Yesu wacu ire kumae, Iyero. 12E ka julam ma dongo ku judongo de gigobe, edwoko lembe moko ngo. 13Pilato lund uwacu ire kumae, Iwinjo min lembe dupa ma giyero i kurni no ngo? 14E eloko ire lembe moko ngo, ungo kadok lembe acel de ngo: ketho i jabim uwang’ lii apila. 15Nwang’u en e kura pa jabim ya egony jakol acel i agba ni udul dhanu, ng’atu ma giyenyo. 16I nindo maeni nwang’u jakol acel nuti kugi, ma pire yik, ma julwong’o Baraba. 17Ka kumeno ka gicokri karacelo, Pilato wacu igi kumae, Wuyenyo ng’a m’agony iwu? Baraba, kadi Yesu ma julwong’o Kristu? 18Kum eng’eyo nia gimie kum kumira. 19E kinde m’ebedo wi kom mi pokolembe, e cege oro lembe ire, ewacu kumae, Kud irodhii i lembe pa ng’atu ma pwe; kum asendra ku giki dupa tin ku wang’ lek i kume. 20Nwang’u julam ma dongo ku judongo giloko pido i udul dhanu kara gikwai Baraba, man ginyoth Yesu. 21Ento jabim uloko lembe ewacu igi kumae, Ng’a ma wuyenyo agony iwu i kind juario maeni? E giwacu kumae, Baraba. 22Pilato wacu igi kumae, Abilund timo ang’o kum Yesu ma julwong’o Kristu? Kagi ceke giwacu kumae, Wek jugure. 23Man ewacu kumae, Nedi, etimo ang’o ma raci? Ento gikok apila kumae, Dong’ jugure. 24Kum kumeno ka Pilato neno nia ecopo timo gin moko ngo, ento yakni re m’ubenyai, egamu pi, elogo ko cinge i wang’ udul dhanu, ewacu kumae, An ambe ku dubo kum rimb ng’atu ma pwe maeni; wucung i dhoge. 25Dhanu ceke giloko lembe giwacu kumae, Rimbe bed i wiwa, ku nyithindho mwa de. 26Elund egonyo igi Baraba; ento efodo Yesu emie de ya jugure. 27Asikari pa jabim gilund gitero Yesu i Odtiti, man gicoko ungu asikari pet i wang’e. 28E giwodho bongu pare, man gironye ku jabia ma kwar ngbo. 29Man gikiedo jamkermiwic mir ukudho giroyo de i wie, giketho undodi de i cinge ma yor acwic; e girum i wang’e, gicaye ko, giwacu kumae, Moth iri, Ubimo mi Juyahudi! 30Man ging’ulo lau i kume, gigamu undodi gigoyo ko wie. 31E ka gidaru caye, giwodho jabia kud i kume, gironye de ku kendi pare, e gipeye gici gigure. 32E ka giwok woko, ginwang’u ng’atu acel ma Jakurene, ma nyinge Simon: gicung’e ya gici gikugi, kara eyei yen m’athara pare. 33E ka gibino ka ma julwong’o Golgotha, thelembene kumae, Karupokowic, 34gimio ire pigulok m’ujebre kud ulecu ya emadhi: kan ebilo de, ekwero madhu. 35E ka gidaru gure, gigoyo jara, gipoko ko kendi pare i kindgi; 36e gibedo piny gikure keca. 37Man giketho agobe pare malu i wie m’ugore kumae, MAENJ YESU M’UBIMO MI JUYAHUDI. 38Julund juguro weg ayeki ario gikugi, acel yo ku cinge ma yor acwic, acel ke yor acam. 39Ju m’ucikukadhu de gicaye, giyengo wigi, 40giwacu kumae, In m’irungo hekalu, kan igome de ceng’ adek, bodhii giri: tek in i Wod Mungu, lor piny ku wi yen m’athara. 41Julam ma dongo bende ma gicaye kumeca, ku jugorcik man judongo, giwacu kumae, 42Elaru jumange; ecopo bodhie gire ngo. En e Ubimo mir Israel; wek elor piny kawono ku wi yen m’athara, e wabiyio ire. 43Egeno ni Mungu; wek elare kawono, tek eyenye: kum ewacu kumae, An a Wod Mungu. 44Weg ayeki bende ma jugurogi gikugi giredho cac ma kumeno i wie. 45Nie ugambre i saa mir abusiende mudho yutho ng’om ngung’ cil i saa mir abung’wende. 46Ceng’ni saa mir abung’wende Yesu kok ku dwande ma tek, ewacu kumae, Eli, Eli, lama sabakithani? thelembene kumae, Munguna, Munguna, ikuna nedi? 47Jumoko m’i kindgi m’ucungo keca, ka giwinje, giwacu kumae, Ng’atuni lwong’o Elia. 48E ndhu ndhu nica ng’atu acel m’i kindgi uringo, man egamu ucoi, epiko ie picwa, ekethe de wi undodi, man emio ire emadhi. 49Juwagi giwacu kumae, Weki; dong’ wanenu tek Elia bino lare. 50E Yesu kok kendo ku dwande ma tek, man eweko tipone kadhu. 51Man nen, kusika mi bongu m’i hekalu kak dra ugambre i wie cik piny; ng’om de yengre; cana de ng’eny; 52odliel de yabre; avu dupa de mi jumaleng’ ma ginindo gicer; 53E giai woko kud i odliel yo ng’ei cer pare gimondo de i adhura ma leng’ man ginyuthri ni dhanu dupa. 54Nwang’u jego, ku ju ma gibedo gikugi m’ubekuro Yesu, ka gineno digidi, ku gin m’utimbre de, lworo negogi dit apila, giwacu kumae, Andha ng’atuni en e Wod Mungu. 55Mon de dupa ginuti kakeca ma ginene ku cen, ma gigamu lubo ng’ei Yesu kud i Galilaya, ma gitimo ire: 56Mariamu Magdalene, ku Mariamu ma meg Yakobo ku Yose, ma min wot Zebedayo gini i kindgi. 57Ka piny udoko uthieno, ng’atu acei ma jalonyo m’uai Arimathaya bino, ma nyinge Yusuf, ma en bende e jalub Yesu: 58ng’atuni cidho ba Pilato, ekwayu avuj Yesu de. Pilato lund ung’olo ya jumie. 59E Yusuf ugamu avuje, eboye de i bongu ma leng’ ma nwang’, 60man ekethe i liel m’aroka i cana ma nyen ma pare gire, m’eroko i cana: eng’ielo kidi ma dit de dhugola mi liende, e ecidho. 61Nwang’u Mariamu Magdalene, ku Mariamu mange, gini keca, gibedo kum liel m’aroka i cana. 62Nie urwone, ma en e yo ng’ei Yikopiny, julam ma dongo ku Jufarisayo gicokri karacelo ba Pilato, 63giwacu kumae, Rwoth, wapoi ya jabombi maeno wacu kumae, ma fodi ekwo, Yo ng’ei ceng’ adek abicer kendo. 64Ka kumeno ng’ol ya jukur liel m’aroka i cana krr cil i ceng’ adek, julubne maru bino kwale, gimaru wacu ni dhanu kumae, Ecer ku kind ju m’utho: e awondi ma cen bibedo rac ma sagu ma kwong’a. 65Pilato wacu igi kumae, Wutie ku jukur: wuci wukethe bed krr calu wucopo. 66Ka kumeno gicidho, man giketho liende bedo krr, gimwono ayi kum kidi, jukur de ginuti gikugi.

will be added

X\