Matthew 26

1Gini timbre de, ka Yesu daru lembe maeni ceke, ewacu ni julubne kumae, 2Wung’eyo nia yo ng’ei ceng’ ario kadhukuwijo bino, e jumio Wod dhanu ya jugure. 3Julam ma dongo ku judongo mi dhanu gilund gicokri karacelo, i pondot pa jalam ma dit, ma julwong’o Kayafa; 4man giporo lembe karacelo kara gimak Yesu ku rieko, ginege de. 5Ento giwacu kumae, I nindo mir agba re ngo, rop umaru moc i kind dhanu. 6Nie kan eni i Bethania, i ot pa Simon ma won joi, 7dhaku ma won cupa mi kidi ma tar ma ie ju mo ma pire tek apila, ebino i bang’e, ekonjo moje de i wie, nwang’u ebedo dhu cam. 8Ento ka julub gineno maeni, eton i igi, giwacu kumae, Edubo maeni mir ang’o? 9Kum mojuni copo loko jupiny dupa, man jumio ni jucan. 10Ento Yesu m’ung’eyo maeni ewacu igi kumae, Wunyayu can i dhaku maeni nedi? kum etimo tic ma dre i kuma. 11Kum wubedo thiri thiri wuku jucan; ento an re wabedo wakudu thiri thiri ngo. 12Kum mo maeni m’ekonjo i kuma, maeni etimo m’eyika ko mi kuny. 13Andha awacu iwu kumae, Ka ma tek lembanyong’a maeni biyere i ie i ng’om yu, maeno bende ma dhaku maeno timo biyere ni poi ma jupoi ko pire. 14Ng’atu acel m’i kind juapar wi ario, ma julwong’o Yuda Iskariote, ulund ucidho ba julam ma dongo, 15man ewacu kumae, Wuyenyo ya wumi ang’o ira kan amie iwu? E giporo ire kum mola ma tar pier adek. 16Ugambre i nindo maeca eyenyo maram ecopo mie ko igi. 17Nie i ceng’ ma kwong’a mi kwen ma thobi mbe i ie julub gibino ba Yesu, giwacu kumae, Iyenyo wayik iri ka cemo mi kadhukuwijo kani? 18Man ewacu kumae, Wucidh i adhura ba ng’adi, man wuwac ire kumae, Japonji wacu kumae, Nindo para dhingo; abikwiro kadhukuwijo i ot peri waku julubna. 19Julub gitimo calu Yesu ng’olo igi; e giyiko kadhukuwijo. 20Nwang’u ka piny udoko uthieno, ebedo dhu cam giku julub apar wi ario; 21ka gibecamu de, ewacu kumae, Andha awacu iwu, nia ng’atu acel m’i kindwu biciba. 22E can umakugi dit apila, man gimaku wacu ire kubang’gi kubang’gi kumae, En e ani, Rwoth? 23Eloko lembe de ewacu kumae, Ng’atu ma wagwio bwa wakude i tabu, ng’atuno e ma biciba. 24Wod dhanu cidho, cil calu pire gore: ento can wi ng’atu ma Wod dhanu cibre ni kume! E ber ni ng’atuno tek junyole ngo. 25Yuda de, m’ucibe, eloko lembe ewacu kumae, En e ani, Japonji? Ewacu ire kumae, Iwacu. 26Ka gibecamu de, Yesu ting’o kwen, man emio mugisa i wie, eng’wenyo ie de; e emio ni julub, ewacu kumae, Wugam, wucam; maeni kuma. 27Eting’o kikombe de, emio foc, emio igi de, ewacu kumae, Madhe kewu ceke; 28kum maeni rimba mi lembariba, m’uthwogre pi dhanu dupa ni ruc mi dubo. 29Ento awacu iwu kumae, Ugambre kawono abimadhu kum nying ulok maeni ngo, cil i ceng’ maeno kan amadhe m’e nyen i ker pa Vwa karacelo kudu. 30E ka giwero wer, giwok woko gicidho wi got Zeituni. 31E Yesu lund uwacu igi kumae, Kewu ceke wubikier ni kuma i diewor maeni: kum egore kumae, Abigoyo jakwac, e rombe mir udul bilal mba. 32Ento ku yo ng’ei cer para, abicidho i nyimwu i Galilaya. 33Ento Petro loko lembe ewacu ire kumae, Kadok ceke bikier ni kumi, an re abikier ki ngo. 34Yesu wacu ire kumae, Andha awacu iri, nia i diewor maeni, ka fodi kulok kukok ungo, ibikwera wang’ adek. 35Petro wacu ire kumae, Kadok atho karacelo kudi ngi, abikweri ngo. Julub ceke bende giwacu kumeca. 36Yesu gilund gibino gikugi i ka ma julwong’o Gethsemane man ewacu ni julubne kumae, Wubed keni, kinde m’aci rwo kuca. 37Man ecidho ku Petro giku wot Zebedayo ario, e can umake cwinye de ng’abre sok. 38Elund ewacu igi kumae, Can unego ng’eyong’ec para apila, cil ni tho: wukowubed keni, wakuru de wakudu. 39Ecidho yor i wang’gi nyanok, epodho de i wang’e, erwo, ewacu kumae, Vwa, tek ecopre, wek kikombe maeni kadh woko kud i bang’a: ento, calu ayenyo an ungo, endre calu iyenyo in. 40Ebino de ba julubne, man enwang’u gibenindo, man ewacu ni Petro kumae, Ei, wacopo kuro wakudu ngo saa aceli? 41Wukur wurwo de, kara kud wumond i abidhe: cwiny uyenyo andha, ento kum re bedo ng’ic. 42Ecidho cen kendo mir arionde, erwo de, ewacu kumae, Vwa tek maeni copo kadhu woko ngo, tek amadhe ngo, dong’ etimbre kacwinyi. 43Man ebino kendo, enwang’u gibenindo, kum wang’gi bedo pek. 44E ewekogi kendo, man ecidho cen, erwo de mir adege, ewacu kendo lembe ma calacel. 45Elund ebino ba julub, man ewacu igi kumae, Wunind asu kawono, wuyom mu: nen, saa ni ceng’ni, Wod dhanu de jucibe i cing’ judubo. 46Wuai malu, wacidhu: nen, ng’atu m’uciba eni ceng’ni. 47Kinde ma fodi ebeweco, nen, Yuda, ma ng’atu acel ma kind juapar wi ario, ubino kud udul dhanu ma dit ma gi weg palamularu ku dul de, ma giai ba julam ma dongo ku judongo mi dhanu. 48Nwang’u ng’atu m’ucibe emio igi rieko, ewacu kumae, Ng’atu ma tek abicwio limbe, nwang’u en e en: wumake. 49E ndhu ndhu nica ebino ba Yesu, man ewacu kumae, Moth iri, Japonji; e ecwio limbe. 50Yesu wacu ire kumae, Jarimo, tim gin m’ibino pire. E gilund gibino giketho cing’gi kum Yesu, e gimake. 51Nen, ng’atu acel ma kind ju ma gibedo giku Yesugi erieyo cinge, ewodho palamularu pare, egoyo jamiru pa jalam ma jadit, man etong’o ithe woko. 52Yesu lund uwacu ire kumae, Dwok palamularu peri kendo kakare: kum dhanu ceke m’umaku palamularu gibitho ku palamularu. 53Kadi iwacu nyo acopo kwayu Vwa ngo, man ebioro ira cil kawono nini udul malaika ma sagu apar wi ario ngo. 54Ka kumeno lembagora pa Mungu bilund timbre kakare nenedi, nia ekoebed kumeno be. 55I saa nica Yesu wacu ni udul dhanu kumae, Wubino calu kum won ayeki ku palamularu ku dul de nimaku ko ani? Abedo ku ba rupiny i hekalu abedaponjo, di wumaka ngo do. 56Ento lembe nini ceke timbre, kara lembagora mi jubila timbre kakare. Julub ceke gilund giweke, giringo. 57Man ju ma gimaku Yesu gitere ba Kayafa ma jalam ma dit, ka ma jugorcik ku judongo gicokri ie karacelo. 58Ento Petro lubo ng’eye ku cen, ba pondot pa jalam ma jadit, emondo de i ie, gibedo kud asikari, nineno kajikne. 59Nwang’u julam ma dongo man dilo ngung’ giyenyo lembacuka kum Yesu, kara ginege; 60e ginwang’e ngo, kadok jumulembe mi ndra gibino dupa. Ento macen juario gibino, 61giwacu kumae, Ng’atuni wacu kumae, Acopo nyotho hekalu pa Mungu, kan agome de ceng’ adek. 62E jalam ma dit uai malu, ewacu ire kumae, Idwoko lembe moko ngo? girang’o ma joni benyutho piri? 63Ento Yesu bedo pare ling’. Jalam ma dit de wacu ire kumae, Aketho ikwong’o ku Mungu ma kwo, ya iwac iwa tek in i Kristu, ma Wod Mungu. 64Yesu wacu ire kumae, Iwacu: endre awacu iwu kumae, Ugambre kawono wubineno Wod dhanu ujany yo ku cing’ ma yor acwic mi Tego, kan ebebino de ku i afuru m’i polo. 65Jalam ma dit ulund uyeco kendi pare, ewacu kumae, Eyero lembacidi kum Mungu: can jumulembe mange negowa nedi? nen, kawono wuwinjo lembacidi pare: 66e iwu wacu nyo ang’o? Giloko lembe giwacu kumae, Eromo ku tho. 67E gimaku ng’ulo lau i wang’e gipade de ku diecing’gi, 68giwacu kumae, Eu iwa, in i Kristu: ng’a m’upedi? 69Nwang’u Petro bedo woko i pondot: e nyaku bino i bang’e, ewacu kumae, In bende wubedo wuku Yesu ma Jagalilaya. 70Ento ekwero i wang’gi ceke, ewacu kumae, Ang’eyo gin m’iwacu no ngo. 71Kan ecidho woko i pondot, nyaku mange nene, ewacu kumae de ni ju m’ubedo keca, Ng’atuni bende gibedo giku Yesu ma Nazareti. 72Ekwero de kendo ku kwong’ kumae, Ang’eyo ng’atuno ngo. 73Yo ng’eye nyanok ju ma gicungo gikugi giwacu ni Petro kumae, Andha in bende in i acel m’i kindgi; kum jung’ei ni wec peri. 74Elund emaku yanyu ayany ku kwong’o kwong’ de, ewacu kumae, Ang’eyo ng’atuno ngo. E ndhu ndhu nica kulok ukok. 75E Petro poi kum lembe ma Yesu wacu kumae, Ka fodi kulok kukok ungo, ibikwera wang’ adek. E ewok woko, eywak ku can ma apila.

will be added

X\