Matthew 25

1Ker mi polo jubilund poro ku jumanyir apar ma gi sumba, ma gigamu thala migi, gicidho de nirombo ku cwar mugole. 2Juabic m’i kindgi gi jukusegu, abic ke gi jurieko. 3Kum ju ma gi jukusegu, ka gigamu thala migi, gigamu ku moje ngo: 4ento ju ma gi jurieko giting’o mo i upoko migi ku thala migi. 5Nie kinde ma cwar mugole galu kagi ceke rip rip uterogi e ginindo. 6Ento i diewor ma ling’ jukok akoka kumae, Nen, cwar mugole! Wuwok wung’ole. 7E jumanyir ma sumba maeno ceke gilund giai malu, gimaku yiko thala migi. 8Man ju ma gi jukusegu giwacu ni ju ma jurieko kumae, Wumi iwa kum mo mu moko do; kum thala mwa betho. 9Ento ju ma gi jurieko gidwoko lembe, giwacu kumae, Kuno nyo ebiromo wan wakudu de ngo: maku wuci ba jukuloka, man wung’ieu mu giwu. 10E kinde ma gicidho ning’iewo, cwar mugole wok; e ju ma giyikri gimondo gikugi ba cemo mir ambadha: e juciko dhugola. 11Ku ng’eye jumanyir wadi ma sumba de gibino giwacu kumae, Rwoth, Rwoth yab iwa do. 12Ento eloko lembe, ewacu kumae, Awacu iwu andha, Ang’eyowu ngo. 13Ka kumeno dong’ wuki, kum wung’eyo cenge kadi saane de ngo. 14Kum en e calu ka ng’atu acel ubecidho i ng’om mange, elwong’o jumiru pare ma dhe, emio jupiny pare de igi. 15Ni ng’atu acel emio talanto abic, ni ng’atu mange de ario, ni mange ke acel, kubang’gi nzu ng’atuman calu ma kakore; e ecidho i woth pare. 16Ndhu ndhu nica ng’atu m’ugamu talanto abic ecidho eloko ko talanto abic mange. 17Ng’atu m’ugamu ario bende kumeca eloko ario mange. 18Ento ng’atu m’ugamu acel re ecidho ekunye i ng’om, ekanu sente pa rwoth pare. 19Nie ka nindo ton hai rwoth mi jumiru maeno bino, e gikwanu wel gikugi. 20Ng’atu m’ugamu talanto abic ebino ekelo talanto abic mange, ewacu kumae, Rwoth, imio ira talanto abic: nen, aloko talanto abic mange. 21Rwoth pare loko ire lembe kumae, Itimo dre, i jatic ma ber mandha de: ibedo mandha i gin ma nyanok, abikethi wi gin dupa; mond i mutoro pa rwoth peri. 22Ng’atu m’ugamu talanto ario bende ebino ewacu kumae, Rwoth imio ira talanto ario: nen, aloko talanto ario mange. 23Rwoth pare wacu ire kumae, Itimo dre, i jatic ma ber mandha de: ibedo mandha i gin ma nyanok, abikethi wi gin dupa; mond i mutoro pa rwoth peri. 24Ng’atu m’ugamu talanto acel ubino bende ewacu kumae, Rwoth, ang’eyo nia in i ng’atu ma lembe peri tek, ikayu ka ma icoyo i ie ngo, icoko de ka m’imoyo i ie in ungo; 25e lworo maka, acidho de akanu talanto peri i ng’om: nen, piny peri ni giri. 26Ento rwoth pare loko lembe ewacu ire kumae, In i jatic ma rac ma janyap bende, ing’eyo nia akayu ka m’acoyo an ungo, acoko ka m’aketho i ie an ungo; 27ka kumeno maku iketh sente para ba juwil sente, kara kan abino agam gira ku kniokane de. 28Ka kumeno wumai talanto woko kud i bang’e, wumi de ni ng’atu ma won talanto apar. 29Kum ku ba dhanu ceke ma tek ubedo ko emire ire, man ebibedo ko le: ento ng’atu m’ubedo ko ngo, cil maeno m’ebedo ko de jubimayu woko. 30Man wubai jamiru ma kuloka pare mbe i mudho ma woko: ywak ku kayu lak de bibedo nuti. 31Ento ka Wod dhanu bibino i dwong’ pare, ku malaika ceke gikugi, ebilund jany wi komker mi dwong’ pare: 32man thek ceke bicokri i wang’e: man ebikoyo kindgi ku juwagi, calu jakwac koyo rombe ku kind diegi; 33man ebiketho rombe yo ku cinge ma yor acwic, diegi ke yo ku cinge ma yor acam. 34Ubimo bilund wacu ni ju ma yo ku cinge ma yor acwic kumae, Wubin wu ju ma Vwa dwokowu jumugisa, wucam pacu mi ker m’ubedo ayika iwu ugambre i thekri mi ng’om: 35kum nwang’u kec unega, man wumio ira acam; nwang’u rieu unega, man wumio ira giramadha; nwang’u a welo, man wujola; 36muneru de, man wuronya; nwang’u kuma lith, man wuliewa; nwang’u ani i odkol, man wubino i bang’a. 37Weg bedopwe gibilund loko ire lembe, gibiwacu kumae, Rwoth, waneni awene ma kec ubenegi, ka wamio iri cami? kadi ma rieu benegi, ka wamio iri giramadha? 38Waneni de awene m’i welo, ka wajoli? kadi muneru, ka waronyi? 39Waneni de awene ma kumi lithi, kadi i odkol, ka wabino i beng’i? 40Ubimo de biloko lembe ebiwacu igi kumae, Andha awacu iwu kumae, Kum calu wutime ni ng’atu acel ma kind utumira maeni, cil ni maeni ma gi nyithigiki nwang’u wutime ira. 41Ebilund wacu ni ju ma ni yo ku cinge ma yor acam bende kumae, Wuai woko kud i vuta, wun ma wubedo akwong’a, i mac ma rondo ku rondo m’ubedo ayika ni wonabali ku malaika pare: 42kum nwang’u kec unega, wumio ira cemo de ngo; nwang’u rieu nega, wumio ira giramadha de ngo; 43nwang’u a welo, wujola de ngo; muneru de, wuronya de ngo; kuma lith, ani i odkol de, wuliewa de ngo. 44Gibilund dwoko lembe bende, gibiwacu kumae, Rwoth, waneni awene nwang’u kec ubenegi, kadi rieu, kadi m’i welo, kadi muneru, kadi nwang’u kumi lith, kadi i odkol, ka watimo iri ngo? 45Ebilund loko lembe igi, ebiwacu kumae, Andha awacu iwu kumae, kum calu wutime ngo ni ng’atu acel mi kind maeni ma nyithigiki, nwang’u wutime ira ngo. 46E joni gibicidho migi i masendi ma rondo ku rondo: ento weg bedopwe i kwo ma rondo ku rondo.

will be added

X\