Matthew 24

1E Yesu ai woko ku i hekalu, ebecidho de i yo pare; man julubne gibino i bang’e ninyutho ire gom mi hekalu. 2Ento eloko lembe ewacu igi kumae, Wuneno gin maeni ceke ngo? andha awacu iwu kumae, Jubiweko kidi acel de ngo keni wi wagi ma jukubibolo piny ungo. 3Kan ebedo de wi got Zeituni, julub gibino i bang’e nyalwe, giwacu kumae, Wac iwa, gin maeni bitimbre awene? man giranyutha mi bino peri en e ang’o, ku mi kajik mi ng’omi? 4Man Yesu loko lembe ewacu igi kumae, Wukuru kara ng’atu moko kud uwingwu. 5Kum dupa bibino i nyinga, ma gibiwacu kumae, An a Kristu; man gibiwingo dhanu dupa. 6Man wubiwinjo pir ali ku rwong ali de; wunen nia cwinywu kud ung’abre: kum gin maeni bikotimbre be; ento nwang’u kajikne fodi. 7Kum thek bijai kum thek, ker de ni ker; ndru de bipodho ku digidi i ka ma nge nge. 8Ento gin maeni ceke en e landu wi can. 9E gibilund miowu ni masendi, man gibinegowu: thek ceke de bidaguwu kum nyinga. 10Dhanu dupa de bilund kier, gibimiri de, man gibidagri. 11Jubila mi ndra de dupa gibiwok, man gibiwingo dupa. 12Kum camuco de bimedre, mer mi dhanu dupa de bidoko ng’ic. 13Ento ng’atu ma biciro cil i kajikne, ng’atuno biboth. 14Man lembanyong’a maeni mi ker jubiyero i ng’om ngung’ ni lembatuca ni thek ceke; e kajik bilund wok. 15Ka kumeno ka wuneno gin mir adegi mi nyoth, ma yang’ Daniel wacu pire, ucungo i kamaleng’ (wek ng’atu m’usomo ung’ei), 16wuwek ju ma gini i Yahudi gilund giring ba got: 17dong’ ng’atu ma ni wi ot de kud elor piny niwodho jamb ot pare: 18ng’atu ma ni i podho de dong’ kud edwog nigamu kendi pare. 19Ento can ni ju ma igi nuti ku ju ma ketho judhoth i ceng’ maeno! 20Wurwo de ya ringong’wec mu kud ubed i nindo mi koyo, kadok ceng’ sabatu: 21kum i nindo maeno masendi ma dit bibedo nuti, ma wagi maeno fokuwok ungo ugambre i thekri mi ng’om cil ku kawono de, ungo, kadi cil rondo ku rondo de biwok ungo. 22Man tek jukujwigo ceng’ maeno ngo, kuno di kum moko mbe m’ubin uboth: ento ni ju ma yang’ jugoyo nying’gi re ceng’ nino jubijwigo. 23I nindo maeno tek ng’atu moko biwacu iwu kumae, Nen, Kristu nuti keni, kadi, Kae; kud wuyi. 24Kum ju ma gi Kristu rni ndra gibiwok, man jubila mi ndra de, man gibinyutho giranyutha ma dit ku musana; kara giwing ko cil ju ma jugoyo wigi de, tek ecopre. 25Nen, alar ayero iwu. 26Ka kumeno tek giwacu iwu kumae, Nen, eni i langa; kud wuwok woko: Nen, eni i kusika; kud wuyi. 27Kum calu lukoth uai yo nyangu, junene de cil yo reto; e bino pa Wod dhanu de bibedo kumeca. 28Ka ma tek avu ni i ie acuth bicokri karacelo kakeca. 29Ento ndhu ndhu yo ng’ei masendi mi ceng’ maeno ceng’ bidoko col, dwi de birieny ungo, cero de bioi kud i polo, tego mi polo de biyengre; 30e giranyutha pa Wod dhanu bilund wok i polo: e can bilund nego suru ceke m’i ng’om, man gibineno Wod dhanu bebino wi afuru m’i polo ku tego ku dwong’ ma dit de. 31Man ebioro malaika pare ku dwand agwara ma dit, e gibicoko ju ma jugoyo nying’gi karacelo kud i the yamu ang’wen, kud i tung polo kun ku kun de. 32Nie wuponj ng’eyo lembabola ni kum ulam: kmde ma jange doko yom, elodho ithe de, wung’eyo ya cwir ni ceng’ni; 33cil wun bende kumeno, ka wuneno gin maeno ceke, wung’ei ya eni ceng’ni, cil dhugola. 34Andha ayero iwu kumae, Dhanum’utuk maeni bikadhu woko ngo, ma fodi gin maeni ceke kutimbre kakare ngo. 35Polo ku ng’om bikadhu woko, ento lembe para bikadhu woko ngo. 36Ento ceng’ nino ku saane de ng’atu moko mbe m’ung’eyo pire, cil ku malaika m’i polo de, kadok Wod, ento Wego kende. 37Man ke calu yang’ ceng’ pa Noa bedo, e bino pa Wod dhanu de bibedo kumeca. 38Kum calu i ceng’ maeca ma fodi pi ma dit m’uumo ng’om kuwok ungo gibecamu gibemadhu de, gibegambri gibemio de ya jugam, cil i ceng’ ma Noa mondo ko i avur, 39e ging’eyo ngo maram pi ma dit m’uumo ng’om uwok ko, man eterogi ceke woko, e bino pa Wod dhanu bibedo kumeca. 40I nindo maeno dhanu ario bibedo i podho; acel ugambre, acel ke dong’: 41mon ario de birego rego wi pom: acel ugambre, acel ke dong’. 42Ka kumeno wuki: kum wung’eyo ngo ceng’ ma Rwoth mu bino i ie. 43Ento wung’ei maeni, nia dok won ot ung’eyo ka kur ma jakwo bino i ie, kuno di ekuro, kuno di eyio ngo ya jutur ot pare. 44Ka kumeno wun bende wubed ayika; kum Wod dhanu bino i saa ma wuwacu nyo ngo. 45Ka kumeno ng’a ma jamiru mandha ma riek de, ma rwoth pare kethe wi juode, ya emi igi cemo migi i nindone? 46Mugisa ni jamiru maeno, ma rwoth pare kan ebino binwang’u ebetimo kumeca. 47Andha awacu iwu, ya ebikethe wi gin ceke m’ebedo ko. 48Ento tek jamiru ma rac maeno biwacu i adundene kumae, Rwoth para galu: 49man ebimaku fodo jutic wadi, man ebicamu ku madhu de karacelo ku ju ma mer: 50e rwoth pa jamiru maeno bibino i ceng’ m’ewacu nyo ngo, i saa de m’eng’eyo ngo, 51man ebifode dit, ebiketho maka pare karacelo ku weg ambili: ywak ku kayu lak de bibedo nuti.

will be added

X\