Matthew 10

1Man elwong’o julubne apar wi ario i bang’e, man emio igi ng’ol wi tipo m’ucido, ma giwodh kogi woko, man gikei ko kwond tho ceke m’unyang’ i kum ku kwond tho ceke mange de. 2Nwang’u nying’ jukwenda apar wi ario gi eni: Ma kwong’ane, Simon, ma julwong’o Petro, man Andrea m’umin mire; Yakobo ma wod Zebedayo, man Yohana m’umin mire; 3Filipo, man Bartolomayo; Thoma, man Matayo ma won ajok: Yakobo ma wod Alfayo, man Thadayo; 4Simon ma Jakananayo, man Yuda Iskariote, m’ucibe bende. 5Yesu oro juapar wi ario maeni, man eng’olo igi, ewacu kumae, Kud wucidh i yo moko mi Thekdhanumange, man kud wumond i adhura moko nii Jusamaria: 6ento ma sagu wucidh ba rombe m’urwinyo m’i ot pa Israel. 7Ka wucidho de, wuyer, wuwac kumae, Ker m’i polo dhingo. 8Wukei kum weg tho, wuketh ju m’utho cer, wulony weg joi, wuwodh pajogi woko: wumaku k’abamba, dong’ wumi k’abamba. 9Kud wutwek mola ma kwar, kadok mola ma tar de, kadok mola i gbethe mu: 10kulubu de ngo mi woth mu, kadok jabia de ario, kadi wara, kadi uluth; kum jatic uromo ku cemo pare. 11Man i adhura kadi i pacu ceke ma tek wubimondo i ie, wuyeny ng’atu m’uromo i ie; wubed keca de maram wuai ko woko. 12Ka wumondo de i ot, wumothe. 13Man tek ode romo, wek kwiocwiny mu bin i wie: ento tek eromo ngo, wek kwiocwiny mu dwog i beng’wu. 14Ng’atu ma tek bijolowu ngo, kadi m’uwinjo lembe mu ngo, ka wuai kud i oduca kadi adhura nica, wukir utur m’i tiendwu woko. 15Andha awacu iwu kumae, I ceng’ mi pokolembe, pokolembe mi ng’om Sodom ku Gomora bibedo ber ma sagu mir adhura maeno. 16Nen, aorowu calu rombe i kind urudi: ka kumeno wubed riu parni thwol, wubed ming’ de pamir akuru. 17Ento wukuru ni dhanu: kum gibimiowu i dilo, i kacokri migi de gibifodowu; 18eyo man gibiterowu i wang’ jubim ku ju m’ubimo de pira, ni lembatuca igi ku Thekdhanumange de. 19Ento ka jumiowu, cwinywu kud uring maram wubiweco ko kadi pi lembe de ma wubiweco: kum gin ma wubiyero bimire iwu i saa nica. 20Kum wuweco wun ungo, ento Tipo pa Wegwu e m’ubeweco i iwu. 21Umego de biting’o umin wang’ tho, won nyathin de biting’o nyathi pare: nyithindho de gibijai kum junyodo migi, e gibiketho juneggi. 22Man dhanu ceke gibidaguwu kum nyinga: ento ng’atu m’uciro cil i kajikne, ng’atuni e ma biboth. 23Ento ka ginyayu ragedo i kumwu i adhura maeni, wuring i mange: kum andha awacu iwu kumae, Wubikadhu ku i adhura pa Israel ungo, ka fodi Wod dhanu kubino ngo. 24Jalub sagu japonji pare ngo, kadok jamiru de sagu rwodhe ngo. 25Eromo ni jalub ya ebed calu japonji pare, jamiru de calu rwodhe. Tek gilwong’o won ot Beelzebul, gibilwong’o wat pare kumeno ma sagu dit! 26Ka kumeno kud wulworgi: kum gin moko mbe ma umbre, ma binyuthre ngo; ma kandre de, ma bing’eire ngo. 27Gin m’ayero iwu i piny ma col wuyer i der: gin ma wuwinjo de i ithwu, wuyere wi ot. 28Man kud wulwor ju ma nego kum, ento ng’eyong’ec re negre igi ngo: ento ma sagu wulwor ng’atu ma copo nyotho ng’eyong’ec ku kum de i gehena. 29Kira ario juloko ku sente ngo? man acel m’i kindgi mbe ma bipodho i ng’om ma Wego mbe: 30ento cil yukwiwu ceke kwandre. 31Ka kumeno kud wulwor: wun wu ber ma sagu kira dupa. 32Ka kumeno ku ba dhanu nzu ma bituca i wang’ dhanu, an bende abituce i wang’ Vwa ma ni i polo. 33Ento ng’atu ma tek bikwera i wang’ dhanu, an bende abikwere i wang’ Vwa ma ni i polo. 34Iwu kud uwac nyo abino bolo kwiocwiny i ng’om: abino bolo kwiocwiny ungo, ento palamularu re: 35Kum abino poko kind nico ku won mire, nyaku ke giku min mire, dhaku ke ku wang’umire: 36man ke judegi pa ng’atu moko bibedo wat pare ma dhe. 37Ng’atu m’umaru won kadi rnin ma sagu an eromo kuda ngo; ng’atu m’umaru wode kadi nyare de ma sagu an eromo kuda ngo. 38Ng’atu m’uting’o yen m’athara pare ngo elubo ng’eya de, romo kuda ngo. 39Ng’atu m’unwang’u kwo pare ebirwinye; man ng’atu m’urwinyo kwo pare pira ebinwang’e. 40Ng’atu m’ujolowu nwang’u ejolo an, man ng’atu m’ujolo an nwang’u ejolo ng’atu m’uora. 41Ng’atu m’ujolo jablia i nying’ jabila ebimaku sukulia pa jabila: ng’atu m’ujolo ng’atu ma pwe i nying’ ng’atu ma pwe ebimaku sukulia pa ng’atu ma pwe. 42Ng’atu ma tek bimio kikombe mi pi ma ng’ic ni ng’atu acel m’i kind nyithindho ma thindho maeni ya emadhi, i nying’ jalub, awacu iwu andha sukulia pare birwinyo ire ki ngo.

will be added

X\