Mark 6

1Man eai woko ku keca; ewok i ng’om ma thugi ma dhe; julubne de gilubo ng’eye. 2E ka ceng’ sabatu wok, emaku ponjo i kacokri: dupa ka giwinje igi wang’ lii, giwacu kumae, Ng’atuni nwang’u gin maeni kani? man, rieko ang’o ma jumio ni ng’atuni, ku tic ma tek ma kumeni m’ubetimbre ku cinge e? 3Maeni jabodho mi bau ngo, ma wod Mariamu, umin mire ke Yakobo, ku Yose, man Yuda, ku Simon de? nyimin mire bende gini i bang’wa ngo? E gikier ni kume. 4E Yesu wacu igi kumae, Jabila bedo umbe yung ungo ento i ng’om thugi ma dhe re, man i kind jupagi, kud i ot pare bende ma dhe. 5Man tic ma mi tego copo timbre ire ngo keca, ento eketho cinge kum weg tho ma lam, man ekeyo kumgi. 6E ie wang’ lii kum yioyic migi m’umbe. Man etieko pacu gbur ku ponji. 7E elwong’o juapar wi ario i bang’e, emaku orogi de ario ario; emio igi ng’ol de kum tipo m’ucido; 8eng’oio igi de ya ku giting’ gin moko mi woth migi, ndhu uluth kende; kadok kwen, kadi akpo, kadok sente de i gbethe migi; 9wara re ma giroi: man, ewacu ya ku gikend kanzu ario. 10Man ewacu igi kumae, Ka ma tek wumondo i ie i ot, wubed keca ram wuai ko woko. 11Ka ma tek jujolowu i ie ngo, man giwinjowu ngo, ka wuai keca, wukir utur ma the tiendwu woko ni lembatuca igi. 12E giai, giyero ya dhanu gilok cwinygi. 13Giwodho pajogi dupa, giwiro mo de kum dhanu dupa ma kumgi lith, gikeyo kumgi de. 14E ubimo Herode winjo pire; kum nyinge yik: e ewacu kumae, Yohana ma Jabaputisi cer ku kind ju m’utho, ka kumeno tego maeni betimbre i ie. 15Ento jumange wacu kumae, En e Elia. Jumange wacu kumae, En e jabila calu acel ma kind jubila. 16Ento Herode, kan ewinjo pire, ewacu kumae, Yohana, m’athumo wie, ecer. 17Kum en e Herode eoro jucijumaku Yohana, jutwie de i odkol pi Herodia, ma ci umin mire ma Filipo: kum egome. 18Kum Yohana wacu ni Herode kumae, Cik uyio ngo iri ya ibed ku ci umeru. 19E Herodia kece, eyenyo enege; ento ecopo ngo; 20kum Herode lworo Yohana, kum eng’eyo nia en e ng’atu ma pwe, ma leng’ de, man egwoke cu. Kan ewinje de, ie pido dit; ewinje de ku mutoro. 21E ka ceng’ m’ubedo ber ni Herode wok, en e ceng’ ma yang’ junyole i ie etedo cemo mir uthieno ni judongo pare, ku jego pare ma dongo, ku judongo m’i ng’om Galilaya de; 22e ka nya Herodiane mondo emiel de, enyayu mutoro i Herode ku ju ma gibedo gikugi dhu cam de; e ubimo wacu ni nyaku kumae, Kwai gin ma tek iyenyo, e abimio iri. 23Man eyero ire ku kwong’ kumae, Gin ma tek ikwaya ko, abimie iri, kadok ng’et ker para. 24E ewok woko, ewacu ni min mire kumae, Akwai ang’o? Ewacu kumae, Wi Yohana ma Jabaputisi. 25E eni eni emondo tho bang’ ubimo, ekwayu, ewacu kumae, Ayenyo ya imi ira wi Yohana ma Jabaputisi kawono i atangla. 26E can unego ubimo dit apila; ento kum kwong’ pare, ku ju ma gibedo dhu cam de, eyenyo ngo ekwere. 27E sieu maeni ubimo oro asikari acel ma kind ju ma kuro kume, eng’olo de ya ecidh ekel wie: man ecidho ethumo wie i odkol, 28man ekelo wiene i atangla, emie de ni nyaku; nyaku ke mie ni miu mire. 29E ka julubne giwinjo pire, gibino giting’o avuje, man gikethe i odliel. 30E jukwenda gicokri karacelo ba Yesu: e giyero ire pi gin ceke ma gitimo, ku gin ceke ma giponjo de. 31Man ewacu igi kumae, Wun giwu wubin cen ka ma ngele, wuyom tundu. Kum dupa gicikubino gicidho de, e kinde moko mbe igi kadok ma gicam ie cam de. 32E giai ku combo gicidho i ka ma ngele kakendgi. 33Dhanu de neno gibecidho, dupa de ging’eyogi, man giringo karacelo kuca ku i adhura ku tiendgi, e gilar gitundo igi. 34Eai woko eneno udul dhanu ma dit de, e ngisi nege i kumgi, kum gibedo calu rombe ma jakwac migi mbe: man emaku ponjogi ku gin dupa. 35Kinde ma ceng’ uvoc, julubne gibino i bang’e, giwacu kumae, Kakeni bedo ng’om ngele, kawono ceng’ de voc; 36lalgi, kara gicidh i thim man i pacu gbe gbe, ging’ieu giracama moko igi gigi. 37Ento eloko lembe ewacu igi kumae, Wumi igi cam. Giwacu ire kumae, Waciwang’ieu igi kwen ku denarii dak ario, wami igi gicami? 38Ewacu igi kumae, Lungu kwen adi ma ni i beng’wu? wuci wunen. Ka ging’eyo, giwacu kumae, Abic, ku rec ario. 39Eng’olo igi nia kagi ceke gibed piny wi lum ma numu ni ungu ungu. 40E gibedo piny ku thek, man dak, man pier abic. 41Man eting’o lungu kwen abic ku rec ario de, e eneno malu i polo, emio mugisa, man eng’weko i kwen de; emio ni julub giketh i wang’gi; rec ario de epoko i kindgi ceke. 42E kagi ceke gicamu, giyeng’ de. 43Gikwanyu kodine, upong’o katoko apar wi ario, ku mi rec bende. 44Ju ma gicamu lungu kwen gi jumaco rubanga abic. 45E aruca ruca nica ecwalu julubne giidho i combo, gicidho lokaca i wang’e Bethsaida, kinde ma en ebelalu udul dhanu woko. 46E kan ecikogi, eidho wi got nirwo. 47E ka piny udoko uthieno, combo wok i die nam, edong’ e kende i ng’om. 48Man kan eneno gibesendri ku kiewo, kum yamu beai yor i wang’gi, e ecidho i bang’gi ku diewor mi kur mir ang’wende, m’ebewotho ko ku wi pi; calu ebeyenyo kadhugi: 49ento gin, ka ginene m’ebewotho ku wi pi; giwacu nyo en e ulelu, e gikok akoka; 50kum kagi ceke ginene, e cwinygi ng’abre. Ento eni eni eweco i bang’gi, ewacu igi kumae, Cwinywu bed tek: meni an; lworo kud unegwu. 51E eidho i bang’gi i combo; yamu de cungo: man igi wang’ hi yor i igi; 52kum ging’eyo ngo pi lungu kwen, ento adundegi doko nwang’. 53E ka gikadhu lokaca, giwok dhu wath i ng’om Genesareti, man ginyiko dhu wath. 54E ka giai kud i combo, e ndhu ndhu nica dhanu ging’eye. 55e giringo i ng’ombuno ceke gbe gbe, gimaku yeyo dhanu ma kumgi lith ku kavuto migi, ka ma giwinjo eni i ie. 56Ka ma tek emondo i ie ceke, i pacu, kadi i adhura de, kadi i thim, gipielo ju ma kumgi lith i katali, man gikwaye ya gimul kadok dhu kendi pare ci: e ju m’umulo kume ceke kumgi kei kubang’gi kubang’gi.

will be added

X\