Mark 5

1Man giwok loka nam, i ng’om mi Jugadareni. 2E kinde m’eloro kud i combo, e aruca ruca nica girombo ku ng’atu m’uai i odliel ma wie ju tipo m’ucido, 3ma kabedo pare ni i odliel: ng’atu moko mbe ma copo twie kendo, ungo, kadok ku nyoro de ngo; 4kum jubejugoyo kongo i tiende jutwie ku nyoro de bang’ udul, e erwadu nyoro, eturo i kongo de nziki nziki: ng’atu moko mbe de ma tek ma dwoke mol. 5Thiri thiri, diewor ku dieceng’ de, i odliel i gudi de ebedekok akoka, man ethumbre gire ku kidi. 6E kan eneno Yesu ku bor, eringo aringa erwo de i bang’e: 7ekok ku dwande ma tek, ewacu kumae, Lembe mwa ang’o wakudi, Yesu, in i Wod Mungu ma Malu Ngbir. Aketho ikwong’o ba Mungu, kud imi ira ndiba. 8Kum ewacu ire kumae, Wok woko kud i ng’atuno, in i tipo m’ucido. 9Man epenje kumae, Nyingi ng’a? En ke ewacu ire kumae, Nyinga Udul; kum wa dupa. 10E epaku dhoge ire ma tek ya kud eriemgi woko kud i ng’ombuni. 11Nwang’u udul kul ma dit ubecamu kor got. 12E gikwaye, giwacu kumae, Orwa i kul, kara wamond i igi. 13E eyio igi. Tipo m’ucido de giwok woko, gimondo i kul: e udul ukonjre kro ku ka ma lung’ i nam, welgi yenyo romo rubanga ario; man githung’ i pi. 14E ju m’ukwayugi giringo giyero lembene i adhura, ku i thim de. E gibino nineno gin m’utimbre. 15E gibino ba Yesu, gineno ng’atu ma naka wie ju pajogi de bedo, ekendo kendi pidoie de cu, en e ng’atu ma naka wie ju udul: e lworo negogi. 16E ju ma gineno maeni giyero igi ram etimbre ko ni ng’atu ma naka wie ju pajogi, man pi kul. 17E gimaku kwaye nia eai woko i kieu migi. 18E kan ebeidho i combo, ng’atu ma naka wie ju pajogi kwaye ya gibed gikude. 19Man eyio ire ngo, edong’ ewacu ire kumae, Dok i ot peri ba jurimbi, yer igi rama Rwoth utimo ko gin ma dit iri, man rama kisa nege ko i kumi de. 20E ecidhone emaku rweyo i Dekapoli rama Yesu timo ko tic ma dit ire: e dhanu ceke igi wang’ lii. 21E ka Yesu kadhu kendo lokaca ku combo, udul ma dit gicokri i bang’e; man ebedo dhu nam. 22Nie ng’atu acel ma kind judongo m’i kacokri ma nyinge Yairo, bino; e kan enene de, epodho the tiende, 23ekwaye de ma tek, ewacu kumae, Nyathi nyara dhingo tho: akwei, ya ibin iketh cingi i kume, kara kume kei, ebed kwo de. 24E gicidho gikude; udul dhanu ma dit de gilubo ng’eye, man gicungri acung’a i kume. 25Man dhaku moko, ma rimo mol i kume doko rundi apar wi ario, 26man esendre dit ba jukeikum dupa edaru piny pare ceke de, ento eloko kamoko ngo, ento edoko rac ma sagu, 27e kan ewinjo pi Yesu, ebino ku kind njuru dhanu ma yor i ng’eye, emulo kendi pare. 28Kum ewacu kumae, Tek amulo kendi pare ci, e kuma bikei. 29E ndhu ndhu nica dhu rimbe ng’ol ndhu; eng’eyo de kud i ie nia kume kei ni tho pare. 30E aruca ruca nica Yesu, m’ung’eyo i ie gire ya tego ai i bang’e wok woko, elokre kind njuru dhanu, ewacu kumae, Ng’a mulo kendi para? 31Julubne giwacu ire kumae, Ineno udul dhanu ma gicungri i kumi, man iwacu kumae, Ng’a mulo kuma? 32E eneno kun ku kun kara enen ng’atu m’utimo gin maeno. 33Ento dhaku ma lworo benege kume de bemiel, m’eng’eyo gin m’utimbre ire, ewok epodho piny i wang’e eyero ire lemandha ceke. 34En ke ewacu ire kumae, Nyara, yioyic peri e m’ukeyo kumi; ci ma cwinyi kwio, kumi bed leng’ de ni tho peri. 35Kinde ma fodi ebeweco, ju m’uai ba jadit mi kacokri, giwacu kumae, Nyeri tho: isendo Japonji nedi kendo? 36Ento Yesu, m’uwinjo lembe ma juyero, ewacu ni jadit mi kacokri kumae, Lworo kud unegi, yi kende. 37Man eyio ngo ya ng’atu moko lub ng’eye, ndhu Petro, man Yakobo, man Yohana m’umin Yakobo. 38E gibino giwok ba ot pa jadit mi kacokri; man eneno yakni, ku dhanu dupa m’ubeywak m’ubewero wejawu de dit. 39Kan emondo, ewacu igi kumae, Nedi wutimbru swa wuywak de? nyathinuno tho ngo, ento enindo aninda. 40Gidong’ ging’iere ang’iera gicaye ko. Ento en kan ewodhogi ceke woko, egamu won nyathin ku min mire de ku ju ma gibedo gikugi bende, e gicidho ka ma nyathin ni ie. 41Emaku nyathin ku cinge, ewacu ire kumae, Talitha kumi; thelembene, ka juloke edoko kumae, Nyane, awacu iri kumae, Ai malu. 42E ka dhoge nica nyano ai malu, ewotho; kum nwang’u rundi pare doko apar wi ario. E eni eni igi wang’ lii ku wang’uic ma dit. 43Man eng’olo igi ma tek nia ng’atu moko kud ung’ei maeni: e eng’olo ya jumi ire cam moko ecam.

will be added

X\