Mark 4

1Man emaku ponjo dhu nam kendo. Udul dhanu ma dit apila de gicokri i bang’e, ketho eidho i yei, man ebedo i pi; udul dhanu ceke bedo dhu pi i ng’om. 2E eponjogi ku lembe dupa m’abola, ewacu igi kumae, i ponji pare, 3Wuwinji: Nen, jacoikodhi cidho nicoyo: 4etimbre de, kan ecoyo, nia kodhi moko podho dhu yo, winyo de bino gicame. 5Mange de podho i ng’om ma ie ju kidi, ka ma ng’om dit ungo i ie; e eni eni ecobo, kum dhu ng’om thuth ungo: 6man ka ceng’ uidho, erewe; kum ulage mbe, ener woko. 7Mange ke podho kind ukudho, ukudho dongo, e edeye, man ecego nyinge ngo. 8Mange ke podho i ng’om ma ber, ecego nyinge de, edongo enyai de; man ecego nyinge, acel bang’ pier adek, man acel bang’ pier abusiel, man ke acel bang’ dak. 9Man ewacu kumae, Ng’atu ma ithe nuti m’ewinjo ko, wek ewinji. 10E kan ebedo kende, ju ma gibedo i vute ku juapar wi ario gipenje kum lembabolane. 11Man ewacu igi kumae, Giramung’a mi ker pa Mungu jumio iwu: ento ni ju ma gini woko, gin ceke timbre ku lembabola: 12kara anena gicopo neno, endre ging’ei ngo; awinja de gicopo winjo, endre ging’ei ngo; kara ku gilokri kendo, man ku juwek dubo migi woko. 13Ewacu igi kumae, Wung’eyo lembabola maeni ngo? wubing’eyo lembabola ceke nenedi? 14Jacoikodhi coyo lembe. 15Ju maeni gi ju ma gibedo dhu yo, ka ma jucoyo ie lembe; ka giwinjo de, e ndhu ndhu nica Jok ubino, ekabu lembe majucoyo i igi woko. 16Ju maeni de kumeno gi ju ma jucoyo ka ma ie ju kidi, ma, ka giwinjo lembe, ndhu ndhu nica gijole ku mutoro; 17e gibedo umbe ulaggi i igi gigi, ento gibedo nyangba; macen, ka masendi kadi ragedo wok kum lembe, e eni eni gikier. 18Jumange ke gi ju ma jucoyogi kind ukudho; joni gi ju m’uwinjo lembe, 19e pidoic mi giki mi ng’om, kud awondi mi lonyo, kud awanya ma rac mi gin mange m’umondo i igi, gideyo lembene, man ecego nyinge ngo. 20Ju maeni ke gi ju ma jucoyogi i ng’om ma ber; gi wagi ju m’uwinjo lembe, gijole de, man gicego nying’gi, acel bang’ pier adek, acel bang’ pier abusiel, acel bang’ dak. 21Man ewacu igi kumae, Jukelo thala ya juum the katoko, kadi the kavuto, ma jukukethe wi kathere ngo? 22Kum gin moko mbe ma pandre, ento kara enyuthre, kadok ma mungre de, ento kara ewok ka ma leng’. 23Tek ng’atu moko ithe nuti m’ewinjo ko, wek ewinji. 24Ewacu igi kumae, Wubed ku weng’wu kum gin ma wuwinjo: ku mukero ma wuporo ko e ma jubiporo ko iwu bende: jubimedo iwu mange de. 25Kum ng’atu ma tek ubedo ko, jubimio ire: man ng’atu ma kubedo ko ngo re, jubikabu woko i bang’e cil maeno m’ebedo ko. 26Man ewacu kumae, Ker pa Mungu de bedo kumeno, calu tek ng’atu moko bolo kodhi i ng’om; 27man enindo eai de diewor ku dieceng’, e kodhi cobo etwi de, eng’eyo ngo maram etwi ko. 28Ng’om ucego nyinge gire; elar etwi, macen eng’ok, e kan ecego nyinge thur. 29Ento ka nyinge cek, e eni eni eketho pala i kume, kum palacam uwok. 30Man ewacu kumae, Wabiporo ker pa Mungu kud ang’o? kadi wabinyuthe ku lembabola manedi? 31E calu nying atingli, ma ka jucoyo i ng’om, kadok ebedo nok ma sagu kodhi ceke m’i ng’om, 32ento ka jucoye, edongo de, man edoko dit ma sagu uboko ceke, elodho jange ma dit de; ketho nia winyo ma kor polo gicopo bedo the tipone. 33Eyero lembe igi ku wagi lembabola ma kumeni dupa, calu ma winjre igi; 34man eyero igi ngo ma ku lembabola ngo: ento ni julubne ekoro igi there ceke nyalwe. 35Ceng’ nica, ka piny udoko uthieno, ewacu igi kumae, Wakedhu lokaca. 36E giweko udul dhanu, gicidho kugi ku rambe nica i combo. Nwang’u combo mange de ni i bang’e. 37E wavuvu ma dit utuk, mukura de maku core i combo, ketho ya combo maku pong’. 38En ebedo yo the combo, enindo de wi usau: e gicewe, giwacu ire kumae, Japonji, en e lem moko ngo iri ya warwinyi? 39E eceu, ejuko yamu, ewacu de ni nam kumae, Cungi, bed ling’. E yamu cungo. piny de cungo ti. 40Ewacu igi kumae, Lworo negowu nedi? fodi yioyic umbe kudu? 41E lworo negogi dit apila, man giwacu gigi kumae, Ka kumeno ng’atuni ng’a, ma cil yamu ku nam de giwore e?

will be added

X\