Mark 3

1Man emondo kendo i kacokri: e ng’atu moko ni keca ma cinge lindre. 2E gikie, tek ebicange i ceng’ sabatu: kara gidote. 3Man ewacu ni ng’atu ma cinge lindre kumae, Cung i diere. 4Ewacu ni joca kumae, Cik uyio i ceng’ sabatu ya jutim beri, kadi raci? bodho kwo, kadi nego? Ento giling’. 5E kan eng’iogi gbe ma ng’ecwiny unege, ma can de nege kum adundegi m’udoko nwang’, ewacu ni ng’atuno kumae, Riei cingi. E erieye; man cinge dok kakare. 6Jufarisayo de giwok woko, man aringa ringa nica gimaku poro lembe giku Juherodiano i kume, rama gicopo nyothe ko. 7E Yesu giku julubne giai gicidho dhu nam: man udul dhanu ma dit giai i Galilaya gilubo ng’eye; ku i Yahudi de, 8ku i Yerusalem de, man ku i Idumaya, ku ma loka Yordan, ku ma ng’et Turo ku Sidon de, udul dhanu ma dit ma giwinjo gin ma dit m’etimo, gibino i bang’e. 9Man eyero ni julubne, nia nyathi yei ubed ayika ire ni njuru dhanu, kara ku gidie: 10kum ekeyo kum dhanu dupa; ketho dhanu ceke ma gi weg tho gicungri i kume kara gimul kume. 11Tipo m’ucido de, ka ginene, gipodho piny i wang’e, gikok akoka, giwacu kumae, In i Wod Mungu. 12Man eng’olo igi ma tek ya ku giketh jung’eye. 13Man eidho malu wi got, e elwong’o ju ma ie yenyo en i bang’e; e gicidho i bang’e. 14Eketho juapar wi ario de kara gibed gikugi, kara eorgi gicigiyer, 15man gibed ku ng’ol ma giwodh ko pajogi: 16Simon ecaku nyinge Petro; 17Yakobo ma wod Zebedayo, ku Yohana m’umin Yakobo; e ecaku nying’ joni Boanerge, thelembene kumae, Wot morpolo: 18man ke Andrea, ku Filipo, ku Bartolomayo, man Matayo, man Thoma, man Yakobo, wod Alfayo, man Thadayo, ku Simon ma Jakanani. 19man Yuda Iskariote, m’ucibe bende. Man emondo i ot. 20E udul dhanu gicokri karacelo kendo, ketho nia kadok kwen de gicopo camu ngo. 21Ka jurimbe giwinjo maeni, giwok gicimake: kum giwacu kumae, Abelu make. 22E jugorcik ma giai Yerusalem giloro piny giwacu kumae, Wie ju Beelzebul, man ke kumae, Ebewodho pajogi ni kum jadit mi pajogi. 23Man elwong’ogi i bang’e, ewacu igi ku lembabola kumae, Jok copo wodho Jok nenedi? 24Man tek ker upokre i kume gire, kerne copo cungo ngo. 25Man tek ot upokre i kume gire, ode bicopo cungo ngo. 26Man tek Jok uai i kume gire, epokre de, ecopo cungo ngo, ento ejik. 27Ento ng’atu moko copo mondo ngo i ot pa ng’atu ma tek, enyoth piny pare de, ma k’elar etwio ng’atu ma tek ungo; kan ebilund nyotho ot pare. 28Andha awacu iwu kumae, Dubo mi wot dhanu ceke, jubiweko woko igi, man lembacidi migi ma gicido ko Mungu de: 29ento ng’atu ma tek biyero lembacidi kum Tipo Maleng’ dubo pare jubiweko woko ire ki ngo, ento dubo ma rondo ku rondo ni i wie: 30kum giwacu kumae, E won tipo m’ucido. 31E min mire ku utumin de gibino; man gicungo woko, gioro lembe i bang’e, ma gilwong’e ko. 32Udul dhanu de gibedo gitieke; giwacu ire kumae, Nen, meru ku utumeru gini woko giyenyi. 33E eloko lembe igi ewacu kumae, Ma ku utumira de gi ng’agi? 34Kan eng’io ju ma gibedo gikugi, ewacu kumae, Nen, ma ku utumira de! 35Kum ng’atu ma tek bitimo yeny ma i Mungu yenyo, ng’atuca en e umira, ku nyamira, ku ma de.

will be added

X\