Mark 2

1Yo ng’ei ceng’ moko kan emondo i Kapernaum kendo, juwinjo nia eni i ot. 2Dupa gicokri karacelo, ketho kabedo mbe igi kendo cil dhugola de mbe: man eyero igi lembe. 3E gibino, ma gikelo ng’atu ma won tho ma nego kum nding’ i bang’e, ma juang’wen giyeye. 4E ka gicopo tundo ceng’ni i bang’e ngo ni njuru dhanu, e giyeco wi ot kpa ka wie: ka giyeco, giluro ng’atu ma won tho ma nego kum nding’ ku kavuto m’evuto i wie. 5Ka Yesu neno yioyic migi ewacu ni won tho ma nego kum nding’ kumae, Wodo, dubo peri juweko woko. 6Ento jumoko ma kind jugorcik nuti ma gibedo keca, ma giporo lembe i adundegi kumae, 7Ng’atuni weco kumeno nedi? eyero lembacidi kum Mungu: ng’a ma copo weko dubo woko ndhu ng’atu acel, en e Mungu? 8E eni eni Yesu, m’eng’eyo i cwinye nia giporo lembe i igi gigi, ewacu igi kumae, Wuporo lembe maeni i adundewu nedi? 9Makani ma yot ma sagu, wacu ni won tho ma nego kum nding’ kumae, Dubo peri juweko woko; kadi wacu kumae, Ai malu, ting’ kavuto peri iwothi? 10Ento kara wung’ei nia Wod dhanu bedo ku ng’ol wi ng’om mi wekodubo woko (ewacu ni won tho ma nego kum nding’ kumae), 11Awacu iri kumae, Ai malu ting’ kavuto peri, icidh i ot peri. 12Man eai malu, eting’o kavuto tho, e ewok woko i wang’gi ceke; ketho kagi ceke igi wang’ lii, man giyungo Mungu, giwacu kumae, Naka fodi waneno wagi eni ki ngo. 13E ecidho kendo dhu nam; udul dhanu ceke gicidho i bang’e de, e eponjogi. 14Kinde m’ebekadhu, eneno Lawi ma wod Alfayo m’ubedo ka ma jujoko ie ajok, man ewacu ire kumae, Lub ng’eya. E eai malu elubo ng’eye. 15E etimbre, nia ebedo dhu cam i ot pare man weg ajok ku judubo dupa gibedo piny giku Yesugi man julubne: kum gi dupa, man gilubo ng’eye. 16Jugorcik mi Jufarisayo ka gineno nia gibecamu ku judubo ku weg ajok de, giwacu ni julubne kumae, Nedi ecamu emadhu de ku weg ajok ku judubo de? 17Ka Yesu winjo maeni, ewacu igi kumae, Ju ma kumgi leng’ can jakeikum negogi ngo, ento ju ma kumgi lith re: abino lwong’o weg bedopwe ngo, ento judubo re. 18Julub Yohana ku Jufarisayo de gibekwiro cam: e gibino giwacu ire kumae, Julub Yohana ku julub Jufarisayo gikwiro cam nedi, ka julubni ke gikwiro cam ungo e? 19Yesu wacu igi kumae, Wot won ambadha gicopo kwiro cam, ma fodi won ambadha ginuti gikugi? ma fodi ginuti giku won ambadhagi, gicopo kwiro cam ungo. 20Ento ceng’ bibino, ma jubikabu ie won ambadha woko kud i bang’gi, e gibilund kwiro cam i ceng’ maeno. 21Ng’atu moko mbe ma kwoyo wang’ kendi m’uti ku kurembo ma nyen: kara kurembo bongu ma nyen nica ma juthube ko kud elund eyec m’uti, edwoke rac ma sagu. 22Ng’atu moko mbe de ma piko pigulok ma nyasa i usaupigulok m’uti; kara pigulok kud ung’eny usaupigulok, pigulok de kud uoi, usaupigulok kud unyothre: ento pigulok ma nyasa jupiko i usaupigulok ma nyen. 23Man etimbre, nia ebekadhu ku kind podhocam i ceng’ sabatu; e julubne, ka gibecidho, gimaku jaku jang cam. 24Jufarisayo giwacu ire kumae, Nen, nedi gitimo maeno ma cik uyio ngo ceng’ sabatu? 25Man ewacu igi kumae, Fodi wusomo ngo gin ma Daudi timo, ka canpiny unege, ku kec de, en, ku ju ma ginuti gikugi de? 26Maram emondo ko i ot pa Mungu kende ma Abiathar en e jalam ma dit, ecamu kwen mir anyutha, ma cik uyio ngo ya jucam ndhu ni julam, man emio de ni ju ma ginuti gikugi? 27Man ewacu igi kumae, Jutimo ceng’ sabatu ni dhianu, jutimo dhanu ngo ni ceng’ sabatu: 28kum kumeno Wod dhanu en e rwoth cil mi ceng’ sabatu.

will be added

X\