Mark 15

1E pio pio kugweno julam ma dongo ku judongo man jugorcik, ku dilo ceke, gipido lembe, man gitwio Yesu, gitere, gimie ni Pilato. 2E Pilato penje kumae, In i Ubimo mi Juyahudi? Man eloko lembe ewacu ire kumae, Iwacu. 3Man julam ma dongo gidote kum gin dupa. 4E Pilato penje kendo, ewacu kumae, Idwoko lembe moko ngo? nen maram gibedoti ko ku gin dupa. 5Ento Yesu dwoko lembe moko kendo ngo; ketho i Pilato wang’ lii. 6Nwang’u naka ebedegonyo igi jakol acel, ma gikwayu i bang’e i agba. 7Nwang’u ng’atu acel nuti ma nyinge Baraba, m’evuto atwia ku ju m’uthubo ali, gi ju ma i aline ginego nek. 8E udul dhanu gicidho malu man gimaku kwaye ya etim calu ma naka ebedetimo igi. 9E Pilato dwoko lembe igi, ewacu kumae, Wuyenyo agony iwu Ubimo mi Juyahudi? 10Kum eng’eyo nia kumira e m’uketho julam ma dongo gimie. 11Ento julam ma dongo gicuno lembe i udul dhanu, ya maku egony Baraba igi. 12Pilato loko lembe kendo ewacu igi kumae, Ka kumeno abitimo ang’o kum ng’atu ma wulwong’o Ubimo mi Juyahudi? 13Gikok kendo kumae, Gure. 14E Pilato wacu igi kumae, Nedi, etimo ang’o ma raci? Ento gikok apila kumae, Gure. 15Man Pilato, m’eyenyo lembe cung ber i udul dhanu, egonyo igi Baraba, emio Yesu de, kan edaru fode ku del, ya jugure. 16E asikari gipeye woko i katitlembe, ma en e Odtiti; e gilwong’o udul juwagi ceke karacelo. 17Man gironye ku bongu m’uluga, gikiedo jamkermiwic mir ukudho de, gikethe i wie; 18e gimaku mothe kumae, Moth iri, Ubimo mi Juyahudi! 19E gigoyo wie kud undodi, ging’ulo lau i kume, girum wi cong’gi de girwo ire. 20E ka gidaru ng’ale, giwodho kendi m’uluga, man gironye ku kendi pare. E gipeye woko, gicigigure. 21Man gicung’o ng’atu acel m’ubekadhu akadha, Simon ma Jakurene, m’uai i thim, m’e won Iskander giku Rufo, ya gici gikugi, kara eyei yen m’athara pare. 22E gikele ka ma julwong’o Golgotha, ma ka juloke edoko kumae, Karupokowic. 23E gimio ire pigulok m’ujebre ku yath: ento egame ngo. 24Man gigure, gipoko kendi pare i kindgi, gigoye ku jara, kara ginwang’ ju ma bigame. 25E kinde ma saa doko adek, gigure. 26E karamblembe mir adote pare jugoro yo malu kumae, UBIMO MI JUYAHUDI. 27Man jugure karacelo ku weg ayeki ario; acel i cinge ma yor acwic, acel ke yor acam. 28Man lembagora pa Mungu timbre kakare, m’uwacu kumae, Man jukwane karacelo ku judubo. 29Ju ma gibecikukadhu de gicaye, giyengo wigi de, giwacu kumae, Euo! in m’inyotho hekalu, m’igome de ceng’ adek, 30leri giri, ilor piny de ku wi yen m’athara. 31Julam ma dongo de gicaye kumeca i kindgi gigi ku jugorcik, giwacu kumae, Elaru jumange; ecopo lare gire ngo. 32Wek Kristu m’Ubimo pa Israel, ulor piny ku kor yen m’athara kawono, kara wanen wayi de. Ju ma jugurogi gikugi de gicaye. 33E kinde ma saa mir abusiende wok, mudho yutho ng’om ceke cil i saa mir abung’wende. 34E kinde ma saa doko abung’wen Yesu kok ku dwande ma dit kumae, Eloi, Eloi, lama sabakthani? ma, ka juloke edoko kumae, Munguna, Munguna, ikuna nedi? 35Jumoko ma gicungo i vute, ka giwinjo maeni, giwacu kumae, Nen, elwong’o Elia. 36E ng’atu acel uringo, epong’o ucoi pong’ ku picwa, ekethe de wi undodi, man emio ire emadhi, ewacu kumae, Wukowuweki; wanenu tek Elia bino wodhe piny. 37E Yesu kok ku dwande ma dit, man eweko cwinye kadhu. 38E kusika mi bongu m’i hekalu yec dra doko ario ugambre i wie cik i there. 39E ka jego, m’ucungo keca i vute, uneno nia eweko cwinye kadhu kumeca, ewacu kumae, Andha ng’atuni en e Wod Mungu. 40Nwang’u mon moko de nuti keca ma gibenene ku cen: Mariamu Magdalene, giku Mariamu ma min Yakobo ma nok ku Yose de, man Salome de gini i kindgi; 41ma, kinde m’eni i Galilaya, gilubo ng’eye, gibegitimo ire bende; ku mon mange de dupa ma gibino kugi malu Yerusalem. 42E ka piny udoko uthieno, kum en e Yikopiny, en e kumeni, ceng’ m’ular uwok ni ceng’ sabatu, 43e Yusuf ma Arimathaya, en e ng’atu m’i dilo ma won yung, ma en bende ebekuro ker pa Mungu; emondo ba Pilato ku tegocwinye, man ekwayu avuj Yesu. 44E Pilato ie wang’ lii tek edaru tho: man elwong’o jego i bang’e epenje tek etho ande con. 45E kan eng’eyo maeni ba jego eyio avuje ni Yusuf. 46Man eng’iewo bongu ma nwang’, man efudhe piny, eboye ku bongu ma nwang’ne, man ekethe i liel ma juroko i cana; man eng’ielo kidi kum dhugola mi liel ma juroko i cana. 47E Mariamu Magdalene giku Mariamu ma min Yose gineno ka ma jukethe i ie.

will be added

X\