Mark 13

1E kan eai i hekalu, jalubne acel uwacu ire kumae, Japonji, nen, maram kidi ku udi de bedo ko! 2E Yesu wacu ire kumae, Ineno udi ma dongo maeni? kidi acel de mbe ma bibedo wi wadi ma jubibolo piny ungo. 3E kan ebedo piny wi got Zeituni yo ba hekalu, Petro giku Yakobo man Yohana kud Andrea gipenje nyalwe kumae, 4Yer iwa, gin maeni bitimbre awene? ang’o ma bibedo ni giranyutha ka gin maeni ceke dhingo timbre? 5E Yesu maku yero igi kumae, Wukuru, kara ng’atu moko kud uwingwu. 6Dhanu dupa bibino i nyinga, gibiwacu kumae, An a en; man gibiwingo dhanu dupa. 7E ka wubiwinjo pir ali ku rwong ali de cwinywu kud ung’abre: gin maeni bikotimbre be; ento kajikne fodi. 8Kum thek bijai kum thek wadi, ker de kum ker wadi; digidi de bibedo nuti tak tak; ndru de bipodho: gin maeni en e landu wi can. 9Ento dong’ wukuru giwu: kum jubikethowu i wang’ dilo i kacokri de jubifodowu; wubicungo i wang’ jubim ku ju m’ubimo de pira, ni lembatuca igi. 10Man lembanyong’a ma juboth ko jubikolar yero be ni thek ceke. 11E ka gipeyowu ba titi, gimiowu de, cwinywu kud ular uring kum lembe ma wubiyero: ento gin ma tek bimire iwu i saa maeno, wuyer maeno; kum en e wun ungo m’uyero, ento Tipo Maleng’. 12Man umego biting’o umego wang’ tho, won nyathin de nyathin pare; nyithindho de bijai kum junyodo migi, man gibiketho juneggi. 13E dhanu ceke gibidaguwu kum nyinga: ento ng’atu ma biciro cil i kajikne, ng’atuno e ma biboth. 14Ento ka wuneno gin mir adegi mi nyoth ucungo ka ma maku kud ecung i ie (e dong’ ng’atu m’usomo ung’ei), i nindo maeni dong’ ju ma gini i Yahudi giring i got: 15man ng’atu ma ni wi ot kud elor piny, kadi kud emond i ie, niwodho gin moko ma ni i ot pare: 16man ng’atu ma ni i podho kud edwog nigamu kanzu pare. 17Ento can wi mon ma igi nuti ku mon ma nyithindho dhodhogi i ceng’ maeno! 18Wurwo de kara kud ebed i nindo mi koyo. 19Kum masendi bibedo nuti i ceng’ maeno, ma wagi maeno ubedo umbe ugambre i thangambere mi giracwia ma Mungu cwio cil ku kawono nini de, man ebibedo nuti kendo de ngo. 20Man tek Rwoth kujwigo ceng’ne ngo, kuno di kum moko mbe m’uboth; ento kum ju ma jugoyo nying’gi, m’efoyo, ejwigo ceng’ne. 21I nindo maeno tek ng’atu moko biwacu iwu kumae, Nen, Kristu eni: kadi, Nen, kuca: kud wuyi: 22kum ju ma Kristu mi ndra ku jubila mi ndra de gibiwok, gibinyutho giranyutha ku musana de, kara giwing ko ju ma jugoyo nying’gi de, tek ecopre. 23Ento wukuru: nen, alar ayero iwu gin ceke. 24Ento i ceng’ maeno, yo ng’ei masendi maeno, ceng’ biyutho, dwi de birieny ungo, 25cero de bipodho kud i polo, tego mi polo de biyengre. 26E i nindo maeno gibineno Wod dhanu bebino i afuru ku tego ma dit ku dwong’ bende. 27Man i nindo maeno ebioro malaika, man ebicoko jupare ma jugoyo nying’gi karacelo ku yo the yamu ang’wen, kud i tung’ ng’om ku tung’ polo de. 28Nie wumak ng’eyo lembabola mir ulam bang’ ulam: kinde ma jange doko yom, elodho ithe de, wung’eyo nia cwir udhingo: 29e kumeno wun bende, ka wuneno gin maeni betimbre, wung’ei nia eni ceng’ni, cil dhugola. 30Andha awacu iwu kumae, Dhanum’utuk maeni bikadhu woko ngo, ma fodi gin maeni ceke kutimbre kakare ngo: 31polo ku ng’om de bikadhu woko: ento lembe para bikadhu woko ngo. 32Ento ceng’ maeno kadi saa maeno ng’atu moko mbe m’ung’eyo, cil malaika mi polo, kadok Wod de, ento Wego re. 33Wukuru, wuki man wurwo: kum wung’eyo kanindone ngo. 34En e calu ng’atu moko, m’uci wotho i ng’om mange, m’eweko ot pare, m’emio ng’ol de ni jumiru pare, ni ng’atuman tic pare man tic pare, eng’olo ni jakurdhugola de nia eki. 35Ka kumeno wuki: kum wung’eyo ngo kabino pa rwoth ma won ot, tek en e uthieno, kadi diewor ma ling’, kadi i kok pa gweno, kadi kugweno; 36kara tek ebino pio kud enwang’ wunindo. 37Man gin m’awacu iwu awacu ni dhanu ceke, Wuki.

will be added

X\