Mark 11

1Ka gidhingo Yerusalem, ba Bethfage ku Bethania de, ba got Zeituni, eoro kind julubne ario, 2ewacu igi kumae, Wucidh i pacu ma i weng’wu: e pio pio ka wumondo i ie, wubinwang’u nyathi kana m’ubedo atwia, ma ng’atu moko fokubedo i wie ngo; wugonye, wukele. 3Tek ng’atu moko wacu iwu kumae, Wutimo maeni nedi? wuwac kumae, Cande ni i kum Rwoth; e ndhu ndhu nica ebiore keni kendo. 4E gicidho, ginwang’u nyathi kana bedo atwia dhugola yo woko i gengi; gigonye de. 5Jumoko m’ucungo keca giwacu igi kumae, Wutimo ang’o, ma wubegonyo ko nyathi kana e? 6Gin ke giwacu igi calu ma Yesu wacu: e giwekogi gicidho. 7E gikelo nyathi kana ba Yesu, gipedho kendi migi de i wie; ebedo de i wie. 8Dhanu dupa gipedho kendi migi i wang’ayo; jumange ke jangyen, ma gitong’o i thim. 9Ju m’utelo yo, ku ju m’udong’ cen de, gikok akoka kumae, Hosana; mugisa ni ng’atu m’ubino ku nying Rwoth: 10Mugisa ni ker m’ubino, ker pa wegwa ma Daudi: Hosana malu ngbir. 11E emondo i Yerusalem, i hekalu; e kan eneno wi gin ceke ndri, nwang’u piny udoko uthieno, eai ecidho Bethania ku juapar wi ario. 12Urwone, ka giai Bethania, kec unege. 13E kan eneno ulam udinyo ku cen, ebino, nia nyo ebinwang’u gin moko i wie: man kan ebino i bang’e, enwang’u gin moko ngo ndhu ithe kende; kum kacek mir ulam fodutundo ngo. 14Eloko lembe man ewacu ire kumae, Ng’atu moko kud ucam nyingi ugambre kawono cil nja ku nja. Julubne de giwinjo maeni. 15Man gibino Yerusalem, emondo i hekalu, man emaku riemo ju ma giloko piny ku ju m’ung’iewo de ku i hekalu, eredho mesa de mi juwilsente, ku kom mi ju m’nioko akuru; 16man eyio ngo ya ng’atu moko yei agulu kadh kudo ku i hekalu. 17Eponjo, ewacu igi kumae, Egore ngo kumae, Ot para jubilwong’o ot mi rwo ni thek ceke? ento wudwoke ni kagonjo mi weg ayeki. 18Julam ma dongo ku jugorcik giwinjo maeni, e giyenyo maram ginyothe ko: kum lworo negogi i kume, kum udul dhanu ceke igi wang’ lii kum ponji pare. 19E ku bang’ uthieno ceke ebedeai kud i adhura. 20Kugweno ka gikadhu, gineno ulam uner cil i ulage. 21E Petro m’upoi kum lembene ewacu ire kumae, Japonji, nen, ulam m’ikwong’o ener woko. 22Yesu loko lembe ewacu igi kumae, Wubed ku yioyic yo ba Mungu. 23Andha awacu iwu kumae, Ng’atu ma tek biwacu ni got maeni kumae, Mugri iboli i nam, ma adundene kubedo jiji ngo, ento ebiyio nia gin m’eyero timbre, e gica bibedo ire. 24Ka kumeno awacu iwu kumae, Gin ceke ma tek wurwo wupenjo pire de, wuyi nia wujologi, e wubibedo kugi. 25E kinde ma tek wucungo wuberwo, tek wubedo ku lembe kum ng’atu moko, wuwek lembene rwiny; kara Wegwu bende ma ni i polo uwek kier mu woko. 26Ento tek wuweko lembene rwinyo woko ngo, Wegwu ma ni i polo de biweko kier mu woko ngo. 27E gibino kendo Yerusalem: kan ebewotho de i hekalu, julam ma dongo ku jugorcik ku judongo de gibino i bang’e; 28e giwacu ire kumae, Itimo gin maeni ku ng’ol manedi? kadi ng’a m’umio iri ng’ol maeni m’itimo ko ginduni? 29E Yesu wacu igi kumae, Abipenjo penji acel i beng’wu, wulok ira lembene de, kan abiyero iwu pi ng’ol m’atimo ko gin maeni. 30Baputisi pa Yohana ai i polo, kadi ba dhanu? wulok ira lembe. 31E giporo lembe gigi, giwacu kumae, Tek wabiwacu kumae, Uai i polo; ebiwacu kumae, Ka kumeno wuyie ngo nedi? 32Ento tek wawacu kumae, Uai ba dhanu, gilworo dhanu: kum dhanu ceke gikwanu andha nia Yohana en e jabila. 33E giloko lembe ni Yesu giwacu kumae, Wang’eyo ngo. E Yesu wacu igi kumae, Kadok an de ayero iwu ngo pi ng’ol m’atimo ko gin maeni.

will be added

X\