Mark 10

1Eai ku kuca, man ebino i kieu Yahudi ku mi loka Yordan: e udul dhanu gicoko dhoggi i bang’e kendo; man, eponjogi kendo calu ma naka ebedepo njogi. 2E Jufarisayo gibino i bang’e, man gipenje kumae, Cik uyio ya ng’atu moko riem dhaku pare? gibidhe ko. 3Edwoko lembe ewacu igi kumae, Yang’ Musa ng’olo iwu ang’o? 4Giwacu kumae, Musa yio jugor waraga mi riem, man jurieme woko. 5Ento Yesu wacu igi kumae, Kum nwang’ mir adundewu e m’uketho egoro lembang’ola maeni. 6Ento ugambre i thangambere mi giracwia pa Mungu, etimogi nico ku dhaku. 7Kum lembe runi nico biweko won ku min de, man ebimoko ndhu ba dhaku pare; 8e gin ario de gibidoko ni kum acel: kum kumeno gibedo ario kendo ngo, ento kum acel. 9Ka kumeno gin ma Mungu ribo karacelo dong’ dhanu kud upok kindgi. 10Julubne gipenje kendo pi lembe nini i ot. 11Man ewacu igi kumae, Ng’atu ma tek uriemo dhaku pare, egamu mange de, nwang’u egiere kude: 12man tek enne de ecoro cware cen, egomo mange, nwang’u egiere swa. 13Nwang’u gibekelo nyithindho ma thindho i bang’e, kara emul kumgi: e julubne gijukogi. 14Ento ka Yesu neno maeni, lembene ton i ie, ewacu igi kumae, Wuwek nyithindho ma thindho gibin i bang’a; kud wukwergi: kum ker pa Mungu en e mi wagi joni. 15Andha ayero iwu kumae, Ng’atu ma tek bijolo ker pa Mungu calu nyathin ma nyanok ungo, ebimondo i ie ki ngo. 16E eting’ogi wi bote, emio igi mugisa, m’eketho ko cinge i wigi. 17E kan eai ebecikucidho i yo, ng’atu moko ring’ni i bang’e, erum ire de, epenje de, Japonji ma ber, atim ang’o kara acam pacu mi kwo ma rondo ku rondo? 18E Yesu wacu ire kumae, Ilwong’a ma ber nedi? ng’atu moko mbe ma ber, ndhu acel, en e Mungu. 19Ing’eyo lembang’ola, Kud ineg nek, Kud igieri swa, kud ikwal kwo, Kud ibal abali, Kud ivug kuvuga, Yung wuru ku meru de. 20Ewacu ire kumae, Japonji, gin maeni ceke agamu woro ma fodi a nyathin. 21E ka Yesu nene emare, ewacu ire kumae, Gin acel urem iri: cidh, ilok piny ceke m’ibedo ko, imi ni jucan, man ibibedo ku piny m’akana i polo: man ibin, ilub ng’eya. 22Ento wang’e cido kum lembene, edong’ ecidho ma can unege: kum en e ng’atu ma piny pare dit. 23E Yesu neno piny gbe, ewacu de ni julubne kumae, Mondo i ker pa Mungu tek apila ni julonyo! 24E julub igi wang’ lii kum lembe pare. Ento Yesu loko lembe kendo, ewacu igi kumae, Nyithindho, mondo i ker pa Mungu tek apila ni ju m’ugeno lonyo! 25Kadhu ku wang’ sindani yot ni ngamia, ma sagu mondo i ker pa Mungu ni jalonyo. 26E igi wang’ lii apila, giwacu ire kumae, Ka kumeno ng’a ma copo bothi? 27Yesu nenogi ewacu igi kumae, Ni dhanu ecopre ngo, ento ku Mungu to ecopre: kum gin ceke copre ku Mungu. 28Petro maku wacu ire kumae, Nen, waweko gin ceke, man walubo ng’ei. 29Yesu wacu kumae, Andha awacu iri, Ng’atu moko mbe m’uweko ot, kadi umego, kadi nyimego, kadi mego, kadi wego, kadi nyithindho, kadi pothi, pira, ku pi lembanyong’a ma juboth ko de, 30ma k’ebinwang’u acel bang’ dak ungo kawono i nindo maeni, udi, kud umego, ku nyimego, ku mego, ku nyithindho, ku pothi, karacelo ku ragedo; man i ng’om ma bibino kwo ma rondo ku rondo. 31Ento dupa ma kwong’ane bidok ni ma cenne; man ma cenne bidok ni ma kwong’ane. 32E gini i yo, ma gibeidho ko malu Yerusalem; man Yesu telo yo i wang’gi: e igi wang’ lii; ju m’ulubo ng’eye de lworo benegogi. E ecoko juapar wi ario kendo, man emaku yero igi pi gin ma bitimbre i kume, 33ewacu kumae, Nen, waidho malu Yerusalem; e Wod dhanu jubiketho i cing’ julam ma dongo ku jugorcik e gibigonje ya etho, man gibikethe i cing’ Thekdhanumange: 34e gibing’ale, gibing’ulo lau i kume, gibifode ma tek, gibinege de; ere yo ng’ei ceng’ adek ebicer kendo. 35Yakobo giku Yohana, wot Zebedayo, gibino i bang’e, giwacu ire kumae, Japonji, wayenyo itim iwa gin ma tek wabikwei ko. 36Ewacu igi kumae, Wuyenyo atim ang’o iwu? 37E giwacu ire kumae, Ng’ol iwa ya wajany, acel yo ku cingi ma yor acwic, acel ke yo ku cingi ma yor acam, i dwong’ peri. 38Ento Yesu wacu igi kumae, Wung’eyo ngo gin ma wukwayu. Wucopo madhu krkombe m’amadhu? kadi wucopo maku baputisi m’amaku? 39Man giwacu ire kumae, Wacopo yo. Yesu wacu igi kumae, Kikombe m’amadhu wubimadhu; baputisi de m’amaku wubimaku bende: 40ento jany yo ku cinga ma yor acwic kadi i cinga ma yor acam en e para ngo m’amio; ento en e ni ju ma juyike igi. 41E ka juapar giwinjo maeni, gimaku bedo ku konda kum Yakobo giku Yohana. 42E Yesu lwong’ogi i bang’e, ewacu igi kumae, Wung’eyo nia ju ma gibimo wi Thekdhanumange girwodho i wigi; judongo migi de gidhiro wigi. 43Ento ebedo kumeno ngo i kindwu: ento ng’atu ma tek uyenyo edok dwong’ i kindwu, ebibedo jatim iwu; 44man ng’atu ma tek uyenyo ebed ma kwong’a i kindwu, ebibedo ni jendwu kewu ceke. 45Kum Wod dhanu bende bino ngo ya jutim ire, ento kara etim, emi kwo pare de ni gony mi dhanu dupa. 46E gibino Yeriko: man kinde m’eai Yeriko, giku julubne man udul dhanu ma dit, wod Timayo, ma nyinge Bartimayo, en e jakwaipiny ma en e abinga, ebedo dhu yo. 47Kan ewinjo nia en e Yesu ma Janazareti, emaku kok, ewacu kumae, Yesu, in i wod Daudi, bed ku kisa i kuma. 48Dhanu dupa gijuke, nia ebed ling’: ento ekok ma sagu kumae, In i wod Daudi, bed ku kisa i kuma. 49Yesu cungo gr, man ewacu kumae, Wulwong’e. E gilwong’o ng’atu m’abingane, giwacu ire kumae, Dong’ cwinyi bed tek: ai malu, ebelwong’i. 50E en, m’ebayu kendi pare cen, epor malu, ebino ba Yesu. 51Yesu loko ire lembe, ewacu kumae, Iyenyo atim ang’o iri? Ng’atu m’abinga wacu ire kumae, Japonji, ayenyo wang’a ler. 52Yesu wacu ire kumae, Icidhi; yioyic peri e m’utito kumi. E ndhu ndhu nica wang’e lero, edong’ elubo ng’eye i wang’ayo.

will be added

X\