Luke 9

1Elwong’o juapar wi ario karacelo, emio igi tego ku ng’ol wi pajogi ceke, man kum keyo tho m’unyang’ i kum, 2Man eorogi gici giyer pi ker pa Mungu, man gikei kum ju ma kumgi lith. 3Man ewacu igi kumae, Kud wuting’ gin moko mi woth mu, kadok uluth, kadi gbethe, kadi kwen, kadi sente; kadok jabia ario de kud wubed kudo. 4Man ot ma tek wumondo i ie, wubed keca, man wuai keca de wucidhi. 5Dhanu ceke m’ujolowu ngo, ka wuai ku i adhura maeni, wukir utur woko kud i tiendwu ni lembatuca igi. 6E giai, gicidho ku ba pacu, ku yero lembanyong’a ma juboth ko, ku keyo kum i kaka ceke. 7Nie Herode ma jabim uwinjo pi gin ceke m’utimbre: e cwinye ng’abre, kum dhanu moko wacu nia Yohana cer ku kind ju m’utho; 8man jumoko ke, nia Elia wok en; jumange ke, nia ng’atu acel ma kind jubila ma con ucer kendo. 9E Herode wacu kumae, Yohana athumo wie: ento maeni ng’a, m’awinjo gin ma calu maeni pire? Man eyenyo enene. 10Ka jukwenda gidok, giyero ire gin ceke ma gitimo. Man ecokogi, ecoro kugi cen i adhura ma julwong’o Bethsaida. 11Ento udul dhanu m’ung’eyo maeni gilubo ng’eye: man ejologi, eyero igi de pi ker pa Mungu, man ekeyo kum ju ma can keyo kum unegogi. 12Ceng’ udoko reto ma ng’ic; e juapar wi ario gibino, giwacu ire kumae, Lal udul dhanu woko, kara gicidh i pacu ma ceng’ni kud i thim de, gigonj, ginwang’ cam de: kum ka ma wani i ie e ng’om ngele. 13Ento ewacu igi kumae, Wumi igi gicam. E giwacu kumae, Wabedo ku lungu kwen abic kende ku rec ario tek wakuciwang’iewo cemo ngo mir udul dhanu maeni ceke. 14Kum jumaco giyenyo romo rubanga abic. Ewacu ni julubne kumae, Wuketh gibed piny ni thek ni thek, thek acel calu pier abic. 15Gitimo kumeno de, giketho gibedo piny ceke. 16Eting’o lungu kwen abic ku rec ario de, eneno malu i polo, man emio mugisa i wigi, eng’weko ie de: emio ba julubne giketh i wang’ udul dhanu. 17E gicamu, kagi ceke de giyeng’: jucoko dong’ kodine m’udong’ katoko apar wi ario. 18Man etimbre, kan eberwo katung’, julubne de ni i bang’e: man epenjogi, ewacu kumae, Udul dhanu giwacu nia an a ng’a? 19Giloko lembe giwacu kumae, Yohana ma Jabaputisi; jumange ke, Elia; jumange ke, nia ng’atu acel ma kind jubila ma con ucer en. 20Man ewacu igi kumae, Ento wun ke wuwacu nia an a ng’a? E Petro loko lembe ewacu kumae, In i Kristu pa Mungu. 21Ento ejukogi, eng’olo igi lembe nia ku giyer maeni ni ng’atu moko; 22ewacu kumae, Wod dhanu bikosendre ku gin dupa be, judongo ku julam ma dongo ku jugorcik gibikwere, man jubinege, man i ceng’ mir adege ebicer. 23Man ewacu igi ceke kumae, Tek ng’atu moko yenyo elub ng’eya, dong’ ekwere gire, eting’ yen m’athara pare ku ba rupiny ku ba rupiny, elub ng’eya. 24Kum ng’atu ma tek uyenyo ebodh kwo pare ebirwinye; ento ng’atu ma tek birwinyo kwo pare pira, e ng’atuni bibodhe. 25Kum kuloka ang’o ni ng’atu moko, tek enwang’u kuloka ma ng’om bo, ma en ke erwinjre gire? 26Kum ng’atu ma tek lewic binege i kuma kum lembe para de, Wod dhanu de lewic binege i kume, kan ebino i dwong’ pare, ku dwong’ pa Wego, ku mi malaika maleng’. 27Ento ayero iwu mandha kumae, Kind ju m’ucungo kakeni, moko bibilo tho ki ngo, ma fo gikuneno ker pa Mungu ngo. 28Man etimbre yo ng’ei lembe maeni calu ceng’ abora, nia ecoko Petro ku Yohana man Yakobo, e gicidho kugi wi got nirwo. 29Kinde m’eberwo, ayi wang’e lokre tung’, kendi pare de doko tar erieny de. 30Man nen dhanu ario giweco gikude, dhanune Musa gikud Elia; 31ma giwok i dwong’, giyero de pi tho pare m’ebitimo kakare i Yerusalem. 32Nie Petro giku ju ma ginuti gikugi nindo benurogi: ento ka giceu terere, gineno dwong’ pare ma dhe, ku juario ma gicungo gikugi. 33Man etimbre, kinde ma gibeweke, nia Petro wacu ni Yesu kumae, Japonji, e ber iwa kum wanuti keni: dong’ wajiu otbak adek; acel iri, acel ni Musa, acel ke ni Elia: man eng’eyo ngo gin m’eyero. 34Kinde m’ebeyero lem maeni, afuru bino, uketho tipo i wigi: lworo de negogi ka gimondo i afuru. 35Dwal de ai i afuru m’uwacu kumae, Maeni Woda, ng’atu m’agoyo wie: wuwinje. 36E ka dwal uwok, ginwang’u Yesu dong’ kende. E giling’, man giyero ni ng’atu moko ngo i ceng’ maeno gin moko mi gin ma gineno. 37Man etimbre, urwone, ka giloro got, udul dhanu ma dit girombo kude. 38Man nen, ng’atu acel m’uai bang’ udul dhanu kok akoka, ewacu kumae, Japonji, akwei inen kum woda; kum en e nyathin para kulong’: 39man nen, tipo make, man ekok pio pio; emielo kume eketho voyo dhure, man eweke pio pio ngo, m’ebewanyu kume rac. 40E akwayu julubni ya giwodhe woko: man gicopo ngo. 41E Yesu dwoko lembe ewacu kumae, E dhanum’utuk m’umbe yioyic ma wu juco, abibedo kudu rokani, m’atwio ko cwinya i kumwu? kel wodi keni. 42Kan ebino de, pajogi redhe piny, man emielo kume kr kr. Ento Yesu juko tipo m’ucido, man ekeyo kum nyathin ma nicone, edwoke de ni won. 43E kagi ceke igi wang’ lii kum dwong’ pa Mungu. Ento ka i dhanu ceke wang’ lii kum gin ceke m’etimo, ewacu ni julubne kumae, 44Wek lembe mae unyang’ i ithwu: kum Wod dhanu jubimie i cing’ dhanu. 45Ento ging’eyo thelembe mae ngo, emungre igi, kara ku ging’eye; e lworo penje kum lembe maeni makugi. 46E piem uwok i kindgi, nia ng’a ma dit ma sagu i kindgi. 47Ento ka Yesu ng’eyo piem mir adundegi, egamu nyathin ma nok, ekethe de i ng’ete, 48man ewacu igi kumae, Ng’atu ma tek bijolo nyathin ma nyanok maeni i nyinga nwang’u ejolo an: man ng’atu ma tek bijolo an nwang’u ejolo ng’atu m’uora: kum ng’atu ma nyathigi i kindwu ceke, ng’atuno en e dit. 49Yohana loko lembe man ewacu kumae, Japonji, waneno ng’atu acel ubewodho pajogi ku nyingi; e wakwere, kum elubo ngo wakugi. 50Ento Yesu wacu ire kumae, Kud wukwere; kum ng’atu ma jadhogwu ngo en e jabeng’wu. 51Man etimbre, ka ceng’ ma jubijole ie malu dhingo, eketho wang’e ngili ngili kum cidho Yerusalem, man eoro jukwenda i wang’e: 52e gicidho, man gimondo i pacu mi Jusamaria, kara giyik kaka ire. 53Gijole de ngo, kum wang’e bedo calu ebecidho Yerusalem. 54Ka julubne Yakobo ku Yohana gineno maeni, giwacu kumae, Rwoth, iyenyo walwong’ mac uai i polo lor piny, uwang’gi? 55Ento elokre, man ejukogi. 56E gicidho i pacu mange. 57Ka gicidho i yo, ng’atu acel uwacu ire kumae, Abilubo ng’ei ka ma ibicidho i ie ceke. 58Yesu wacu ire kumae, Kaki bedo ku odng’om, winyo m’i kor polo de bedo ku odgi; ento Wod dhanu bedo ku ka m’ejeng ie wie de ngo. 59Ewacu ni ng’atu mange kumae, Lub ng’eya. Ento ewacu kumae, Rwoth, wek alar acidh ayik vwa. 60Ento ewacu ire kumae, Wek ju m’utho gikuny ju m’utho migi; ento cidh iyer pi ker pa Mungu mba mba. 61Ng’atu mange bende wacu kumae, Abilubo ng’ei, Rwoth; ento wek alar amoth ju ma ni i ot para. 62Ento Yesu wacu ire kumae, Ng’atu moko mbe, m’uromo ku ker pa Mungu, ma ketho cinge kum kwej dhiang’, man eneno ng’eye.

will be added

X\