Luke 6

1Nie etimbre i ceng’ sabatu, nwang’u ebekadhu ku kind podho cam, julubne gijaku jang cam, gitinyo i cing’gi de, man gimwodo. 2Ento jumoko ma kind Jufarisayo giwacu kumae, Nedi wutimo gin ma cik uyio ngo i ceng’ sabatu? 3Yesu loko lembe ewacu igi kumae, Wusomo ngo cil maeni ma Daudi timo nwang’u kec ubenege, en, ku ju ma ginuti gikugi de; 4maram emondo ko i ot pa Mungu, man eting’o ecamu kwen m’anyutha, emio de ni ju ma gini i bang’e; ma cik uyio ngo nia jucam ndhu ni julam kengi? 5Ewacu igi kumae, Wod dhanu en e rwoth mi ceng’ sabatu. 6Etimbre i ceng’ sabatu mange, nia emondo i kacokri eponjo de: ng’atu moko de ni keca, ma cinge ma yor acwic ulindre. 7E jugorcik ku Jufarisayo de gilibe, tek ebikeyo kum ceng’ sabatu; kara ginwang’ maram gidote ko. 8Ento eng’eyo pidoic migi; man ewacu ni ng’atu ma cinge lindre kumae, Ai malu, man icung i diere. E eai ecungo. 9Yesu wacu igi kumae, Apenjowu, Cik uyio ya jutim beri, kadi rac i ceng’ sabatu? bodho kwo, kadi nyothe? 10Enenogi ceke kun ku kun de, man ewacu ire kumae, Riei cingi. E etimo kumeno: man cinge dok kakare. 11Ento gipong’ ku ng’ecwiny ma tek man giwecri gigi pi gin ma gitim kum Yesu. 12Man etimbre i ceng’ maeni, nia ecidho i got nirwo; man ebedo diewor soro i rwo ni Mungu. 13Man ka piny uru, elwong’o julubne; man egoyo nying’ juapar wi ario kud i kindgi, m’elwong’ogi jukwenda: 14Simon, m’elwong’o nyinge Petro, man Andrea m’umin mire, man Yakobo ku Yohana, man Filipo giku Bartolomayo, 15man Matayo giku Thoma, man Yakobo ma wod Alfayo, ku Simon ma julwong’o Zelote, 16man Yuda ma wod Yakobo, man Yuda Iskariote, m’edoko jaganda. 17Man eloro piny gikugi, man ecungo wi pambu, kud udul julubne ma dit, man udul dhanu dupa m’uai i Yahudi ku Yerusalem, man dhu wath mi Turo ku Sidon, ma gibino winje, kara jukei tho migi de; 18man ju ma tipo m’ucido sendogi kumgi kei. 19Udul dhanu ceke de giyenyo gimul kume; kum tego ai i bang’e m’ukeyo kumgi ceke. 20Man eng’ayu wang’e malu ba julubne, ewacu kumae, Mugisa iwu wu ju ma jucan: kum ker pa Mungu en e mu. 21Mugisa iwu wu ju ma kec unegowu kawono: kum wubiyeng’. Mugisa iwu wu ju m’uywak kawono: kum wubing’iero. 22Mugisa iwu, ka dhanu bidaguwu, ka gibikoyowu kud i kindgi, gicayuwu de, man gibayu nyingwu woko calu gi rac, pi Wod dhanu. 23Anyong’a negwu i ceng’ maeno, wupor malu de ni mutoro: kum nen, sukulia mu dit i polo; kum kwaru migi timo kumeno ba jubila. 24Ento can i wiwu wu ju ma wulony! kum wumaku juk mu. 25Can i wiwu, wun ma wuyeng’ kawono! kum kec binegowu. Can i wiwu, wun ma wung’iero kawono! kum can binegowu man wubiywak. 26Can i wiwu, ka dhanu ceke biyero ber piwu! kum kwaru migi timo kumeno ba jubila mi ndra. 27Ento awacu iwu kumae, wu ju m’uwinjo, Wumar judegiwu, wutim ber ba ju m’udaguwu, 28wumi mugisa ni ju m’ulamuwu, wurwo pi ju m’uyenyowu ku rop. 29Ng’atu m’upadu thengi acel lok kurucel bende; ng’atu m’umayu jabia peri mi ire semisi peri bende. 30Mi ni dhanu ceke m’ukwei; ng’atu m’umayu piny peri de kud ilwong’ kendo. 31Man calu wuyenyo nia dhanu gitim iwu, wutim igi bende kumeca. 32Tek wumaru ju m’umaruwu, jufoyowu kum ang’o? kum cil judubo gimaru ju m’umarugi. 33Man tek wutimo ber ni ju m’utimo ber i beng’wu, jufoyowu kum ang’o? kum cil judubo gitimo kumeno. 34Man tek wumio banja ni ju ma wugeno nia wubigamu wang’e, jufoyowu kum ang’o? cil judubo mio banja ni judubo, kara gigam wang’e kendo. 35Ento wumar judegiwu, wutimgi ber, wumi banja, kud wugen nia wang’e dwog iwu; man sukulia mu bibedo dit, wun de wubibedo wot Ng’atu ma Malu Ngbir: kum e ber ni ju m’umbe foyofoc ku judubo bende. 36Kisa negwu, cil calu kisa nego Wegwu. 37Kud wupok lembe, ka wun de jubipoko lembe mu ngo: kud wupok lembe rac, e ka wun de jubipoko lembe mu rac ungo: wuweki, e ka wun de jubiwekowu: 38wumi, e ka jubimio iwu; mukero ma ber, ma jucung’o ie, ma juyenge de, ma jukonjo pong’ hau, gibimio i korwu. Kum ku mukero ma wuporo ko juhiporo ko iwu bende. 39Man eyero lembabola bende igi kumae, Abinga copo telo wi abinga wadi? gin ario de gibipodho i vur ungo? 40Jalub sagu japonji pare ngo: ento ku ba dhanu nzu ka judwoke ndhu cu ebibedo calu japonji pare. 41Nedi ineno ng’ili m’i wang’ umeru, ento ii pido ngo pi riu ma ni i weng’i ini? 42Kadi icopo wacu ni umeru nenedi kumae, Umira, wek akab ng’ili ma ni i weng’i, kan ineno riu ma ni i weng’i in ungo? I won ambili, ilar iwodh riu kud i weng’i in, kan ibilund neno cu m’ikabu ko ng’ili kud i wang’ umeru. 43Kum yen ma ber umbe ma cego nyinge ma rac; kadok yen ma rac de mbe ma cego nyinge ma ber. 44Kum ku ba yen ceke ng’eire ni nyinge. Kum jupono nying ulam ungo ku kum ukudho, kadok nying ulok de jupono ngo ku kum ucok. 45Ng’atu ma ber kud i piny pare m’akana ma ber mir adunde ewodho maeno m’e ber; ng’atu ma rac de kud i piny pare m’akana ma rac ewodho maeno m’e rac: kum kud i sagri ma dit mir adunde dhoge yero. 46Wulwong’a Rwoth, Rwoth, nedi ke wutimo gin m’awacu ngo? 47Ku ba dhanu ceke m’ubino i bang’a, m’uwinjo lem para de, man m’utimogi, abinyutho iwu ng’atu m’e cal kude: 48e calu dhanu m’ubegomo ot, m’ukunyo ng’om unyang’, man eporo kathere wi cana: man ka pi m’ucoro ng’om uwok, kulo dhongo ot maeno, man ecopo yenge ngo: kum ecungo wi cana. 49Ento ng’atu m’uwinjo, etimo de ngo, e calu ng’atu m’ugomo ot wi ng’om ma kathere mbe; ma kulo dhonge, e eni eni ode rwombre; man rwombrene bedo dit.

will be added

X\