Luke 4

1Yesu ai Yordan, edwogo m’epong’ ku Tipo Maleng’, Tipo de telo wie i yamba 2wonabali de bidhe nindo pier ang’wen. Ecamu gin moko ngo i ceng’ maeno: ka githum, kec unege. 3E wonabali wacu ire kumae, Tek in i Wod Mungu, wac ni kidi maeni nia edok ni kwen. 4Yesu loko lembe ire kumae, Egore kumae, Dhanu bibedo ni kum kwen kende ngo. 5Man etelo wie malu, enyutho ire ker ceke m’i ng’om i kinde ma nyathigi ci. 6Wonabali wacu ire kumae, Abimio ng’ol maeni ceke iri, ku dwong’ne de: kum jumie ira; man ke amie ni ng’atu ma tek ayenyo. 7Ka kumeno tek ibirwo i bang’a, ceke bibedo peri. 8Yesu dwoko lembe ewacu ire kumae, Egore kumae, Rwo ni Rwoth Mungu peri, man itim ire kende. 9Man etelo wie Yerusalem ekethe de wi usimbru mi hekalu, man ewacu ire kumae, Tek in i Wod Mungu, ai ku kuno iredhri piny: 10kum egore kumae, Ebing’olo lembe ni malaika piri ya gikuri: 11man, Gibitheng’i malu i cing’gi, Kara kud icwany tiendi kum kidi. 12Yesu loko lembe ewacu ire kumae, Egore kumae, Kud imul i Rwoth Mungu peri. 13Ka wonabali daru abidhe kubang’e ceke, eweke mi nindo moko. 14E Yesu dwogo Galilaya ku tego mi Tipo: man pire yik cil i ng’om ma ceng’ni ceke. 15Man eponjo i kacokri migi, dhanu ceke de giyunge. 16Ebino Nazareti, ka ma jutunge i ie: man emondo i kacokri i ceng’ sabatu, calu kurane, man ecungo malu nisomo. 17Jumio ire kitabu pa jabila Isaya. Man eyabu kitabune, enwang’u ka ma lembe gore i ie kumae, 18Tipo pa Rwoth ni i wia, Kum ewira kara ayer lembanyong’a ni jucan: Eora niyero pi gony ni ju ma juyakugi, Man pi dwoko nenopiny ni abinga, Nigonyo ju ma kumgi dhuth, 19Niyero pi rundi pa Rwoth ma yire. 20Man edolo kitabu, edwoke ba jatic, man ebedo piny: wang’ dhanu ceke ma i kacokri de konjri i kume. 21E emaku yero igi kumae, Tinuni lembagora pa Mungu maeni timbre kakare i ithwu. 22Dhanu ceke gi jumulembe pare, man igi wang’ lii kum lembe mi bero m’uai i dhoge: giwacu kumae, Maeni wod Yusuf ungo? 23Man ewacu igi kumae, Wubiwacu ira lembabola maeni andha, Jakeikum cengri giri: gin ceke ma wawinjo utimbre Kapernaum, tim keni i ng’om ma thu ma dhe bende. 24Man ewacu kumae, Andha ayero iwu kumae, Jabila moko mbe ma yire i ng’om ma thugi ma dhe. 25Ento andha awacu iwu kumae, Mon ma coggi tho dupa nuti i Israel i ceng’ pa Elia, i nindo ma polo twire rundi adek ku dwi abusiel, ka ndru ma dit upodho i ng’om ngung’; 26man juoro Elia ba ng’atu moko m’i kindgi ngo, ento ba dhaku ma cware tho kende ma i Sarepta, i ng’om Sidon. 27Man weg joi de dupa nuti i Israel i nindo pa Elia ma jabila; ng’atu moko mbe i kindgi de ma julonyo kume, ento Naman kende ma Jacami. 28Ka giwinjo gin maeni kwinyo pong’o i dhanu ceke ma i kacokri; 29giai malu, man giwodhe woko ku i adhura, gitere wi ungulu got ma jugomo adhura migi I wie, kara gikul wie giredhe ko piny. 30Ento ekadhu kud i kindgi ecidho i yo pare. 31Eloro piny Kapernaum, ma adhura mi Galilaya. Eponjogi de i ceng’ sabatu: 32e igi wang’ lii kum ponji pare; kum lembe pare bedo ku ng’ol. 33Man i kacokri ng’atu acel nuti ma won tipo mi pajogi m’ucido; man ekok ku dwande ma tek kumae, 34Ha! Yesu in ma Janazareti, wabedo ku lembang’o wakudi? ibino nyothowa? Ang’ei in i ng’adi, Ng’atu Maleng’ pa Mungu. 35Yesu juke ewacu kumae, Bed ling’, wok kud i ie. Ka pajogi redhe piny i kindgi, ewok kud i ie ma k’etime rac ungo. 36E igi ceke wang’ lii, giwecri gigi, giwacu kumae, Maeni lembang’o? kum ku ng’ol man tego eng’olo lembe ni tipo m’ucido, e giwok woko. 37E pire yik i kaka ceke m’i ng’om ma ceng’ni. 38Man eai kud i kacokri, emondo de i ot pa Simon. E dhamaru Petro kume cek lii; man gikwaye pire. 39Man ecungo i wang’e ejuko cekkume; e eweke: e eni eni eai malu man etimo igi. 40Man ka ceng’ umaku mwony, dhanu ceke m’ubedo ku dhanu ma kumgi lith ku tho ma kwonde tung’ tung’ gikelogi i bang’e; man eketho cinge i kumgi kubang’gi nzu, ecangugi. 41Pajogi de wok woko kud i dhanu dupa, gibekok akoka, man giwacu kumae, In i Wod Mungu. Ejukogi, eyio ngo ya giyer, kum ging’eyo nia en e Kristu. 42Ka piny uru, eai ecidho i ka ma ngele: man udul dhanu giyenye, gicidho i bang’e de, giyenyo gicere, nia kud ewekgi. 43Ento ewacu igi kumae, Akociyero lembanyong’a mi ker pa Mungu bang’ adhura mange bende be: kum juora kum maeno. 44Man ebedeyero i kacokri mi Galilaya.

will be added

X\