Luke 24

1Ento i ceng’ ma kwong’a ma yenga, ka mombwa thumo, gibino ba liel ma juroko i cana, ma gikelo ko udok ma giyiko. 2E ginwang’u jung’ielo kidi woko ku dhu liel ma juroko i cana. 3Gimondo de, ginwang’u avuj Rwoth Yesu de ngo. 4E etimbre, kinde ma cwinygi ng’abre kum lembene, nen, juario cungo i vutgi ku kendi m’urieny: 5man ka lworo makugi gikulo wang’gi de i ng’om, giwacu igi kumae, Nedi wuyenyo ng’atu ma kwo i kind ju m’utho? 6Embe keni, ento ecer: wupoi maram eyero ko iwu ma fodi eni i Galilaya, 7m’ewacu ko nia Wod dhanu jubikomie be i cing’ judubo, man jubigure, ebicer kendo de i ceng’ mir adege. 8E gipoi kum lembe pare, 9giai de ku ba liel ma juroko i cana gidok, giyero gin maeni ceke ni juapar wi acel, ku juwadi ceke bende. 10Nie gin gi Mariamu Magdalene, ku Yoana, man Mariamu ma min Yakobo: ku mon wadi mange de gikugi giyero gin maeni ni jukwenda. 11E lembe maeni nen i wang’gi calu wec mananu; e giyiogi ngo. 12Ento Petro ai, eringo ba liel ma juroko i cana; man egung’ eneno i ie, eneno kitambala ma nwang’ ubedo katung’; man edok i ot pare, ma ie wang’ lii kum gin m’utimbre. 13Man nen, ceng’ nino juario m’i kindgi gicidho i pacu ma julwong’o Emao, ma en e ungolo apar wi abusiel ku Yerusalem. 14E giweco i kindgi pi gin maeni ceke m’utimbre. 15Man etimbre, kinde ma giweco gipenjri de i kindgi, nia Yesu ku kite coro ceng’ni, giwotho gikugi de. 16Ento wang’gi umbre kara ku ging’eye. 17Man ewacu igi kumae, Lembang’o ma wuwotho ku weco i kindwu? E gicungo ling’, ma wang’gi cido ku can. 18Man ng’atu acel m’i kindgi, ma nyinge Kleopa, uloko lembe wacu ire kumae, Ibedo i kendi i Yerusalem man ing’eyo gin m’utimbre kuca i ceng’ maeni ngo? 19Man ewacu igi kumae, E girang’o? Man giwacu ire kumae, Gin m’utimbre kum Yesu ma Janazareti, ma en e jabila ma tek i tic ku lembe de i wang’ Mungu i wang’ dhanu ceke bende: 20man maram julam ma dongo ku jubim mwa de gimie ko kara jupok lembe i wie rac ni tho, man gigure. 21Ento wageno nia en e ng’atu ma biwaru Israel. Eyo m’umedre kum maeni ceke, kawono en e ceng’ mir adege yo ng’ei gin maeni m’utimbre. 22Man kendo mon moko m’i kindwa ketho iwa wang’ lii, ma gicidho pir kugweno ba liel ma juroko i cana; 23ka ginwang’u avuje ngo, gibino, giwacu nia gineno ginmawokiwang’ mi malaika, m’uwacu nia ebedo kwo. 24E jumoko ma ni i bang’wa de gicidho ba liel ma juroko i cana, e ginwang’u ebedo kumeno calu mon uwacu: ento en re ginene ngo. 25Man ewacu igi kumae, E wun ma wun adhura, ma adundewu galu ku yio lembe ceke ma jubila yero! 26Kristu kousendre be ku gin maeni ngo kan emond i dwong’ pare? 27Man etheko kum lem pa Musa ku jubila ceke de, ekoro igi i lem pa Mungu ceke gin ma pire gire. 28E gidhingo pacu, ka ma gibecidho i ie: man etimo calu eyenyo ecidh i wang’e. 29Man gicere, giwacu kumae, Dong’ wabed wakudu; kum uthieno dhingo, ceng’ de doko ng’ic. E emondo gibed gikugi. 30Man etimbre, ka gibedo gikugi dhu cam, eting’o kwen emio mugisa de; e kan eng’wenyo ie emio igi. 31E wang’gi yabre, man ging’eye; e erwinyo woko kud i wang’gi. 32Man giwecri i kindgi kumae, Adundewa wang’ lii ngo i iwa, kan eyero iwa i yo, kan ekoro iwa lembagora pa Mungu? 33E i saa maeno giai malu, man gidok Yerusalem, e ginwang’u juapar wi acel ucoko dhoggi karacelo, ku ju ma gini i bang’gi, 34giwacu kumae, Rwoth ucer andha, man enyuthie ni Simon. 35E giyero gin m’utimbre i yo, man maram eng’eire ko igi i ng’wenyo i kwen. 36E ka giyero gin maeni, en ku kite ecungo i kindgi, ewacu igi kumae, Kwiocwiny ubed i beng’wu. 37Ento ndiri makugi man lworo, e giwacu nyo gineno ripo. 38Man ewacu igi kumae, Cwinywu ng’abre nedi? penji de wok i adundewu nedi? 39Wunen cinga ku tienda, nia en e an ku kita: wumul kuma, wunen; kum tipo mbe ku ring’o man cogo, calu ma wuneno abedo ko. 40E kan eyero maeni, enyutho igi cinge ku tiende. 41E ka fodi giyio ngo ni mutoro m’unegogi, ku igi de m’uwang’ lii, ewacu igi kumae, Gin moko nuti beng’wu keni mir acama? 42E gimio ire ng’et rec m’athola. 43Man eting’e, ecamu de i wang’gi. 44Man ewacu igi kumae, Maeni en e lembe para m’ayero iwu, ma fodi ani i beng’wu, nia gin ceke koutimbre be kakare, m’ugore pira i cik pa Musa, ku jubila, ku i zaburi de. 45Elund eyabu pidoigi, kara ging’ei lembagora pa Mungu; 46man ewacu igi kumae, Egore kumeno, nia maku Kristu sendre, ecer kendo de ku kind ju m’utho i ceng’ mir adege; 47man kara juyer pi lokocwiny ku rucodubo i nyinge ni thek ceke, ugambre Yerusalem. 48Wun wu jumulembe mi gin maeni. 49Man nen, aoro lembang’ola pa Vwa i wiwu; ento wubed i adhura, ram wurony ko tego m’uai malu. 50Man etelo wigi woko i ng’et Bethania: man eting’o cinge malu, emio igi mugisa. 51Man etimbre, kan emio igi mugisa, epokre gikugi, e juting’e malu i polo. 52E girwo ire, man gidok Yerusalem ku mutoro ma dit: 53man gibedo thiri thiri i hekalu, ku mio mugisa ni Mungu.

will be added

X\