Luke 22

1NIE agba mi kwen ma thobi mbe i ie dhingo ceng’ni, ma julwong’o Kadhukuwijo. 2E julam ma dongo ku jugorcik de giyenyo maram gicopo nege ko; kum gilworo dhanu. 3E Jok umondo i Yuda ma julwong’o Iskariote, ma en e kind juapar wi ario. 4E ecidho, giweco ku julam ma dongo ku jego, maram ecopo mie ko igi. 5E anyong’a negogi, man giribo lembe gikugi ya gimie sente. 6En de eyio, man eyenyo maram ecopo cibe ko igi kan udul dhanu mbe. 7Ceng’ mi kwen ma thobi mbe i ie wok, ma jukojulamu ie lam mi kadhukuwijo be. 8Man eoro Petro giku Yohana, ewacu kumae, Wuciyik iwa kadhukuwijo, kara wacam. 9E giwacu ire kumae, Iyenyo wayik kani? 10Man ewacu igi kumae, Nen, ka wumondo i adhura, wubirombo ku ng’atu m’uyeyo agulu pi; wulub ng’eye ka m’emondo i ie i ot. 11E wubiwacu ni won ot kumae, Japonji wacu iri kumae, Odwelo nikani, ka ma wabicamu ie kadhukuwijo ku julubna? 12E ebinyutho iwu ot ma dit ma malu m’ubedo ku piny i ie: e wuyik kakeno. 13E gicidho, ginwang’u calu ewacu igi: e giyiko kadhukuwijo. 14Ka saane tundo, ebedo piny, giku julubne. 15Man ewacu igi kumae, Kadhukuwijo maeni ava camu wakudu nega dit ma fokasendra ngo: 16kum awacu iwu kumae, Abicame ngo, ma foketimbre kakare ngo i ker pa Mungu. 17Man egamu kikombe, kan emio foc, ewacu kumae, Wugam maeni, wupok i kindwu: 18kum awacu iwu kumae, Ugambre kawono abimadhu pigolok ungo, ma fodi ker pa Mungu ku bino ngo. 19E eting’o kwen, e kan emio foc, eng’wenyo ie, emio igi, ewacu kumae, Maeni en e kuma m’umire piwu: wutim mae wupoi ko pira. 20Kikombe de kumeca yo ng’ei cemo mir uthieno, ewacu kumae, Kikombe maeni en e lembariba ma nyen i rimba, cil maeno m’uthwogre woko piwu. 21Ento nen, cing’ ng’atu m’uciba ni wi mesa i bang’a. 22Kum Wod dhanu cidho andha, calu lembe kethre: ento can wi ng’atu maeno m’ucibe! 23E gimaku penjri i kindgi, nia ng’a m’i kindgi ma bitimo gin maeni? 24Piem uwok i kindgi bende, nia ng’a m’i kindgi ma jukwanu ya e dit ma sagu. 25E ewacu igi kumae, Ubimo mi Thekdhanumange gibimo wigi; ju m’ubedo ku ng’ol i wigi julwong’ogi Jutimber. 26Ento wubibedo kumeno ngo: ento ng’atu m’usagu i kindwu, dong’ edok calu ng’atu ma nok; ng’atu ma jawipiro de, calu ng’atu ma timo. 27Kum makani m’usagu, ng’atu m’ubedo dhu cemo, kadi ng’atu m’utimo? en e ng’atu m’ubedo dhu cam ungo? ento abedo i kindwu calu ng’atu m’utimo. 28Ento wun wu ju ma wabedo asu wakudu i abidhe para; 29man ang’olo iwu ker, cil calu Vwa ng’olo ira, 30kara wucam wumadh de dhu mesa para i ker para; man wubijany wi komker ku poko lembe wi suru apar wi ario mir Israel. 31Simon, Simon, nen, Jok upenjo nia ebed kudi, kara epiedhi pami nganu: 32ento akwayu piri, kara yioyic peri kud urany; in de, kan ilokri kendo, iteng’ utumeru. 33Man ewacu ire kumae, Rwoth, abedo ayika mi cidho kudi i odkol man i tho de. 34E ewacu kumae, Awacu iri, Petro, kulok bikok ungo tinuni, ma fok’ikwero wang’ adek ungo nia ing’eya ngo. 35Man ewacu igi kumae, Naka kan aorowu ma gbethe mbe kudu, ku mangala, ku wara de, nwang’u gin moko rem iwu? Giwacu kumae, Gin moko mbe. 36Man ewacu igi kumae, Ento kawono, ng’atu ma won gbethe, wek eting’e, man won mangala bende kumeca; man ng’atu ma palamularu pare mbe, wek elok kanzu pare, eng’ieu ko. 37Kum awacu iwu, nia maeni m’ugore bikotimbre kakare i kuma be kumae, E jukwane ku judubo: kum maeno ma pira timbre kakare. 38E giwacu kumae, Rwoth, nen, palamularu ario ni keni. E ewacu igi kumae, Eromo. 39Man ewok woko, ecidho de, wi got Zeituni, calu kura pare; e julubne bende gilubo ng’eye. 40E kan ewok kakeca, ewacu igi kumae, Wurwo kara kud wumond i abidhe. 41E kindgi liero kugi rom ku ma jucanyu ie kidi; man erum piny erwo, 42ewacu kumae, Vwa, tek iyenyo, kab kikombe maeni kud i bang’a: ento yeny para ngo, ento peri, utimbre. 43E malaika wok i bang’e kud i polo, m’udwoke tek. 44E en m’eni i ndiba erwo ma tek m’usagu; kwok pare de doko pami ng’idho rimo m’uton i ng’om. 45E kan eai malu kud i rwo pare, ebino ba julub, man enwang’u ginindo ni can, 46man ewacu igi kumae, Wunindo nedi? wuai malu, wurwo, kara kud wumond i abidhe. 47Kinde ma fodi eweco, nen, udul dhanu, ku ng’atu ma julwong’o Yuda, acel m’i kind juapar wi ario utelo wigi; man ecoro ceng’ni Yesu nicwio limbe. 48Ento Yesu wacu ire kumae, Yuda, icibo Wod dhanu ku cwici? 49E ka ju ma ginuti i vute gineno gin ma bilubo toke, e giwacu kumae, Rwoth, wabitong’o ku palamularu? 50E ng’atu acel m’i kindgi tong’o jamiru pa jalam ma dit, man etong’o ithe ma yor acwic woko. 51Ento Yesu loko lembe ewacu kumae, Wukowuwekgi tundu. Man emulo ithe, eketho ekei. 52E Yesu wacu ni julam ma dongo, ku jego mi hekalu, man judongo, ma gibino i kume kumae, Wubino, calu kum won ayeki, ku palamularu ku duli? 53Ka wanuti wakudu ceng’ ku ceng’ i hekalu, wuricyo cingwu ngo i kuma: ento maeni saa mu, ku tego mi mudho. 54E gimake, man gipeye, gikele i ot pa jalam ma dit. Ento Petro lubo ng’eye ku cen. 55E ka gikudho mac i die pondot, man gibedo piny karacelo, nwang’u Petro bedo i kindgi. 56E nyaku moko m’enene kan ebedo i der mac, m’enene tel, ewacu kumae, Ng’atu maeni bende gibedo gikugi. 57Ento ekwero, ewacu kumae, Nyane, ang’eye ngo. 58Yo ku ng’eye nyanok ng’atu mange nene, ewacu de kumae, In bende in i ng’atu acel m’i kindgi. Ento Petro wacu kumae, Ng’atue, an ungo. 59Yo ng’ei kinde ma calu saa acel ng’atu mange yero ku tegocwinye, ewacu kumae, Andha ng’atu maeni bende gibedo gikugi; kum en e Jagalilaya. 60Ento Petro wacu kumae, Ng’atue, ang’eyo gin m’iyero ngo. E eni eni, kinde m’ebeyero, kulok ukok. 61E Rwoth ulokre, man eneno Petro. E Petro poi kum lembe pa Rwoth, maram ewacu ko ire kumae, Tin ma fodi kulok kukok ungo ibikwera wang’ adek. 62E ewok woko, eywak ku can m’apila. 63E dhanu m’umaku Yesu gicaye, gicwanye. 64Mau gitwio wang’e ku kita mbala, e gipenje, giwacu kumae, Eu: ng’a m’ucwenyi? 65Man gin dupa mange giyero i kume, gicaye ko. 66E ka piny uru, udul mi judongo mi dhanu gicokri karacelo, julam ma dongo ku jugorcik; e gipeye woko i dilo migi, giwacu kumae, 67Tek in i Kristu, wac iwa. Ento ewacu igi kumae, Tek awacu iwu, wubiyio ngo: 68man tek apenjowu, wubiloko lembe ngo. 69Ento ugambre kawono Wod dhanu bijany yo ku cing’ ma yor acwic mi tego pa Mungu. 70E kagi ceke giwacu kumae, Ka kumeno in i Wod Mungu? Man ewacu igi kumae, Wuwacu nia an a en. 71Man giwacu kumae, Can jumulembe mange negowa nedi? kum wan giwa wawinjo lembe i dhoge en.

will be added

X\