Luke 21

1E eng’ayu wang’e malu, man eneno julonyo m’ubolo giramia migi i kakanpiny. 2Man eneno dhaku moko ma jacan ma cware tho ubolo sente ario i ie. 3E ewacu kumae, Ayero iwu andha kumae, Dhaku maeni m’e jacan ma cware tho ebolo i ie ma sagugi ceke: 4kum joni ceke gibolo i ie ni giramia migi kum gin ma gisagri ko; ento en kum can pare ebolo i ie gin ceke m’ecopre kudo. 5E ka jumoko weco pi hekalu, maram erukre ko ku kidi ma ber ku giramia de, ewacu kumae, 6Pi gin maeni ma wuneno, ceng’ bibmo, ma jubiweko ie kidi acel de ngo kakeni wi wagi, ma jukubibolo piny ungo. 7E gipenje, giwacu kumae, Japonji, ka kumeno gin maeni biwok awene? man giranyutha bibedo ang’o ka gin maeni dhingo timbre? 8Man ewacu igi kumae, Wubed ku weng’wu kara ku juwingwu. kum dhanu dupa bibino ku nyinga, ku wacu kumae, An a en; man, Nindo dhingo ceng’ni: kud wulub ng’eigi. 9Man ka wubiwinjo pi lwiny kud ali de, ndiri kud umakwu: kum gin maeni bikolar timbre be; ento kajikne fodi kawono ngo. 10E elund ewacu igi kumae, Thek bijai kum thek wagi, ker de kum ker; 11digidi ma dit de bibedo nuti, ndru de bibedo nge nge ku thong’om bende; ndiri de bibedo nuti ku giranyutha ma dit m’uai i polo. 12Ento ka gin maeni ceke fokutimbre ngo, e gibimakuwu ku cing’gi, man gibinyayu ragedo i kumwu, gibimiowu ba cokri ku otkol de, gibiterowu i wang’ ju m’ubimo man i wang’ jubim de pi nyinga. 13Ebilokre edoko ni lembatuca iwu. 14Ka kumeno wuketh adundewu cungi, nia iwu bilarpido ngo maram wulok ko lembe: 15kum abimio iwu dhok man rieko, ma judegi mu ceke bicopo piemo ngo kadi ajaya de. 16Ento junyodo, ku utumego, ku wat, ku jurimo gibicibowu; man moko m’i kindwu gibiketho nia juneggi. 17Dhanu ceke de bidaguwu pi nyinga. 18E yukwic mi wiwu acel de mbe ma birwinyo. 19I twiocwiny mu wubibodho kwo mu. 20Ento ka wuneno njuru asikari ubetieko Yerusalem wulund wung’ei nia nyoth pare dhingo ceng’ni. 21I nindo maeno ju ma gini i Yahudi wek giring i gudi: man ju ma gini i kinde wek giai woko; man ju ma gini i thim ku gimond i ie. 22Kum maeni ceng’ culokwor, kara gin ceke m’ugore timbre kakare. 23Can wi ju ma igi nuti ku ju ma nyithindho dhodhogi i ceng’ maeno! kum lem ma tek hai bibedo nuti i ng’om, ku kwinyo de ni dhanu maeni. 24Man gibipodho ku lak palamularu, jubipeyogi de ni ayeki i thek ceke: Yerusalem de Thekdhanumange binyone, maram nindo mi Thekdhanumange bitimbre ko kakare. 25Giranyutha de bibedo nuti i ceng’ ku dwi ku cero; i ng’om de lem ma tek mi thek, i ang’abacwiny kum woi mi nam man mukura; 26dhanu biyenyo tho ni lworo, man kum kuro gin m’ubebino i ng’om: kum tego mi polo biyengre. 27E gibilund neno Wod dhanu bebino i afuru ku tego man dwong’ ma dit. 28Ento ka gin maeni maku timbre, wung’ai weng’wu malu, wuting’ wiwu malu de; kum war mu dhingo ceng’ni. 29Man eyero igi lembabola mae: Wunen ulam, ku yedhi ceke: 30ka gimoc loth, wuneno maeni man wung’eyo giwu nia kawono cwir ni ceng’ni. 31Cil kumeno wun bende, ka wuneno gin maeni maku timbre, wung’ei nia ker pa Mungu ni ceng’ni. 32Andha ayero iwu kumae, dhanum’utuk maeni bikadhu woko ngo, ma fodi gin ceke kutimbre ngo. 33Polo ku ng’om bikadhu woko: ento lembe para bikadhu woko ngo. 34Ento wubed ku weng’wu giwu, kara adundewu kud ucid ku giracama, ku mer kong’o, man ku giki mi bedo maeni, e ceng’ maeno bino i kumwu pio pio pamir uwic: 35kum ebibino kumeno wi dhanu ceke m’ubedo wi wang’ ng’om ngung’. 36Ento wuki ku ba nindo ceke, ku kwayukwac de, kara wusegru ni both ni gin maeni ceke ma bitimbre, wucung de i wang’ Wod dhanu. 37E ku ba ceng’ ceke eponjo i hekalu; man ku ba diewor ceke ecidho woko, man egonjo wi got ma julwong’o Zeituni. 38Dhanuceke de bino i bang’e pir kugweno i hekalu niwinje.

will be added

X\