Luke 20

1Man etimbre, i ceng’ acel ma kind wadi, kan ebeponjo dhanu i hekalu, ebeyero lembanyong’a ma juboth ko, julam ma dongo ku jugorcik man judongo de gibino i bang’e; 2man giyero, giwacu ire kumae, Wac iwa: Itimo gin maeni ku ng’ol manedi? Kadi en e ng’a m’umio iri ng’ol maeni? 3Man eloko lembe ewacu igi kumae, An bende abipenjowu ku penji moko; man wuwac ira: 4Baputisi pa Yohana, ai i polo kadi ba dhanu? 5E giporo lembe i kindgi gigi, giwacu kumae, Tek wabiwacu kumae, Uai i polo; ebiwacu kumae, E ka nedi wuyie ngo? 6Ento tek wabiwacu kumae, Uai ba dhanu; dhanu ceke bicanyuwa ku kidi: kum giyio nia Yohana en e jabila. 7Gidwoko lembe, nia ging’eyo ngo ka m’eai i ie. 8E Yesu wacu igi kumae, Kadok an de awacu iwu ngo nia ku ng’ol manedi m’atimo ko gin maeni. 9Man emaku yero lembabola maeni ni dhanu: Ng’atu moko pidho podho mir ulok, emie de ni sumba ba jutipodho, man ecibedo i ng’om mange mi nindo dupa. 10Man i nindo mi mwoka eoro jamiru ba jutipodho, kara gimi ire mwoka moko mi podho mir ulok: ento jutipodho gifode, giore edok mananu. 11Fodi eoro jamiru mange de: en bende gifode, gitime rac dit, giore edok mananu. 12Man eoro mir adege: en bende gitong’o lero i kume, e gibaye woko. 13E rwoth mi podho mir ulok uwacu kumae, Abitimo ang’o? Abioro woda ma jamerna; kuno nyo gibijwigri ire. 14Ento ka jutipodho ginene, giporo lembe i kindgi, giwacu kumae, Maeni jacampacu; dong’ wanegue, kara camupacu dong’ mwa. 15E gibaye woko kud i podho mir ulok, ginege de. Ka kumeno rwoth mi podho mir ulok bitimo ang’o i kumgi? 16Ebibino ebinyotho jutipodho maeni, ebimio podho mir ulok ba jumange. E ka giwinjo maeni, giwacu kumae, Kud ebed kumeno. 17Ento eneno bang’gi, man ewacu kumae, Ka kumeno mae ang’o m’ugore kumae, Kidi ma jugomot ukwero, Eni jukethe wi guli? 18Ku ba dhanu ceke m’upodho wi kidi maeno bitur nziki nziki; ento ng’atu ma tek ebipodlio i wie, ebikethe pamir utur. 19Jugorcik ku julam ma dongo giyenyo giketh cing’gi i kume i saa maeno nino; man gilworo dhanu: kum ging’eyo nia eyero lembabola maeni i kumgi. 20E gioro julib de i bang’e, ma gipali gigi nia gi pwe, kara gimak lembe m’i dhoge, kara gimie ni tego ku ng’ol pa jabim. 21Man gipenje, giwacu kumae, Japonji, wang’eyo nia iweco iponjo de cu, man ijolo ayi dhanu ngo, ento andha iponjo yo pa Mungu: 22Cik uyio wami ajok ni Kaisari, kadi ungo? 23Ento eng’eyo riu migi, man ewacu igi kumae, 24Wuleng’ denarius anen. Ayi ng’a ku ramblembene de? Giwacu kumae, Pa Kaisari. 25E ewacu igi kumae, Ka kumeno, wumi ni Kaisari gin pa Kaisari, ni Mungu ke gin pa Mungu. 26E gicopo maku lem moko ngo i wang’ dhanu: e igi wang’ lii kum lembadwoka pare, man giling’. 27Man Jusadukayo moko gibino i bang’e, gi ju ma giwacu nia cer umbe: 28gipenje, giwacu kumae, Japonji, Musa goro iwa, nia tek umin ng’atu moko tho, ma cege nuti, ma nyithindho de mbe kude, emaku ya umin ugam cege, man enyol nyithindho ni umin. 29Ka kumeno umego abiro nuti: e ma kwong’ane gamu dhaku, etho de ma nyithindho mbe kude; 30mir arionde de game: 31mir adege de game; man gin abiro bende kumeno githo, ma giweko nyithindho ngo. 32Yo ku ng’eye dhaku de tho. 33Ka kumeno i cer ebidong’ bedo ci ng’a m’i kindgi? kum gin abiro gigame ni dhaku igi. 34Yesu wacu igi kumae, Wot m’i ng’ombuni gigambri, jumio de mi nyom: 35ento ju ma jukwanu ya giromo ma ginwang’ ko ng’om maeno, ku cer ma kind ju m’utho de, gigambri ngo, jumiogi de ngo mi nyom: 36kum gicopo tho kendo ngo: kum girom rom ku malaika; man gi wot Mungu, ma gi wot mi cer. 37Ento nia ju m’utho cer, cil Musa enyutho, i ka Yen m’udinyo, kan elwong’o Rwoth nia Mungu pa Ibrahim, man Mungu pa Isak, man Mungu pa Yakobo. 38Nie en e Mungu mi ju m’utho ngo, ento mi ju ma kwo: kum dhanu ceke bedo ni kume. 39Jumoko ma kind jugorcik giloko lembe kumae, Japonji, iwacu dre. 40Kum tegocwiny umbe kugi ma gipenje ko ku penji mange. 41Man ewacu igi kumae, Giwacu nenedi nia Kristu en e wod Daudi? 42Kum Daudi wacu en i kitabu mi Zaburi kumae, Rwoth uwacu ni Rwoth para kumae, Jany yo ku cinga ma yor acwic, 43Cil m’aketho ko jukwoji ni kom mi tiendi. 44Ka kumeno Daudi lwong’e Rwoth e, en e wode nenedi? 45Man i ith dhanu ceke ewacu ni julubne kumae, 46Wukuru giwu ni jugorcik, ma gimaru woth ma ku kendi ma lor lor, man gimaru moth de i katali, ku bedo ma i ka m’usagu i kacokri, ku bedo ma i ka m’usagu i agba; 47ma gicamu udi mi mon ma coggi tho, man gitimo rwo ma bor ni abombi: joni binwang’u lembapoka ma rac ma dit m’usagu.

will be added

X\