Luke 18

1Man eyero lembabola igi nia dong’ girwo thiri thiri, cwinygi kud uai; 2ewacu kumae, Japoklembe nuti i adhura, ma lworo Mungu ngo, eparu pi dhanu de ngo: 3man dhaku ma cware tho nuti i adhura maeno; ebino i bang’e de wang’ udul, ewacu kumae, Cul wang’ lembe para kum jadegina. 4E eyio ngo nindo moko: ento macen ewacu i ie gire kumae, Kadok alworo Mungu ngo, kadi aparu pi dhanu de ngo; 5ento kum dhaku maeni besenda, abiculo wang’ lembe pare, kara kud eola ku bino pare ma thiri thiri. 6Man Rwoth uwacu kumae, Wuwinj lembe ma japoklembe m’ugondre yero. 7E Mungu biculo wang’ lembe mi ju m’egoyo wigi ngo m’uywak i bang’e dieceng’ ku diewor, ento fodi etwio cwinye i kumgi? 8Awacu iwu, nia ebiculo wang’ lembe migi pio. Karacelo ku maeni, ka Wod dhanu bino, ebinwang’u yioyic i ng’omi? 9Man eyero lembabola maeni ni ju m’ugendri gigi nia gi pwe, man gicayu jumange ceke: 10ewacu kumae, Juario idho malu i hekalu nirwo; ng’atu acel en e Jafarisayo, jalwadi ke won ajok. 11Jafarisayo cungo man erwo kumeno i ie gire, Mungu, afoii, kum a calu dhanu mange ngo, ma weg kuvuga, weg gondri, ma weg gier, kadi calu won ajok maeni de ngo. 12Aweko cam wang’ ario i yenga acel, amio apaje mi gin ceke m’anwang’u. 13Ento won ajok, ucungo bor cen, eyio ting’o wang’e malu i polo de ngo, endre edhongo kore, ewacu kumae, Mungu, dong’ kisa negi i kuma an a jadubo. 14Awacu iwu kumae, Ng’atu maeni loro piny i ot pare ma lembe m’i wie gonjre ma sagu pa jalwadi: kum ku ba dhanu ceke m’uyungre gire jubijwige; ento ng’atu m’ujwigre gire jubiyunge. 15Man gikelo mukere migi i bang’e bende, kara emul kumgi: ento ka julubne gineno, gijukogi. 16Ento Yesu lwong’ogi i bang’e, ewacu kumae, Wuyi nyithindho ma thindho gibin i bang’a, kud wukwergi: kum ker pa Mungu en e mi wagi joni. 17Andha awacu iwu kumae, Ng’atu ma tek bijolo ker pa Mungu calu nyathin ma nok ungo, ebimondo i ie ki ngo. 18Jabim acel upenje, ewacu kumae, Japonji ma ber, abitimo ang’o kara acam pacu mi kwo ma rondo ku rondo? 19E Yesu wacu ire kumae, Nedi ilwong’a ya a beri? ng’atu moko mbe ma ber, ndhu acel kende, en e Mungu. 20Ing’eyo lembang’ola, Kud igier gier, Kud ineg nek, Kud ikwal kwo, Kud ibed jamulembe mi ndra, Yung wuru ku meru. 21Ewacu kumae, Gin maeni ceke aworo ugambre m’a nyathin. 22E ka Yesu winjo maeni, ewacu ire kumae, Lembe acel nuti m’irem i ie: lok gin ceke m’ibedo ko, pok ni jucan, e ibibedo ku piny m’akana i polo: man ibin, ilub ng’eya. 23Ento kan ewinjo lem maeni, can umake dit; kum elony dit. 24Ka Yesu nene ewacu kumae, Mondo i ker pa Mungu tek apila ni julonyo! 25Kum mondo ku wang’ sindani e yot ni ngamia, ma sagu mondo i ker pa Mungu ni julonyo. 26Ju m’uwinjo maeni giwacu kumae, Ka kumeno ng’a ma copo bothi? 27Ento ewacu kumae, Gin ma copre ngo ni dhanu copre ni Mungu. 28E Petro wacu kumae, Nen, waweko piny mwa ceke, walubo ng’ei. 29Man ewacu igi kumae, Andha awacu iwu, Ng’atu moko mbe m’uweko ot, kadi dhaku, kadi umego, kadi junyodo, kadi nyithindho, pi ker pa Mungu, 30m’ekebinwang’u wang’e bang’ dupa ngo i nindo maeni, man i ng’om m’ubino kwo ma rondo ku rondo. 31Man egamu juapar wi ario i bang’e, ewacu igi kumae, Nen, wabeidho malu Yerusalem, man gin ceke m’ugore ni kum jubila bitimbre kakare kum Wod dhanu. 32Kum jubicibe ni Thekdhanumange, e jubing’ale, man jubiyenye ku rop, jubing’ulo lau de i kume: 33e jubifode man jubinege: man i ceng’ mir adege ebicer kendo. 34Man ging’eyo gin maeni ngo; thelembe maeni de mungre igi, man ging’eyo ngo thelembe ma juyero. 35Man etimbre, kan edhingo Yeriko, nwang’u ng’atu acel ma abinga bedo dhu yo ebekwayu piny: 36e kan ewinjo udul dhanu bekadhu, epenjo nia mae ang’o. 37Man giwacu ire, nia Yesu ma Nazareti bekadhu en. 38Man ekok, ewacu kumae, Yesu, i wod Daudi, bed ku kisa i kuma. 39E ju m’utelo yo gijuke, nia ebed ling’: ento ekok ma sagu dit kumae, I wod Daudi, bed ku kisa i kuma. 40E Yesu cungo, man eng’olo ya jukele i bang’e: e kan ewok ceng’ni, epenje kumae, 41Iyenyo atim ang’o iri? Ewacu kumae, Rwoth, kara nenopiny unendre ira. 42E Yesu wacu ire kumae, Nenopiny udwog i beng’i: yioyic peri e m’ubodhi. 43E eni eni emaku neno piny, elubo ng’eye de, ku yungo Mungu: man dhanu ceke, ka gineno maeni, gimio pak ni Mungu.

will be added

X\