Luke 17

1Man ewacu ni julubne kumae, Gin ma ketho dhanu kier bikowok be: ento can wi ng’atu, m’ebiwok ni kume! 2E ber ire ma tek jung’abu pom i ng’ute, jubaye ko i nam, sagu ma tek eketho kind nyithindho ma thindho maeni ukier. 3Wukuru giwu: tek umeru dubo, juke; man tek eloko cwinye, wek lembene woko ire. 4Man tek edubo iri wang’ abiro i ceng’ acel, elokre kendo i beng’i wang’ abiro, ewacu kumae, Aloko cwinya; wek lembene ire. 5E jukwenda wacu ni Rwoth kumae, Med yioyic mwa. 6E Rwoth uwacu kumae, Tek wubedo ku yioyic ma ro ku nying atingli, nwang’u wuwacu ni ulemo mae kumae, Fudhri woko, man icidh ipidhri i nam; kuno di eworowu. 7Ento ng’a ma ni i kindwu, m’ubedo ku jamiru ma furo fur kadi m’ekwayu rombe, ma biwacu ire, kan eai i thim kumae, Bin pio ibed dhu cam; 8ma sagu ebiwacu ire kumae ngo, Yik cam m’abicamu, man itwiri giri, itim ira, cil m’acamu amadhu de: e macen ibicamu ibimadhu de? 9Emio foyofoc ni jatic kum etimo gin ma jung’olo ire? 10E wun bende kumeno, ka wubidaru timo gin ceke ma jung’olo iwu, wuwac kumae, Wa jumiru ma kulokawa mbe; watimo gin ma maku watim. 11Man etimbre, ka gini i yo ma gibecidho ko Yerusalem, nia ebekadhu ku kind Samaria ku Galilaya. 12E kan emondo i pacu acel, erombo ku weg joi apar, m’ucungo bor cen: 13e giting’o dwandgi malu, giwacu kumae, Yesu, Japonji; bed ku kisa i kumwa. 14E kan enenogi, ewacu igi kumae, Wucinyuthiu ni julam. E etimbre, ka gicidho, kumgi doko leng’. 15E ng’atu acel m’i kindgi, kan eneno nia kume kei, edok ku paku Mungu ku dwande ma tek; 16epodho arieba wang’e the tiende, ku mio ire foc: man e Jasamaria. 17E Yesu loko lembe ewacu kumae, Juapar kumgi doko leng’ ungo? ento juabung’wen gini kani? 18Ng’atu moko mbe ma junwang’u udwogo nimio yung ni Mungu, ndhu jakamange maeni? 19Egam ewacu ire kumae, Ai malu icidhi: yioyic peri e m’ubodhi. 20Ka Jufarisayo gipenje, nia ker pa Mungu bino awene, eloko lembe igi ewacu kumae, Ker pa Mungu bino ndem ndem ungo: 21kadok awaca de gibiwacu ngo kumae, Nen, keni! kadi, Kaca! kum nen, ker pa Mungu ni i iwu. 22Ewacu ni julubne kumae, Ceng’ bibino, ka wubiyenyo wunen kind ceng’ acel pa Wod dhanu, ere wubinene ngo. 23Gin de gibiwacu iwu kumae, Nen, kaca! Nen, keni! kud wuci kamoko, kadi kud wulub ng’eigi: 24kum calu lukoth, kan emil yo the polo kurucel, eriedo de yo the polo ma kurucel; e Wod dhanu de bibedo kumeno i ceng’ pare. 25Ento elar ekoesendre be ku gin dupa man dhanum’utuk maeni de ukwere. 26Calu etimbre i rundi pa Noa, e ebibedo kumeno de i ceng’ pa Wod dhanu. 27Gicamu, gimadhu, gigambri, giwodho mi nyom, cil i ceng’ ma Noa mondo ie i avur, e pi ma dit ucore, man enyothogi ceke. 28Ebedo kumeno cil calu etimbre i ceng’ pa Lot; gicamu, gimadhu, ging’iewo, giloko, gipidho, gigomo: 29ento i ceng’ ma Lot uai i ie ku i Sodom, mac ku muganga ai i polo ucwi, unyothogi ceke: 30ebibedo kumeno i ceng’ ma Wod dhanu nyuthre i ie. 31I ceng’ maeno, ng’atu m’ubedo wi ot, jamni pare ke ni i ot, kud elor piny nilabugi woko: ng’atu ma ni i thim de kumeno kud edok cen. 32Wupoi kum ci Lot. 33Ng’atu ma tek biyenyo egwok kwo pare ebirwinye: ento ng’atu ma tek birwinyo kwo pare ebigwoke. 34Awacu iwu kumae, I diewor maeno jumaco ario bibedo wi kavuto acel; jubigamu acel, wadi ke jubiweko. 35Mon ario birego karacelo; jubigamu acel wadi ke jubiweko. 36Co ario bibedo i thim; acel bikabre, man wadi bidong’. 37Gidwoko lembe giwacu ire kumae, Kakani, Rwoth? Man ewacu igi kumae, Ka ma kum ni i ie, acuth bicokri ie karacelo.

will be added

X\