Luke 16

1Man ewacu ni julubne bende kumae, Jalonyo moko nuti m’ubedo ku jakurpiny; judoto ng’atuno i bang’e nia edhenyo piny pare. 2Man elwong’e, ewacu ire kumae, Lem mae m’awinjo piri e ang’o? wodh wel mi kuropiny peri; kum icopo bedo jakurpiny kendo ngo. 3Jakurpiny uwacu i ie gire kumae, Abitimo ang’o, kum rwoth para kabu tic mi kuropiny i bang’a? Tekra mbe mi furofur; lewic de nega kum kwayu piny. 4Ang’eyo gin m’abitimo, nia, ka jukaba woko kud i tic mi kuropiny, gibin gijola i udigi. 5E kan elwong’o jubanja pa rwodhe kubang’gi nzu i bang’e, ewacu ni ma kwong’ane kumae, Banja peri adi m’igamu ba rwoth para? 6Ewacu kumae, Mo mukero dak. Man ewacu ire kumae, Gam waraga peri, ibed piny pio igor pier abic. 7Elund ewacu ba ng’atu mange kumae, Tn ke banja peri adi? Ewacu kumae, Nganu mukero dak acel. Ewacu ire kumae, Gam waraga peri, igor pier abora. 8Rwoth pare foyo jakurpiny m’ugondre kum etimo ku rieko: kum wot mi ng’om maeni i kind dhanum’utuk migi gi riek ma sagu wot mi der. 9Man awacu iwu kumae, Wumak jurimo iwu giwu ku piny mi gondri; kara, kan ebithum, gibijolowu i hema ma nja. 10Ng’atu ma en e mandha i gin ma nyathigi en e mandha bende i gin ma dit: man ng’atu m’ugondre i gin ma nyathigi egondre bende i gin ma dit. 11Ka kumeno tek wubedo mandha ngo i piny mi gondri ng’a ma bimio iwu piny mandha ni sumba? 12Tek wubedo mandha ngo i maeno ma pa ng’atu mange, ng’a ma bimio iwu ma mu ma dhe? 13Jatic umbe ma copo timo ni judongo ario: kum kadi ebidagu acel, ebimaru mucelo; kadi ebimoko bang’ acel, man ebicayu mucelo. Wucopo timo ni Mungu ku lonyo de ngo. 14E Jufarisayo, ma jumar sente, giwinjo gin maeni ceke; e gicaye. 15Ewacu igi kumae, Wun wu ju ma wugonyo lembe m’i wiwu giwu i wang’ dhanu; ento Mungu ng’eyo adundewu: kum gin m’utingre ku ba dhanu en e gin mir adegi kud i wang’ Mungu. 16Cik ku jubila ginuti cil kum Yohana: ugambre i nindo maeca lembanyong’a ma juboth ko mi ker pa Mungu juyero, man ku ba dhanu nzu gimondo i ie ku kero. 17Ento kadhu woko mi polo ku ng’om e yot, ma sagu podho mi ng’et nyiguta acel mi cik. 18Ku ba dhanu ndri ma tek uweko cege, man egamu mange, nwang’u egiero gier: ng’atu m’ugamu ng’atu ma cware weke nwang’u egiero gier. 19Nwang’u jalonyo moko nuti, m’uronjre kud uluga ku bongu ma nwang’ ma ber, man ecamu cemo ma mit ceng’ ceke: 20e jakwaipiny moko ma nyinge Lazaro nuti ma juketho dhugang’ pare, ma rem uromo kume ceke, 21m’eyenyo eyeng’ ku ng’ili cam m’uoi ku dhu mesa pa jalonyo; eyo, cil gwogi gibino ginang’u wang’ rem pare. 22Man etimbre, nia jakwaipiny utho, malaika de giyeye gitere kor Ibrahim: jalonyo bende tho, e juyike. 23Man eng’ayu wang’e malu kud i Hadeya, ma eni i ndiba, e eneno Ibrahim ku bor, man Lazaro de ni kore. 24E ekok ewacu kumae, Vwa Ibrahim, bed ku kisa i kuma, man ior Lazaro, kara eroi wi lwete i pi, ekwi ko leba; kum abedo i ndiba i lebmac maeni. 25Ento Ibrahim wacu kumae, Woda, poi nia i rundi m’ibedo ie kwo inwang’u gin peri ma ber, Lazaro de kumeno enwang’u gin ma rac: ento kawono ejukre keni, in ke ini i ndiba. 26M’umedo maeni ceke, i kindwa wakudu longro ma dit nuti, kara ju m’uyenyo giai kakeni gikadh i beng’i ku gicopi, kara jumoko ma kuno de kadhu i bang’wa kud ucopre igi. 27Man ewacu kumae, Ka kumeno akweii, vwa, iore i ot pa vwa; 28kum abedo ku utumira abic; kara eyer igi, kara gin bende ku gibin i ka ndiba maeni. 29Ento Ibrahim wacu kumae, Gibedo ku Musa ku jubila de, wek giwinjgi. 30Man ewacu kumae, Ungo, vwa Ibrahim: ento tek ng’atu acel ucidho i bang’gi m’uai i kind ju m’utho, e gibiloko cwinygi. 31E ewacu ire kumae, Tek giwinjo Musa ku jubila de ngo, gibicukri ngo, kadok ng’atu moko ai ku kind ju m’utho.

will be added

X\