Luke 15

1Nie weg ajok ceke ku judubo bende gibecoro ceng’ni i bang’e kara giwinje. 2Man Jufarisayo ku jugorcik ging’ur, giwacu kumae, Ng’atuni jolo judubo, ecamu kugi de. 3Man eyero igi lembabola mae, ewacu kumae, 4Ng’a ma ni i kindwu ma won rombe dak, ma kan acel m’i kindgi rwinyo ire, eweko pier abung’wen wi abung’wen ungo i yamba, ecidho de eyenyo maeni m’urwinyo ngo, maram enwang’e ko? 5Man kan enwang’e, e ekethe wi goke, k’anyong’a. 6Kan etundo i ot pare, elwong’o jurimbe ku judhugola pare karacelo, ewacu igi kumae, Anyong’a negwu wakudu, kum anwang’u rombo para m’urwinyo. 7Awacu iwu, nia anyong’a bibedo nuti kumeno i polo kum jadubo acel m’uloko cwinye, ma sagu mi dhanu ma pwe pier abung’wen wi abung’wen, ma can loko cwiny umbe kugi. 8Kadi dhaku makani ma won sente apar, tek ng’ete acel urwinyo ire, ecwinyo thala ngo, eyweyo ot de, eyenyo mor mor ungo maram enwang’e ko? 9E kan enwang’e, elwong’o jurimbe ku judhugola pare karacelo, ewacu kumae, Anyong’a negwu wakudu, kum anwang’u ng’et sente m’urwinyo ira. 10Cil kumeno, awacu iwu, Anyong’a nuti i wang’ malaika pa Mungu kum jadubo acel m’uloko cwinye. 11Man ewacu kumae, Ng’atu moko bedo ku wote ario: 12wode ma nok uwacu ni won kumae, Vwa, mi ira ng’et jupiny peri maka para. Man epoko igi piny pare. 13Yo ng’ei ceng’ ma nyanok, wode ma nok ucoko piny pare ceke karacelo etugo woth ecidho i ng’om ma bor; man edhenyo piny pare ku bedo mir awagu. 14E kan elalu ceke, ndru ma dit upodho i ng’om maeno; man emaku bedo ku can piny. 15E ecidho eribre gire ba ng’atu acel ma kind dhanu m’i ng’ombuno; man eore i podho pare emi cam ni kul. 16Man eyenyo eyeng’ ku cung’ cam ma kul ucamu: e ng’atu moko mbe m’umio ire. 17Ento kan enwang’u rieko gire ewacu kumae, Jutic pa vwa mi sukulia adi m’ubedo ku kwen ma romogi donge dong’ de, ka an atho keni ku kec! 18Abiai abicidho ba vwa, abiwacu ire kumae, Vwa, adubo ni polo man i weng’i de; 19aromo ngo kendo nia julwong’a wodi; keth abed calu jatic peri acel mi sukulia. 20E eai, ebino de ba won. Ento ka fodi eni bor, won unene, ngisi nege de, man eringo, egwaku ng’ute, ecwio limbe de. 21Wode wacu ire kumae, Vwa, adubo ni polo, kud i weng’i de: aromo ngo kendo ya julwong’a wodi. 22Ento won uwacu ni jumiru pare kumae, Wuwodh kendi ma sagu wagi pio, wurony i kume; wuroi lagith de i lwete, ku wara de i tiende: 23man wukel nyathi dhiang’ m’ucwe, wuthume, man wek wacam, watim anyong’a de: 24kum woda maeni ma nwang’u utho, ebedo kwo kendo; erwinyo, man enwangre. E gimaku bedo kud anyong’a. 25Nwang’u wode ma jadit ni i thim: e kan ebino edhingo ot de, ewinjo bang’ adungu ku miel de. 26E elwong’o ng’atu acel i bang’e ma kind jutic, man epenjo nia kuno nyo gin maeni ang’o. 27Ewacu ire kumae, Umeru dwogo en; e wuru thumo nyathi dhiang’ m’ucwe, kum ejole museme bo de. 28Ento ng’ecwiny umake, man eyio ngo emondi: e won uwok woko, man ecuke. 29Ento eloko lembe ewacu ni won kumae, Nen, rundi maeni dupa atimo iri, man akadhu ku wi lembang’ola peri ki ngo; ento fodi imio ira nyathi diel de ngo, kara atim anyong’a ku jurimba: 30ento ka wodi maeni dwogo, m’ecamu piny m’itungri kudo ku weg tarwang’ ithumo ire nyathi dhiang’ m’ucwe. 31E ewacu ire kumae, Woda, ibedo i bang’a asu, gin ceke ma para en e peri. 32Ento emaku jutim anyong’a jubed ku mutoro de: kum nwang’u umeru maeni tho, man ebedo kwo kendo; erwinyo, man enwangre.

will be added

X\