Luke 13

1Nie i nindo maeni nini dhanu moko nuti m’uyero ire pi Jugalilaya, ma Pilato ribo rimbgi ku lam migi. 2Eloko lembe ewacu igi kumae, Wuwacu nyo Jugalilaya maeni gi judubo ma sagu Jugalilaya ceke? kum gisendri ku gin maeni? 3Awacu iwu kumae, Ungo: ento, tek wuloko cwinywu ngo, wun ceke wubirwinyo kumeno. 4Kadi juapar wi abora maeno, ma ot ma wiu m’i Siloam upodho i wigi, enegogi de, wuwacu nyo gi judubo ma sagu dhanu ceke m’ubedo i Yerusalemi? 5Awacu iwu kumae, Ungo: ento, tek wuloko cwinywu ngo, wun ceke wubirwinyo kumeno. 6Man eyero lembabola maeni kumae; Ng’atu moko bedo kud ulam m’epidho i podho pare mir ulok; e ebino yenyo nyinge i wie, enwang’u de ngo. 7Man ewacu ni jatipodho mir ulok kumae, Nen, rundi adek maeni abino yenyo nying ulam wi yend ulam maeni, e anwang’u ngo; ng’ole piny; ecamu ng’om mananu de nedi? 8Man eloko lembe ewacu ire kumae, Rwoth, weke kumeno rundi maeni bende, ma fodi abikofuro ng’om i there, abiketho weyo de: 9man tek ecego nyinge macen, ber; ento tek ecego ngo, ibing’ole piny. 10Nwang’u ebeponjo i kacokri acel i ceng’ sabatu. 11Nen, dhaku nuti m’ubedo ku tipo mi mulima rundi apar wi abora; edole ngur, ecopo twinjre malu ngo. 12E ka Yesu nene, e elwong’e, ewacu ire kumae, Dhaku, ibedo agonya ni mulima peri. 13Man eketho cinge i kume: e eni eni erieire atira, man eyungo Mungu. 14E jadit mi kacokri, ma lembe ton i ie kum Yesu keyo kum i ceng’ sabatu, eloko lembe ewacu ni udul dhanu kumae, Ceng’ abusiel nuti ma maku dhanu tim ie tic: ka kumeno wubin i maeno man jukei kumwu, i ceng’ sabatu re ngo. 15Ento Rwoth uloko lembe ewacu ire kumae, Wu weg ambili, wun kubeng’wu kubeng’wu ng’atuman gonyo dhiang’ pare kadi kana pare kud i dwol, epeye ba pi de ngo? 16Man emaku ngo nia dhaku mae, m’e nyar Ibrahim, ma Jok utwvie, rundi apar wi abora, ugonjre kud i twic maeni i ceng’ sabatu? 17Kan eyero gin maeni, lewic umaku jupiem pare ceke: anyong’a nego udul dhanu ceke kum gin ceke mi dwong’ m’utimbre ni kume. 18Ka kumeno ewacu kumae, Ker pa Mungu e calu ang’o? man abipore kud ang’o? 19E calu nying atingli, ma ng’atu moko gamu, ebolo i podho pare ma dhe; edongo de, man edoko ni yen; winyo m’i polo de gigonjo wi jange. 20Ewacu kendo kumae, Abiporo ker pa Mungu kud ang’o? 21E calu thobi, ma dhaku gamu elutho i mogo asisa adek, maram thobi rome ko ceke. 22Ecidho i yo pare cil i adhura ku pacu, ku ponjo, m’ewotho ko Yerusalem. 23Ng’atu acel uwacu ire kumae, Rwoth, ju ma giboth gi noki? man ewacu ire kumae, 24Ponj mondo ku dhugola ma diny: kum dupa, awacu iwu, biponjo mondo i ie, e gibicopo ngo, 25ka won ot uai malu, eciko dhugola de, man wumaku cungo woko, wudwong’o dhugola de, wuwacu kumae, Rwoth, yab iwa; man ebidwoko lembe ebiwacu iwu kumae, Ang’eyowu ngo kadok ka ma wuai i ie de; 26wubilund maku wacu kumae, Wacamu wamadhu i weng’i, iponjo de i gengi mwa; 27e ebiwacu kumae, Awacu iwu, Ang’eyo ka ma wuai i ie ngo; wuai cen kud i vuta, wun ceke ma wu jutic mi camuco. 28E ywak ku kayu lak bibedo nuti, ka wubineno Ibrahim, Isak, man Yakobo, ku jubila ceke, i ker pa Mungu, wun e ma jubayuwu woko. 29Gibiai yo nyangu ku yo reto, man yor ariwa ma malu ku yor ariwa ma piny, e gibibedo piny i ker pa Mungu. 30Man nen, moko m’udong’ cen bitelo yo, moko de m’utelo yo bidong’ cen. 31I saa maeno Jufarisayo moko bino, wacu ire kumae, Ai kakeni, ci kamange: kum Herode yenyo enegi. 32Man ewacu igi kumae, Ci yer ni kaki maeno, Nen, awodho pajogi man akeyo kum tin kud urwo, i ceng’ mir adege de adoko ndhu cu. 33Ento akoacidh be i yo para tin kud urwo ku nyiceng’maca: kum ecopre ngo nia jabila rwiny woko kud i Yerusalem. 34E Yerusalem, Yerusalem, m’unego jubila pa Mungu, man m’ucanyu ju ma juoro i bang’e ku kidi! ayenyo wang’ udul acok nyithindho peri karacelo, cil calu min gweno coko nyithindhe the bombe, ere wuyenyo ngo! 35Nen, ot peri dong’ iri ni uvuru: man awacu iwu kumae, Wubinena ngo, cil ma wubiwacu kumae, Mugisa ni ng’atu m’ubino ku nying Rwoth.

will be added

X\